1 Ճշմարիտ, ճշմարիտ ասում եմ ձեզ, Ես, որ խոսում եմ, նույնիսկ իմ Հոգու ձայնով, այսինքն՝ Ալֆան ու Օմեգան՝ ձեր Տերն ու ձեր Աստվածը,–

2 Ականջ դրեք, ո՜վ դուք, որ տվել եք ձեր անունները, որպեսզի առաջ գնաք՝ հռչակելու իմ ավետարանը և էտելու իմ այգին:

3 Ահա, ես ասում եմ ձեզ, որ իմ կամքն է, որ դուք առաջ գնաք և չհապաղեք, ոչ էլ ծուլանաք, այլ աշխատեք ձեր զորությամբ,–

4 Բարձրացնելով ձեր ձայնը, ինչպես փողի հնչյուն, հռչակելով ճշմարտությունը՝ համաձայն հայտնությունների և պատվիրանների, որոնք ես տվել եմ ձեզ:

5 Եվ այսպես, եթե դուք հավատարիմ եք, դուք բեռնված կլինեք շատ որաներով, և պսակված՝ պատվով, փառքով, անմահությամբ և հավերժական կյանքով:

6 Հետևաբար, ճշմարիտ ասում եմ իմ ծառա Վիլյամ Ի. Մակլելլինին, որ ես ետ եմ վերցնում այն հանձնարարությունը, որը տվել էի նրան՝ գնալու արևելյան շրջանները.

7 Եվ ես տալիս եմ նրան նոր հանձնարարություն և նոր պատվիրան, որով ես՝ Տերս, խրատում եմ նրան իր սրտի տրտունջների համար.

8 Եվ նա մեղանչել է. այնուամենայնիվ, ես ներում եմ նրան, և կրկին ասում եմ նրան. Գնա՛ հարավային շրջանները:

9 Եվ թող իմ ծառա Լյուկ Ջոնսոնը նրա հետ գնա և հռչակի այն բաները, որոնք պատվիրել եմ նրանց,–

10 Կանչելով Տիրոջ անունը՝ Մխիթարիչի համար, որը նրանց կուսուցանի բոլոր բաները, որոնք նպատակահարմար են նրանց համար,–

11 Միշտ աղոթելով, որպեսզի չթուլանան. և որքան որ նրանք անեն դա, ես նրանց հետ կլինեմ, նույնիսկ մինչև վերջ:

12 Ահա, սա է Տիրոջ՝ ձեր Աստծո կամքը ձեր վերաբերյալ: Ճիշտ այդպես: Ամեն:

13 Եվ բացի այդ, ճշմարիտ այսպես է ասում Տերը. Թող իմ ծառա Օրսոն Հայդը և իմ ծառա Սեմյուել Հ. Սմիթը ճամփա ընկնեն դեպի արևելյան շրջանները և հռչակեն այն բաները, որոնք պատվիրեցի նրանց. և որքան որ նրանք հավատարիմ են, ահա, ես նրանց հետ կլինեմ, նույնիսկ մինչև վերջ:

14 Եվ բացի այդ, ես ասում եմ իմ ծառա Լայման Ջոնսոնին և իմ ծառա Օրսոն Պրատին, որ նրանք ևս պետք է ճամփա ընկնեն դեպի արևելյան շրջանները. և ահա, տե՛ս, ես նաև նրանց հետ եմ, նույնիսկ մինչև վերջ:

15 Եվ բացի այդ, ես ասում եմ իմ ծառա Ասա Դոդզին և իմ ծառա Կալվուս Վիլսոնին, որ նրանք ևս պետք է ճամփա ընկնեն դեպի արևմտյան շրջանները, և հռչակեն իմ ավետարանը, ճիշտ ինչպես ես պատվիրել եմ նրանց:

16 Եվ նա, ով հավատարիմ է, կհաղթահարի բոլոր բաները և կբարձրացվի վերջին օրը:

17 Եվ բացի այդ, ես ասում եմ իմ ծառա Մեյջոր Ն. Էշլիին և իմ ծառա Բուր Ռիգզին. Թող նրանք ևս ճամփա ընկնեն դեպի հարավային շրջան:

