Seksiyon 55
Pagpadayag nga gihatag pinaagi ni Joseph Smith ang Propeta ngadto kang William W. Phelps, sa Kirtland, Ohio, Hunyo 14, 1831. Si William W. Phelps, usa ka tig-imprinta, ug ang iyang pamilya bag-o lang miabot sa Kirtland, ug ang Propeta nagpakisayod sa Ginoo mahitungod kaniya.
1–3, Si William W. Phelps gitawag ug napili nga bunyagan, i-orden nga elder, ug magsangyaw sa ebanghelyo; 4, Siya usab magsulat og mga basahon alang sa mga bata diha sa mga tulunghaan sa Simbahan; 5–6, Kinahanglan siyang mobiyahe ngadto sa Missouri, nga mao ang mahimong dapit asa siya maghago.
1 Tan-awa, miingon ang Ginoo kanimo, akong sulugoon nga William, oo, gani ang Ginoo sa tibuok yuta, ikaw gitawag ug gipili; ug human nga ikaw nabunyagan pinaagi sa tubig, nga kon imong buhaton uban sa panan-aw nga nakatutok sa akong himaya, ikaw makabaton og kapasayloan sa imong mga sala ug makadawat sa Balaang Espiritu pinaagi sa pagpandong sa mga kamot;
2 Ug unya ikaw i-orden pinaagi sa kamot sa akong sulugoon nga si Joseph Smith, Jun., nga mahimong elder niini nga simbahan, sa pagsangyaw og paghinulsol ug kapasayloan sa mga sala pinaagi sa bunyag sa ngalan ni Jesukristo, ang Anak sa buhi nga Dios.
3 Ug si bisan kinsa nga imong pandongan sa imong mga kamot, kon mahinulsolon sila sa akong atubangan, ikaw makabaton og gahom sa paghatag sa Balaang Espiritu.
4 Ug usab, ikaw i-orden sa pagtabang sa akong sulugoon nga si Oliver Cowdery sa paghimo sa buluhaton sa pag-imprinta, ug sa pagpili ug pagsulat og mga basahon alang sa mga tulunghaan niini nga simbahan, nga ang gagmay nga mga bata usab makadawat og mga panudlo sa akong atubangan nga makapahimuot kanako.
5 Ug usab, sa pagkatinuod sultihan ko ikaw, alang niini nga hinungdan ikaw magsugod sa imong panaw uban sa akong mga sulugoon nga sila si Joseph Smith, Jun., ug Sidney Rigdon, nga ikaw makapahiluna sa yuta nga imong panulundon sa paghimo niini nga buhat.
6 Ug usab, tugoti nga ang akong sulugoon nga si Joseph Coe mopanaw usab uban kanila. Ang nahibilin ipahibalo human niini, gani sa akong kabubut-on. Amen.