1 O Ɔsorsor, hom ntsie, O asaase, hom nyɛ aso, hom nyɛ aso, na hom a hom wɔ do nyina no ndzi dɛw, na Ewuradze nye Nyame, na Agyenkwa biara nnyi hɔ kã no ho.

2 Ne nyansaa sõ, na n’akwan yɛ ahobow, na obiara runnhu no ndwuma mbrɛ n’ano kɔsõ.

3 Ne tsirmpɔw annyɛ gyan da, na obiara so nnyi hɔ a obotum esianka ne nsa.

4 Ofi mbersantsen kesi mbersantsen no ɔtse dɛmara, na ne mfe nnsã da.

5 Na dɛm na Ewuradze se—emi, Ewuradze mowɔ ehumbɔbɔr na medze adom ma hɔn a wosuro me, na ɔyɛ me enyigye dɛ medze enyimnyam bɛma hɔn a wɔsom me wɔ tseneneeyɛ nye nokwar mu dze kɔ ewiei.

6 Hɔn akatua bɛyɛ kɛse na onnyiewiei bɛyɛ hɔn enyimnyam.

7 Na hɔn na mibeyi m’esumasɛm akyerɛ, nyew, m’ahendzi ho esumasɛm nyina a ehuntsa fi tsetseberdo, nye mfesantsen a ɔreba no, na mebɛma woehu ndzepa a ɔwɔ me pɛ ho a ɔfa ndzɛmba nyina a ɔwɔ m’ahenman mu no.

8 Nyew, mbersantsen anwanwadze mpo na wobohu, na ndzɛmba a obesi no na mebɛkyerɛ hɔn, ebusuasantsen pii ho ndzɛmba no mpo.

9 Na hɔn nyansaa bɛyɛ kɛse, na hɔn ntseasee bodu sor; na hɔn enyim na enyansafo hɔn nyansaa bɛhera, na abadwembafo hɔn ntseasee bɛyɛ kwa.

10 Na menam mo Sunsum do bobue hɔn adwen mu, na menam mo tum do bɛma woehu me pɛ mu esumasɛm—nyew, ndzɛmba a enyiwa mpo nnhunii, na asowa so nntsee, na onnyae nnhɛɛn nyimpa n’akoma mu.

11 Hɛn, Joseph Smith, Kakraba, na Sidney Rigdon a Kwakwar ne da a otsĩa duesia mu, wɔ hɛn Ewuradze n’afe apem, ahaawɔtwe eduasa ebien mu a nna yɛwɔ Sunsum mu no—

12 Wɔnam Sunsum no tum do ebue hɛn enyiwa na wobuee hɛn ntseasee, ama yeehu na yaatse Nyame ne ndzɛmba ase—

13 Dɛm ndzɛmba no a ɔwɔ hɔ fi ahyɛse no ansaana wɔrobɔ wiadze no, dza Egya no nam ne Ba a Wɔwoo no Kortoo no no a ɔda no bo mu hyehyɛe fi ahyɛse no mpo;

14 Ɔno na yɛgye no ho dase; na dase a yɛgye no nye Jesus Christ n’asɛmpa ne mãhyɛ no, a ɔyɛ Ɔba no, nyia yehun no na yɛnye no kasae wɔ sor enyido-adzehu mu no.

15 Na ber a yɛrekyerɛ ndzɛmba no ase, dɛ mbrɛ Ewuradze ase hɛn dɛ yɛnyɛ no, yebodur John asɛmpa, tsir enum ne nkyekyɛmu eduonu akron no a oyii kyerɛɛ no na odzi do yi—

16 Dza ɔkã owusoɛr ho asɛm no, ɔfa hɔn a wɔbɛtse Nyimpa Ba ne ndze, na wɔasoɛr ho no,

17 Na wobefir edzi hɔn a wɔayɛ papa no akɔ atseneneefo wusoɛr mu, na hɔn a wɔyɛɛ bɔn no akɔ afɔdzi wusoɛr mu.

18 Na iyi maa hɛn ho boow hɛn, osiandɛ Sunsum no na oyii kyerɛɛ hɛn.

19 Na ber a yɛrodwendwen dɛm ndzɛmba yinom ho no, Ewuradze dze ne nsa kãa hɛn ntseasee enyi ma obuee, na Ewuradze n’enyimnyam hyerɛnee twaa hɛn ho hyiae.

20 Na yehun Ɔba no a ɔtse Egya n’abanyimfa no n’enyimnyam na yenyaa ne mãhyɛ no;

21 Na yehun abɔfo krɔnkrɔn nye hɔn a wɔatsew hɔn ho no wɔ ahengua no enyim, na wɔrosom Nyame na Eguambaa no, hɔn na wɔsom no afebɔɔ kesi afebɔɔ.

22 Na afei, dasegye pii a wɔdze ama wɔ no ho no, iyi nye dasegye a odzi ekyir koraa, yɛgye dase wɔ no ho dɛ: Ɔtse ase!

23 Osiandɛ yehun no, dɛ ɔwɔ Nyame n’abanyimfa; na yɛtsee ndze a ɔregye dase dɛ ɔno nye Egya ne Ba a Wɔwoo no Kortoo no—

24 Na wɔnam no do, na wɔnam no mu, na ɔnoara so na ɔbɔɔ wiadze, na hɔn a wɔtse do nyina wɔwoo hɔn Nyame ne mbabanyin na mbabaa.

25 Na yehun iyi so, na yɛgye ho dase, dɛ ɔbɔfo a nna wɔdze tum ahyɛ ne nsa wɔ Nyankopɔn n’enyim, na ɔtseew Ɔba a Wɔwoo no Kortoo no no a Egya dɔ no, na ɔda Egya no bo mu no do etua no, wɔtoow no fii sor kyeen asaase do fii Egya na Ɔba no hɔn enyim.

26 Na wɔfrɛɛ no Ɔsɛɛfo, osiandɛ ɔsor sũi guu no do—Ɔno nye Lucifer, anapa ba no.

27 Na yehunii, na hwɛ, ɔahwe ase! ɔahwe ase, anapa ba no mpo no!

28 Na ber a yɛda ho wɔ Sunsum mu no, Ewuradze hyɛɛ hɛn dɛ yɛnkyerɛw enyido-adzehu no; na yehun Satan, abowatsena dadaw no, abɔnsam no mpo a, nyia ɔtseew etua wɔ Nyankopɔn do no, na ɔpɛɛ dɛ ɔgye hɛn Nyankopɔn nye ne Christ hɔn Ahenman no.

29 Dɛm ntsi, ɔnye Nyankopɔn n’ahotseweefo kõe na otwaa hɔn ho hyiae.

30 Na yenyaa enyido-adzehu a ɔfa hɔn a ɔnye hɔn kõe na odzii hɔn do konyim no hɔn amandzehu ho, na dɛm na Ewuradze ne ndze baa hɛn nkyɛn;

31 Dɛm na Ewuradze se, hɔn a wonyim mo tum, na woenya kyɛfa wɔ mu da, na wɔama hɔnho kwan ma abɔnsam nam no tum do edzi hɔn do konyim, na wɔpow nokwar no, na wogu mo tum ho fĩ no—

32 Hɔn nye ɔsɛɛ mbabanyin no a mese hom dɛ nkyɛ obeye ama hɔn dɛ wɔannwo hɔn koraa no;

33 Na hɔn nye ebufuw nkuraba no a wɔ nye abɔnsam na n’abɔfoe, wɔadom hɔn dɛ wonhu amandze wɔ Nyankopɔn n’ebufuhyew mu nkɔ mbersantsen mu;

34 Ɔfa dɛm nkorɔfo yinom dze, bɔnfakyɛ nnyi hɔ ma hɔn wɔ wiadze yi mu anaadɛ wiadze a ɔreba no mu—

35 Susuampaara dɛ hɔn nsa kãa Sunsum krɔnkrɔn no, na wɔpowee, na wɔpoow Egya ne Ba a Wɔwoo no Kortoo no no, na wɔabɔ no mbeamudua mu dze ama hɔnho na wɔhyɛ no bagua mu fɛr.

36 Dɛm nkorɔfo yinom nye hɔn a wɔnye abɔnsam na n’abɔfoe bɔkɔ ogya baka na brimstone no mu—

37 Na hɔn nko na owu mprɛnu no benya hɔn do tum;

38 Nyew, nokwar, hɔn nko na wɔasɔw n’ebufuhyew ho amandzehu ekyir no wɔremmpon hɔn wɔ Ewuradze noara ne mber do no.

39 Na hɔn a wɔaka nyinara no, wɔnam Eguambaa a wokum no, na ɔda Egya no bo mu ansaana wɔrobɔ wiadze no no konyimdzi na n’enyimnyam mu dze hɔn bɛba wusoɛr mu.

40 Na iyi nye asɛmpa no, enyigyesɛm no a ndze a ofi ɔsorsor gyee ho dase kyerɛɛ hɛn no.

41 Na ɔbaa wiadze, Jesus no mpo, ama wɔaabɔ no mbeamudua mu dze ama wiadze, na ɔaasoa wiadze bɔn, na ɔaatsew wiadze ho, na ɔaatsew ho efi dza ɔnntsen nyina ho;

42 Ama wɔnam no do aagye obiara nkwa, hɔn a Egya yɛɛ hɔn na ɔdze hɔn ahyɛ no tum mu no;

43 Nyia ɔhyɛ Egya no enyimnyam, na ɔgye ne nsaano ndwuma nyina nkwa, gyedɛ ɔsɛɛ mbambanyin no a Egya no yii Ɔba no kyerɛe ekyir no wɔpoow no no nko.

44 Dɛm ntsi, ɔgye hɔn nyinara nkwa gyedɛ hɔn nko—Wɔbɔkɔ ntsẽa a ɔwɔ hɔ daapem mu, dza ɔyɛ ntsẽa onnyi ewiei no, ɔyɛ onnyiewiei ntsẽa no na wɔnye abɔnsam na n’abɔfoe bedzi hen mbersantsen no, hɔ na hɔn abowaba nnwu da, na ogya no so nndum da, iyi nye hɔn ahohyehye—

45 Na dɛm bea no, nye n’ewiei, nye hɔn ahohyehye no dze, ɔdasanyi biara nnyim;

46 Na woennyi annkyerɛ, nna wonnyii nnkyerɛe, nna worinnyi nnkyerɛ ɔdasanyi biara, gyedɛ hɔn a wɔama hɔn mu kyɛfa no nko.

47 Naaso, emi Ewuradze, mudua enyido-adzehu do yi kyerɛ dodowara na motow mu bio ntsɛmara.

48 Dɛm ntsi, n’ewiei, ne tɛtɛr, no krɔn, no bun, na no mu nkukuhwease dze, wɔnntse ase, nna ɔdasanyi biara so renntse ase, gyedɛ hɔn a wɔahyehyɛ hɔn akɔ dɛm afɔbu no mu no nko.

49 Na yɛtsee dɛ ndze no rekã dɛ: Kyerɛw enyido-adzehu no, na hwɛ, na iyi nye enyido-adzehu a ɔfa ndzebɔnyɛfo hɔn amandzehu ho no n’ewiei.

50 Na bio, yɛgye dase wɔ ho—osiandɛ yehunii na yɛtsee, na iyi nye Christ n’asɛmpa ho dasegye a ɔfa hɔn a wɔbɔsoɛr wɔ atseneneefo wusoɛr no mu—

51 Hɔn nye nkorɔfo a wonyaa Jesus ho dasegye, na wɔgyee ne dzin dzii na wonumaa hɔn wɔ ne nsiei saso mu, wɔnye hɔn hyɛɛ nsu mu wɔ ne dzin mu, na iyi tse dɛm, dɛ mbrɛ ne mbrasɛm a ɔdze ama no tse—

52 Dɛ sɛ wodzi mbrasɛm no do a wɔbɔhohor hɔn ho na wɔatsew hɔnho efi hɔn bɔn nyina ho, na nyia wɔahyɛ no sɔfo na wɔasɔw ano ama dɛm tum yi no dze ne nsa bogu hɔn do ma woeenya Sunsum Krɔnkrɔn no;

53 Na wɔdze gyedzi dzi konyim, na anohoba Sunsum Krɔnkrɔn no a Egya no hue gu hɔn a wodzi pɛrpɛr na nokwar nyina hɔn do no sɔɔw hɔn ano.

54 Hɔn nye Abakamba n’asɔr no.

55 Hɔn nye nkorɔfo a Egya no dze ndzɛmba nyina ahyɛ hɔn nsa mu.

56 Hɔn nye nkorɔfo a wɔyɛ asɔfo na ahemfo, hɔn na wɔagye ne mãhyɛ, na n’enyimnyam no;

57 Na wɔyɛ Ɔsorsornyi no n’asɔfoe wɔ Melchizedek nhyehyɛɛ do, nyia ɔwɔ Enoch nhyehyɛɛ do, nyia ɔwɔ Ɔba a Wɔwoo no Kortoo no nhyehyɛɛ no.

