Seksiyon 71
Pagpadayag nga gihatag ngadto ni Joseph Smith ang Propeta ug Sidney Rigdon, sa Hiram, Ohio, Disyembre 1, 1831. Ang Propeta nagpadayon sa paghubad sa Biblia kauban ni Sidney Rigdon isip iyang tigsulat hangtod nga nadawat kini nga pagpadayag, nga sa maong panahon temporaryo kining gihunong aron matuman nila ang instruksyon nga gihatag niini. Ang kaigsoonan kinahanglan nga mosangyaw sa paghupay sa dili mahigalaong mga pagbati nga milambo batok sa Simbahan isip resulta sa pagmantala sa mga sulat nga sinulat ni Ezra Booth, nga miapostasiya.
1–4, Sila si Joseph Smith ug Sidney Rigdon gipadala sa pagpamahayag sa ebanghelyo; 5–11, Ang mga kaaway sa mga Santos pagalibogon.
1 Tan-awa, ingon niini ang giingon sa Ginoo kaninyo akong mga sulugoon Joseph Smith, Jun., ug Sidney Rigdon, nga sa pagkatinuod ang panahon miabot na nga gikinahanglan ug angay ngari kanako nga inyong ablihan ang inyong mga ba-ba sa pagpahayag sa akong ebanghelyo, sa mga butang sa gingharian, mopasabot sa mga misteryo niini gikan sa mga kasulatan, sumala niana nga bahin sa Espiritu ug gahom nga ihatag kaninyo, gani sumala sa akong kabubut-on.
2 Sa pagkatinuod sultihan ko kamo, ipahayag ngadto sa kalibotan sa palibot nga mga rehiyon, ug sa simbahan usab, sulod sa usa ka panahon, gani hangtod nga kini ipahibalo kaninyo.
3 Sa pagkatinuod usa kini ka misyon sulod sa usa ka panahon, nga akong ihatag kaninyo.
4 Mao nga, trabaho kamo sa akong ubasan. Tawaga ang mga lumulupyo sa yuta, ug magpamatuod, ug andama ang agianan alang sa mga sugo ug sa mga pagpadayag nga moabot.
5 Karon, tan-awa mao kini ang kaalam; kinsa kadtong mobasa, himoa nga siya makasabot ug modawat usab;
6 Kay ngadto kaniya nga nakadawat hatagan og mas labaw pa nga kabuhong, gani sa gahom.
7 Mao nga, liboga ang inyong mga kaaway; dapita sila sa pagpakigkita kaninyo diha sa dayag ug sa pribado; ug kon ugaling kamo magmatinud-anon, ang ilang kaulaw dayag nga makita sa tanan.
8 Mao nga, hagita sila sa pagdala sa ilang labing lig-on nga mga pangatarongan batok sa Ginoo.
9 Sa pagkatinuod, ingon niini ang giingon sa Ginoo kaninyo—walay hinagiban nga gihimo nga molampos batok kaninyo;
10 Ug kon adunay tawo nga mosupak batok kaninyo mahingpit ang iyang kapildihan sa akong kaugalingong tukma nga panahon.
11 Mao nga, tumana ang akong mga sugo; kini tinuod ug matinud-anon. Ingon gayod niana. Amen.