18 Այո, թող նրանք բոլորը ճամփա ընկնեն, ինչպես պատվիրել եմ նրանց, գնալով տնից տուն, գյուղից գյուղ, քաղաքից քաղաք:

19 Եվ, ո՛ր տուն որ մտնեք, և նրանք ընդունեն ձեզ, թողեք ձեր օրհնություններն այդ տան վրա:

20 Եվ, ո՛ր տուն որ մտնեք, և նրանք չընդունեն ձեզ, դուք պետք է շտապ հեռանաք այդ տնից, և թոթափեք ձեր ոտքերի փոշին, որպես վկայություն նրանց դեմ:

21 Եվ դուք լցված պիտի լինեք ուրախությամբ ու ցնծությամբ. և իմացեք, որ դատաստանի օրը դուք պիտի լինեք այդ տան դատավորները և դատապարտեք նրանց.

22 Եվ հեթանոսների համար ավելի հեշտ կլինի դատաստանի օրը, քան այդ տան համար. հետևաբար, գոտեպնդեք ձեր մեջքը և հավատարիմ եղեք, և դուք կհաղթահարեք բոլոր բաները և կբարձրացվեք վերջին օրը: Ճիշտ այդպես: Ամեն:

23 Եվ բացի այդ, այսպես է ասում ձեզ Տերը, ո՜վ դուք, իմ եկեղեցո՛ւ երեցներ, որ տվել եք ձեր անունները, որ կարողանաք իմանալ նրա կամքը ձեր վերաբերյալ,–

24 Ահա, ասում եմ ձեզ, որ դա եկեղեցու պարտականությունն է՝ աջակցությամբ օժանդակել նրանց ընտանիքներին, և նաև աջակցել նրանց ընտանիքներին, ովքեր կանչվել են և անպայման պետք է ուղարկվեն աշխարհ՝ հռչակելու ավետարանն աշխարհին:

25 Ուստի, ես՝ Տերս, տալիս եմ ձեզ այս պատվիրանը, որ դուք տեղ գտնեք ձեր ընտանիքի համար, որքան որ ձեր եղբայրները կկամենան բացել իրենց սրտերը:

26 Եվ թող բոլոր նրանք, ովքեր կարող են տեղ գտնել իրենց ընտանիքների համար և եկեղեցու աջակցությունը՝ նրանց համար, չհապաղեն գնալ աշխարհ, լինի դեպի արևելք, թե դեպի արևմուտք, դեպի հյուսիս, թե դեպի հարավ:

27 Թող նրանք խնդրեն և կստանան, թակեն և նրանց կբացվի, և հայտնի կդարձվի բարձրից, նույնիսկ Մխիթարիչի միջոցով, թե ուր պիտի նրանք գնան:

28 Եվ բացի այդ, ճշմարիտ ասում եմ ձեզ, որ ամեն տղամարդ, ով պարտավոր է ապահովել իր սեփական ընտանիքը, թող ապահովի այն, և ոչ մի դեպքում նա չի կորցնի իր պսակը. և թող նա ծառայի եկեղեցում:

29 Թող ամեն մարդ ջանասեր լինի բոլոր բաներում: Իսկ ծույլը տեղ չպիտի ունենա եկեղեցում, եթե չապաշխարի և չուղղի իր ճանապարհները:

30 Ուստի, թող իմ ծառա Սիմեոն Քարտերը և իմ ծառա Էմեր Հարրիսը միանան ծառայության մեջ.

31 Եվ նաև իմ ծառա Էզրա Թայրը և իմ ծառա Թոմաս Բ. Մարշը.

32 Նաև իմ ծառա Հայրում Սմիթը և իմ ծառա Ռեյնոլդս Քահունը.

33 Եվ նաև իմ ծառա Դանիել Ստանտոնը և իմ ծառա Սիմուր Բրունսոնը.

34 Եվ նաև իմ ծառա Սիլվեստեր Սմիթը և իմ ծառա Գեդեոն Քարտերը.

35 Եվ նաև իմ ծառա Ռագլես Իմեսը և իմ ծառա Ստեփան Բարնեթը.

36 Եվ նաև իմ ծառա Միքիա Բ. Վելթոնը և նաև իմ ծառա Իդեն Սմիթը: Ճիշտ այդպես: Ամեն: