Seksiyon 66
Pagpadayag nga gihatag pinaagi ni Joseph Smith ang Propeta, sa Hiram, Ohio, Oktubre 29, 1831. Si William E. McLellin, sa tago nangamuyo sa Ginoo nga ipahibalo pinaagi sa Propeta ang tubag sa lima ka pangutana, nga wala mahibaloi ni Joseph Smith. Sa hangyo ni McLellin, ang Propeta nangutana sa Ginoo ug nakadawat niini nga pagpadayag.
1–4, Ang walay kataposan nga pakigsaad mao ang kahingpitan sa ebanghelyo; 5–8, Ang mga elder mao ang mosangyaw, mopamatuod, ug mopasabot ngadto sa katawhan; 9–13, Ang matinud-anon nga serbisyo sa pagpangalagad nagseguro og kabilin sa kinabuhing dayon.
1 Tan-awa, sa ingon niini miingon ang Ginoo ngadto sa akong sulugoon nga si William E. McLellin—Bulahan ikaw, kon ssugaling biyaan nimo ang imong mga pagkadaotan, ug nakadawat sa akong mga kamatuoran, miingon ang Ginoo nga imong Manunubos, ang Manluluwas sa kalibotan, gani kutob sa motuo sa akong ngalan.
2 Sa pagkatinuod sultihan ko ikaw, bulahan ka nga midawat sa akong walay kataposan nga pakigsaad, gani sa kahingpitan sa akong ebanghelyo, nga gipadala ngadto sa katawhan, aron makaangkon sila og kinabuhi ug mahimong mga mag-aambit sa mga himaya nga ipadayag sa kataposang mga adlaw, sumala sa nahisulat pinaagi sa mga propeta ug sa apostoles sa karaang mga adlaw.
3 Sa pagkatinuod sultihan ko ikaw, akong sulugoon nga William, nga ikaw limpyo, apan dili sa tanan; busa, paghinulsol, niadtong mga butang nga wala makapahimuot sa akong panan-aw, miingon ang Ginoo, kay ang Ginoo mopakita niini nganha kanimo.
4 Ug karon, sa pagkatinuod, ako, ang Ginoo, mopakita nganha kanimo unsa ang akong tinguha kabahin kanimo, o unsa ang akong kabubut-on kabahin kanimo.
5 Tan-awa, sa pagkatinuod sultihan ko ikaw, nga kini mao ang akong kabubut-on nga ikaw kinahanglan nga mopahayag sa akong ebanghelyo gikan sa usa ka yuta ngadto sa laing yuta, ug gikan sa usa ka siyudad ngadto sa laing siyudad, oo, niadtong palibot nga mga rehiyon diin wala pa kini ikapahayag.
6 Ayaw dugaya ang imong mga adlaw niining dapita; ug ayaw una pag-adto sa yuta sa Zion; apan kon ugaling ikaw makapadala, pagpadala; kondili, ayaw hunahunaa ang imong kabtangan.
7 Adtoa ang mga silangan nga bahin sa yuta, magpamatuod sa matag dapit, ngadto sa matag tawo ug sa ilang mga sinagoga, mangatarongan uban sa katawhan.
8 Ang akong sulugoon nga si Samuel H. Smith imong iuban, ug ayaw siya biya-i, ug hatagi siya sa imong mga pahimangno; ug siya nga matinud-anon pagahimoon nga lig-on sa matag dapit; ug ako, ang Ginoo, magauban kaninyo.
9 Ipandong ang inyong mga kamot sa nagmasakiton, ug mamaayo sila. Ayaw pagpauli hangtod ako, ang Ginoo, mosugo kaninyo. Pagmapailobon sa kasakitan. Pangayo, ug kamo makadawat; panuktok, ug kini pagaablihan nganha kaninyo.
10 Ayaw pagtinguha nga mahasol. Biya-i ang tanan nga dili matarong. Ayaw pagpanapaw—usa ka tentasyon nga nakasamok kanimo.
11 Sunda kining mga panultihon, kay kini tinuod ug kasaligan; ug ikaw kinahanglan nga mopalambo sa imong buhatan, ug moawhag sa daghang katawhan ngadto sa Zion pinaagi sa mga awit sa walay kataposang kamaya sa ilang ulohan.
12 Padayon diha niini nga mga butang gani hangtod sa kataposan, ug makaangkon ikaw og korona sa kinabuhing dayon sa tuong kamot sa akong Amahan, kinsa puno sa grasya ug kamatuoran.
13 Sa pagkatinuod, mao kini ang gisulti sa Ginoo nga imong Dios, imong Manunubos, gani si Jesukristo. Amen.