Seksiyon 72
Pagpadayag nga gihatag pinaagi ni Joseph Smith ang Propeta, sa Kirtland, Ohio, Disyembre 4, 1831. Ang pipila ka elder ug mga miyembro nagpundok aron mahibalo sa ilang katungdanan ug makadawat og dugang panudlo sa mga pagtulon-an sa Simbahan. Kini nga seksiyon usa ka gitipon nga tulo ka pagpadayag nga nadawat sa samang adlaw.Ang mga bersikulo 1 hangtod 8 mipadayag sa tawag ni Newel K. Whitney isip usa ka bishop. Dayon gitawag siya ug giordinahan, human madawat ang mga bersikulo 9 hangtod 23, naghatag og dugang nga impormasyon sa mga katungdanan sa usa ka bishop. Human niana, ang mga bersikulo 24 hangtod 26 gihatag, naghatag og mga panudlo mahitungod sa pagpundok ngadto sa Zion.
1–8, Ang mga elder mohatag og asoy sa ilang pagkatinugyanan ngadto sa bishop; 9–15, Ang bishop modumala sa balay tipiganan ug moatiman sa mga kabos ug sa mga timawa; 16–26, Ang mga bishop momatuod sa katakos sa mga elder.
1 Patalinghog, ug paminaw sa tingog sa Ginoo, O kamo nga nagpundok sa inyong kaugalingon, nga mga high priest sa akong simbahan, ngadto kinsa ang gingharian ug gahom gihatag.
2 Kay sa pagkatinuod sa ingon niana miingon ang Ginoo, angay ngari kanako nga adunay bishop nga pilion nganha kaninyo, o gikan kaninyo, diha sa simbahan niini nga bahin sa ubasan sa Ginoo.
3 Ug sa pagkatinuod kabahin niining butanga maayo ang inyong gihimo nga paghukom, kay gikinahanglan sa Ginoo, sa kamot sa matag tinugyanan, ang paghatag og asoy sa iyang pagkatinugyanan, karon ug sa kahangtoran.
4 Kay siya nga matinud-anon ug maalamon niana nga panahon pagaisipon nga takos sa pagpanunod sa mga mansyon nga giandam alang kaniya sa akong Amahan.
5 Sa pagkatinuod sultihan ko kamo, ang mga elder sa simbahan niini nga bahin sa akong ubasan mohatag og asoy sa ilang pagkatinugyanan ngadto sa bishop, nga akong gipili niini nga bahin sa akong ubasan.
6 Kining mga butanga kinahanglang irekord, aron ihatag ngadto sa bishop sa Zion.
7 Ug ang katungdanan sa bishop mahibaloan pinaagi sa mga sugo nga gihatag na, ug sa tingog sa komperensiya.
8 Ug karon, sa pagkatinuod sultihan ko ikaw, ang akong sulugoon nga si Newel K. Whitney mao ang tawo nga pilion ug i-orden niini nga katungdanan. Mao kini ang kabubut-on sa Ginoo nga inyong Dios, nga inyong Manunubos. Ingon gayod niana. Amen.
9 Ang pulong sa Ginoo, agi og dugang sa balaod nga gihatag, nga nagpahibalo sa katungdanan sa bishop nga gi-orden ngadto sa simbahan niini nga bahin sa ubasan, nga sa pagkatinuod mao kini—
10 Sa pagdumala sa balay tipiganan sa Ginoo; sa pagdawat sa mga pundo sa simbahan niini nga bahin sa ubasan;
11 Sa pagdawat og report gikan sa mga elder nga gisugo kaniadto; ug sa pagpangalagad sa ilang mga gikinahanglan, kinsa mobayad alang niana nga ilang nadawat, kon ugaling sila adunay ikabayad;
12 Nga kini usab mahimong ipahinungod alang sa kaayohan sa simbahan, ngadto sa kabos ug sa timawa.
13 Ug siya kinsa walay ikahatag nga bayad, ang bayranan pagakuhaon ug ihatag ngadto sa bishop sa Zion, kinsa mobayad sa utang gikan nianang gibutang sa Ginoo sa iyang mga kamot.
14 Ug sa mga buluhaton sa matinud-anon nga nagbuhat sa espirituwal nga mga butang, sa pagpangalagad sa ebanghelyo ug sa mga butang sa gingharian sa simbahan, ug sa kalibotan, mobayad sa mga utang ngadto sa bishop sa Zion;
15 Sa ingon niana magagikan sa simbahan, kay sumala sa balaod ang matag tawo nga moabot ngadto sa Zion kinahanglan mohalad sa tanang butang sa atubangan sa bishop sa Zion.
16 Ug karon, sa pagkatinuod sultihan ko ikaw, nga samtang ang matag elder niini nga bahin sa ubasan kinahanglan nga mohatag og asoy sa iyang pagkatinugyanan ngadto sa bishop niini nga bahin sa ubasan—
17 Ang usa ka sertipiko gikan sa maghuhukom o sa bishop niini nga bahin sa ubasan, ngadto sa bishop sa Zion, maghimo sa matag tawo nga takos dawaton, ug mohimo sa tanang butang, alang sa usa ka kabilin, ug pagadawaton isip maalamon nga tinugyanan ug matinud-anon nga mamumuo;
18 Kay kondili man dili siya dawaton sa bishop sa Zion.
19 Ug karon, sa pagkatinuod sultihan ko ikaw, himoa nga ang matag elder nga mohatag og subay ngadto sa bishop sa simbahan niini nga bahin sa ubasan irekomendar sa simbahan o mga simbahan, diin siya nagtrabaho, aron iyang mahatag ang iyang kaugalingon ug ang iyang mga asoy nga madawat sa matag paagi.
20 Ug usab, himoa nga ang akong mga sulugoon nga gipili nga mahimong tinugyanan sa mga sinulat sa akong simbahan makapangayo og tabang sa bishop o mga bishop sa tanang butang—
21 Nga ang mga pagpadayag mamantala, ug mapadala ngadto sa tanang lumulupyo sa yuta; aron usab sila makakuha og mga pundo nga makahatag og kaayohan sa simbahan sa tanang butang;
22 Nga sila usab mohatag sa ilang mga kaugalingon nga mohimo sa tanang butang, ug pagaisipon nga maalamong mga tinugyanan.
23 Ug karon, tan-awa, mahimo kining sumbanan alang sa tanang nagkalainlaing mga branch sa akong simbahan, sa bisan asa nga yuta nga kini natukod. Ug karon akong taposon ang akong pagpamulong. Amen.
24 Pipila ka pulong agi og dugang sa mga balaod sa gingharian, mahitungod sa mga miyembro sa simbahan—sila nga gipili pinaagi sa Balaan nga Espiritu sa pag-adto sa Zion, ug sila nga may kahigayonan nga makaadto sa Zion—
25 Padad-a sila og usa ka sertipiko ngadto sa bishop gikan sa tulo ka elder sa simbahan, o usa ka sertipiko gikan sa bishop;
26 Kay kondili, siya nga moadto sa yuta sa Zion dili pagaisipon nga usa ka maalamon nga tinugyanan. Kini usa usab ka sumbanan. Amen.