Seksiyon 70
Pagpadayag nga gihatag pinaagi ni Joseph Smith ang Propeta, sa Hiram, Ohio, Nobiyembre 12, 1831. Ang kasaysayan sa Propeta namahayag nga upat ka espesyal nga komperensiya ang nahimo gikan sa ika-1 hangtod sa ika-12 nga adlaw sa Nobiyembre, nanghitabo sulod niini nga mga petsa. Sa kataposan niini nga mga katigoman ang labing importante sa mga pagpadayag nga sa dili madugay imantala isip ang Book of Commandments ug dayon ang Doktrina ug mga Pakigsaad, gikonsiderar. Kini nga pagpadayag gihatag human gibotaran sa komperensiya nga ang pagpadayag “gipakabili sa Simbahan sama sa tanang mga katigayonan sa Kalibotan.” Ang kasaysayan ni Joseph Smith naghisgot sa mga pagpadayag isip “ang pundasyon sa Simbahan niining kataposang mga adlaw, ug usa ka kaayohan sa kalibotan, nagpakita nga ang mga yawe sa mga misteryo sa gingharian sa atong Manluluwas gisalig na usab sa tawo.”
1–5, Mga tinugyanan gipili nga momantala sa mga pagpadayag; 6–13, Kadtong nagtrabaho sa espirituwal nga mga butang angayan sa ilang suhol; 14–18, Ang mga Santos kinahanglan nga managsama sa temporal nga mga butang.
1 Tan-awa, ug patalinghog, O kamong mga lumulupyo sa Zion, ug kamong tanan nga katawhan sa akong simbahan kinsa anaa sa layo, ug paminaw sa pulong sa Ginoo nga akong ihatag sa akong sulugoon nga si Joseph Smith, Jun., ug usab sa akong sulugoon nga si Martin Harris, ug usab sa akong sulugoon nga si Oliver Cowdery, ug usab sa akong sulugoon nga si John Whitmer, ug usab sa akong sulugoon nga si Sidney Rigdon, ug usab sa akong sulugoon nga si William W. Phelps, isip sugo ngadto kanila.
2 Kay ihatag nako ang sugo ngadto kanila; mao nga patalinghog ug paminaw, kay sa ingon niana miingon ang Ginoo ngadto kanila—
3 Ako, ang Ginoo, mitudlo kanila, ug mi-orden kanila nga mahimong mga tinugyanan sa mga pagpadayag ug sa mga sugo nga akong gihatag kanila, ug nga sa umaabot akong ihatag kanila;
4 Ug akong kinahanglanon gikan kanila ang asoy niini nga pagkatinugyanan sa adlaw sa paghukom.
5 Mao nga, ako ang nagpili alang kanila, ug mao kini ang ilang buluhaton sa simbahan sa Dios, sa pagdumala niini ug sa mga butang nga kalabot sa mga pagpadayag, oo, sa mga kaayohan niana.
6 Mao nga, usa ka sugo akong ihatag kanila, nga dili nila ihatag kini nga mga butang ngadto sa simbahan, ni sa kalibotan;
7 Bisan pa niana, kon ugaling nakadawat man sila og mas daghan kay sa ilang gikinahanglan, ihatag kini ngadto sa akong balay tipiganan;
8 Ug ang mga kaayohan ipahinungod ngadto sa mga lumulupyo sa Zion, ug ngadto sa ilang mga henerasyon, kon ugaling mahimo man silang mga manununod sumala sa mga balaod sa gingharian.
9 Tan-awa, mao kini ang gikinahanglan sa Ginoo sa matag tawo sa iyang pagkatinugyanan, gani sama nga ako, ang Ginoo, mipili o sa pagkahuman niini mopili pa ni bisan kinsa.
10 Ug tan-awa, walay tawo nga makalikay niini nga balaod nga sakop sa simbahan sa buhi nga Dios;
11 Oo, ni ang bishop, ni ang tinugyanan kinsa nagbantay sa balay tipiganan sa Ginoo, ni siya nga natudlo sa pagkatinugyanan sa temporal nga mga butang.
12 Siya nga gipili sa pagpangalagad sa mga butang nga espirituwal, siya usab takos sa iyang suhol, sama niadtong gipili sa pagkatinugyanan aron mangalagad sa mga butang nga temporal;
13 Oo, gani mas buhong pa, nga ang maong kabuhong gipilo-pilo alang ngadto kanila pinaagi sa mga pagpakita sa Espiritu.
14 Bisan pa niana, sa inyong mga butang nga temporal managsama ra kamo, ug buhata kini sa walay pagpanuko, kay kondili ang kabuhong sa mga pagpakita sa Espiritu dili mahatag.
15 Karon, kini nga sugo akong ihatag sa akong mga sulugoon alang sa ilang kaayohan samtang sila magpabilin, alang sa pagpakita sa akong mga panalangin sa ilang mga ulo, ug alang sa ganti sa ilang kakugi ug alang sa ilang seguridad;
16 Alang sa pagkaon ug alang sa sinina; alang sa kabilin; alang sa mga balay ug alang sa mga yuta, sa bisan unsang mga sitwasyon nga ako, ang Ginoo, mobutang kanila, ug bisan asa nga ako, ang Ginoo, mopadala kanila.
17 Kay nagmatinud-anon sila sa daghang butang, ug nakabuhat og maayo kon ugaling wala sila makasala.
18 Tan-awa, ako, ang Ginoo, magmaluluy-on ug manalangin kanila, ug makasulod sila sa hingpit nga kalipay niining mga butanga. Ingon gayod niana. Amen.