Seksiyon 57
Pagpadayag nga gihatag pinaagi ni Joseph Smith ang Propeta, sa Zion, Lalawigan sa Jackson, Missouri, Hulyo 20, 1831. Agi og pagtuman sa sugo sa Ginoo nga mobiyahe ngadto sa Missouri, diin Siya mopadayag “sa yuta nga inyong panulundon” (seksiyon 52), ang mga elder mipanaw gikan sa Ohio ngadto sa kasadpang utlanan sa Missouri. Si Joseph Smith namalandong sa kahimtang sa mga Lamanita ug naghunahuna: “Kanus-a mamulak ang kamingawan sama sa mga rosas? Kanus-a tukoron ang Zion diha sa iyang himaya, ug asa mobarog ang Imong templo, diin ang tanang nasod moadto sa kataposang mga adlaw?” Sa wala madugay nakadawat siya niini nga pagpadayag.
1–3, Ang Independence, Missouri, mao ang dapit alang sa Siyudad sa Zion ug sa templo; 4–7, Ang mga Santos kinahanglang mopalit og mga yuta ug makadawat og mga panulundon niana nga dapit; 8–16, Si Sidney Gilbert kinahanglan nga magtukod og tindahan, si William W. Phelps ang mahimong tig-imprinta, ug si Oliver Cowdery mao ang mo-edit sa materyal alang sa pagmantala.
1 Patalinghog, O kamo nga mga elder sa akong simbahan, miingon ang Ginoo nga inyong Dios, nga naghiusa sa pagpundok, sumala sa akong mga sugo, dinhi niini nga yuta, nga mao ang yuta sa Missouri, nga mao ang yuta nga akong gipili ug gipahinungod alang sa pagpundok sa mga santos.
2 Mao nga, kini mao ang yuta sa saad, ug ang dapit alang sa siyudad sa Zion.
3 Ug miingon ang Ginoo nga inyong Dios, kon kamo modawat og kaalam ania ang kaalam. Tan-awa, ang dapit nga karon gitawag og Independence mao ang sentro nga dapit; ug ang luna alang sa templo anaa nahimutang sa kasadpan nga bahin, sa usa ka lote nga dili layo gikan sa balay hukmanan.
4 Mao nga, maalamon nga ang yuta kinahanglang paliton sa mga santos, ug ang matag luna usab nga nahimutang sa kasadpan nga bahin, gani sa utlanan nga direktang nagsubay tali sa Judeo ug sa Hentil;
5 Ug ang matag luna usab nga maoy utlanan sa mga tugwayanan, kon akong mga tinun-an tugotan sa pagpalit sa mga yuta. Tan-awa, maalamon ang paghimo niini, nga maangkon nila kini alang sa mahangtorong panulundon.
6 Ug tugoti nga ang akong sulugoon nga si Sidney Gilbert mobarog sa katungdanan diin siya akong gipili, nga modawat og mga salapi, nga mahimong tinugyanan sa simbahan, sa pagpalit og yuta sa tanang rehiyon nga anaa sa palibot, kon pagahimoon sa pagkamatarong, ug sumala sa maalamon nga paggiya.
7 Ug tugoti nga ang akong sulugoon nga si Edward Partridge mobarog sa katungdanan nga akong gisangon kaniya, ug mobahin ngadto sa mga santos sa ilang panulundon, sumala sa akong gisugo; ug usab niadtong iyang gisangonan nga motabang kaniya.
8 Ug usab, sa pagkatinuod sultihan ko kamo, tugoti nga ang akong sulugoon nga si Sidney Gilbert mopahiluna sa iyang kaugalingon niini nga dapit, ug magtukod og tindahan, aron makabaligya siya og mga butang sa walay pagpanglimbong, aron makatigom siya og salapi nga ipalit og mga yuta alang sa kaayohan sa mga santos, ug nga makabaton siya sa bisan unsa nga mga butang nga kinahanglanon sa mga disipulo aron mapahiluna sila diha sa ilang panulundon.
9 Ug usab tugoti nga ang akong sulugoon nga si Sidney Gilbert mokuha og lisensiya—tan-awa ania ang kaalam, ug kinsa kadtong mobasa niini kinahanglang makasabot—aron siya mopadala usab og mga butang ngadto sa katawhan, gani ngadto kang bisan kinsa nga iyang gusto nga mga kawani sama sa mga klerk nga nagtrabaho ubos sa iyang pangalagad;
10 Ug sa ingon niana mosangkap alang sa akong mga santos, aron ang akong ebanghelyo masangyaw ngadto niadtong naglingkod sa kangitngit ug diha sa rehiyon ug anaa sa kahimtang sa makahahadlok nga kamatayon.
11 Ug usab, sa pagkatinuod sultihan ko kamo, tugoti ang akong sulugoon nga si William W. Phelps nga mapahiluna dinhi niini nga dapit, ug himoong tig-imprinta sa simbahan.
12 Ug tan-awa, kon ang kalibotan modawat sa iyang mga sinulat—tan-awa ania ang kaalam—tugoti nga siya makabaton sa bisan unsa nga iyang mabatonan pinaagi sa pagkamatarong, alang sa kaayohan sa mga santos.
13 Ug tugoti nga ang akong sulugoon nga si Oliver Cowdery motabang kaniya, gani sama sa akong gisugo, sa bisan asa nga dapit nga akong ihatag kaniya, sa pagkopya, ug sa pagkorehir, ug sa pagpili, nga ang tanang butang mahimong sakto sa akong atubangan, ingon nga kini pagapamatud-an sa Espiritu pinaagi kaniya.
14 Ug sa ingon niana tugoti nga kadto sila nga akong gipamulong mapahiluna diha sa yuta sa Zion, sa labing dali kutob sa mahimo, uban sa ilang mga pamilya, sa pagbuhat niadtong mga butang sigon sa akong gipamulong.
15 Ug karon mahitungod sa pagpundok—Tugoti nga angbishop ug ang tinugyanan maghimo og mga pagpangandam alang niadtong mga pamilya nga akong gisugo nga moanhi dinhi niini nga yuta, sa labing dali kutob sa mahimo, ug ipahiluna sila diha sa ilang kabilin nga yuta.
16 Ug ngadto sa nahibilin nga mga elder ug mga miyembro ang dugang nga mga pahimangno ihatag human niini. Ug mao gayod kana. Amen.