Seksiyon 67
Pagpadayag nga gihatag pinaagi ni Joseph Smith ang Propeta, sa Hiram, Ohio, sayo sa Nobyembre 1831. Ang okasyon mao ang espesyal nga komperensiya, ug ang pagmantala sa mga pagpadayag nga nadawat na gikan sa Ginoo pinaagi sa Propeta gikonsiderar ug gihatagan og pagtagad ug gihukman (tan-awa sa ulohan sa seksiyon 1). Si William W. Phelps bag-o lang nakatukod sa imprintahanan sa Simbahan sa Independence, Missouri. Ang komperensiya nakahukom nga imantala ang mga paadayag nga anaa sa Book of Commandments ug sa pag-imprinta og 10,000 ka kopya (nga tungod sa wala malantawi nga mga kalisod sa wala madugay giminosan kini ngadto sa 3,000 ka kopya). Daghan sa kaigsoonan mihatag og ligdong nga pagpamatuod nga ang mga pagpadayag nga natigom alang sa pagmantala tinuod gayod, nga gipamatud-an sa Espiritu Santo nga gibu-bo diha kanila. Ang kasaysayan ni Joseph Smith nagrekord nga human madawat ang pagpadayag nga nailhan nga seksiyon 1, pipila sa panagsultihanay nahimo mahitungod sa pinulongan nga gigamit sa mga pagpadayag. Ang kasamtangan nga pagpadayag misunod.
1–3, Ang Ginoo makadungog sa mga pag-ampo ug mobantay sa Iyang mga elder; 4–9, gihagit Niya ang labing makinaadmanon nga tawo nga parehasan ang labing ubos sa Iyang mga pagpadayag; 10–14, Ang matinud-anong mga elder pagadasigon pinaagi sa Espiritu ug makakita sa nawong sa Dios.
1 Tan-awa ug patalinghog, O kamo nga mga elder sa akong simbahan, nga nagpundok sa inyong mga kaugalingon, kansang mga pag-ampo akong nadungog, ug kansang mga kasingkasing ako nasayod, ug kansang mga tinguha miabot sa akong atubangan.
2 Tan-awa ug sud-onga, ang akong mga mata anaa diha kaninyo, ug ang kalangitan ug ang yuta anaa sa akong mga kamot ug ang mga katigayonan sa kahangtoran akoa aron ihatag.
3 Nagtinguha kamo nga motuo nga kamo makadawat og panalangin nga gitanyag kaninyo; apan tan-awa, sa pagkatinuod sultihan ko kamo nga adunay mga kahadlok sa inyong mga kasingkasing, ug sa pagkatinuod mao kini ang hinungdan nga kamo wala makadawat.
4 Ug karon ako, ang Ginoo, mohatag kaninyo og usa ka pagpamatuod sa kamatuoran niini nga mga sugo nga anaa sa inyong atubangan.
5 Ang inyong mga mata nagtan-aw sa akong sulugoon nga si Joseph Smith, Jun., ug sa iyang pinulongan nga inyong nahibaloan, ug sa iyang mga pagkadili hingpit nga inyong nahibaloan; ug nagtinguha kamo sa inyong mga kasingkasing og kahibalo nga kamo makapahayag og labaw sa iyang pinulongan; nasayod usab kamo niini.
6 Karon, pangitaa ninyo gikan sa Basahon sa mga Sugo, bisan ang labing ubos niini, ug siya nga labing maalamon diha kaninyo ang pilia;
7 O, kon adunay bisan kinsa kaninyo ang makahimo og usa nga sama niini, nan makiangayon ang inyong pag-ingon nga kamo wala masayod nga kini tinuod;
8 Apan kon dili kamo makahimo og usa nga sama niini, ubos kamo sa panghimaraot kon dili kamo mopamatuod nga kini tinuod.
9 Kay nasayod kamo nga walay dili matarong diha niini, ug kana nga matarong naggikan sa kahitas-an, gikan sa Amahan sa mga kahayag.
10 Ug usab, sa pagkatinuod sultihan ko kamo nga inyo kini nga pribilihiyo, ug usa ka saad ang akong ihatag kaninyo nga giorden na ngadto niini nga pangalagad, nga kon ugaling inyong isalikway ang mga kasina ug mga kahadlok gikan sa inyong kaugalingon, ug magpaubos kamo sa akong atubangan, kay kamo dili pa kaayo mapainubsanon, ang tabil pagagision ug kamo makakita kanako ug makaila nga ako ania—dili sa kalibotanon ni kinaiyanhon nga hunahuna, apan sa espirituwal.
11 Kay walay tawo nga nakakita sa Dios sa bisan unsa nga panahon dinhi sa unod, gawas kon anaa sa impluwensya sa Espiritu sa Dios.
12 Ni walay bisan kinsa nga kinaiyanhon nga tawo ang makaharong sa atubangan sa Dios, ni sa kalibotanon nga hunahuna.
13 Dili kamo makaharong sa atubangan sa Dios karon, ni sa pagpangalagad sa mga anghel; mao nga, padayon sa pagpailob hangtod nga kamo mahingpit.
14 Ayaw usba ang inyong mga hunahuna; ug kon takos kamo, sa akong kaugalingong tukma nga panahon, makita ug masayran ninyo kana nga gitugyan kaninyo pinaagi sa mga kamot sa akong sulugoon nga si Joseph Smith, Jun. Amen.