58 Dɛm ntsi, dɛ mbrɛ wɔakyerɛw no, wɔyɛ enyame, Nyankopɔn ne mbabanyin no mpo.

59 Dɛm ntsi, ndzɛmba nyina yɛ hɔndze, dɛ nkwa anaa owu, anaa ndzɛmba a ɔwɔ hɔ sesei, anaa ndzɛmba a ɔbɛba, ne nyina yɛ hɔndze, na wɔyɛ Christ dze, na Christ so yɛ Nyankopɔn dze.

60 Na wobedzi ndzɛmba nyina do konyim.

61 Dɛm ntsi, mma ɔdasanyi biara nnhyɛ noho enyimnyam wɔ nyimpa mu, mbom ɔnhyɛ noho enyimnyam wɔ Nyame mu, nyia ɔdze atamfo nyina bɛhyɛ n’ananadze no.

62 Woyinom na wɔbɛtsena Nyame nye ne Christ no hɔn enyim afebɔɔ kesi afebɔɔ.

63 Woyinom nye hɔn a sɛ ɔnam fua mu reba ebedzi hen wɔ no nkorɔfo do wɔ asaase do a, ɔnye hɔn bɛba.

64 Woyinom nye hɔn a wobenya kyɛfa wɔ owusoɛr a odzi kan no mu.

65 Woyinom nye hɔn a wɔbɔsoɛr wɔ atseneneefo wusoɛr no mu.

66 Woyinom nye hɔn a wɔaba Bepɔw Zion do, na wɔaba Nyame tseasefo no kuropɔn mu no, ɔsor bea no a ɔyɛ krɔnkrɔn mu krɔnkrɔn no.

67 Woyinom nye hɔn a wɔafora abɔfokuw mpempem no mu aba ɔdodow nhyiamu no ase, nye Enoch n’asɔr mu, nye Abakamba dze no mu.

68 Woyinom nye hɔn a wɔakyerɛw hɔn edzin wɔ sor, bea a Nyankopɔn na Christ yɛ adze nyina do ɔtsɛmbuafo no.

69 Woyinom nye hɔn a wɔtsen a wɔnam Jesus a ɔyɛ ahyɛmu fofor mu ntamugyinafo no do woedzi mu no, ɔno nankasa no bɔgyaa a okyii dze bɔɔ werdam a odzi mu no.

70 Woyinom nye hɔn a hɔn nyimpadua yɛ dɛ celestial dze no, hɔn a hɔn enyimnyam tse dɛ ewia, yɛ Nyame n’enyimnyam mpo a ɔkrɔn ɔkyɛn adze nyina no, nyia n’enyimnyam wɔakyerɛw dɛ ɔtse dɛ wimu ewia no.

71 Na bio, yehun terrestrial wiadze no, na hwɛ, na hu woyinom nye hɔn a wɔyɛ terrestrial dze no, hɔn a hɔn enyimnyam nntse dɛ Abakamba n’asɔr mu mba no a woenya Egya ne mãhyɛ no, tse dɛ mbrɛ soronko da bosoom na ewia ntamu no mpo.

72 Hwɛ, woyinom nye hɔn a wokwetsii mbra biara na wowui no;

73 Nye hɔn so a wɔyɛ nyimpa esunsum a wɔdze hɔn egu efiadze no a Ɔba no kɛseraa hɔn, na ɔkãa asɛmpa no kyerɛɛ hɔn no, ama woeebu hɔn atsɛn tse dɛ nyimpa a wɔwɔ honam mu;

74 Hɔn na woennya Jesus no ho dasegye ber a wɔwɔ honam mu no na mbom nkyii wonyae no.

75 Woyinom nye hɔn a nna wɔyɛ enyimdzefo wɔ asaase do a ndabrabafo furaa hɔn enyi no.

76 Woyinom nye hɔn a wonya n’enyimyam no na mbom nnyɛ ne mãhyɛ no.

77 Woyinom nye hɔn a wonya Ɔba no ne nkyɛn kwan no, na mbom nnyɛ Egya no ne mãhyɛ.

78 Dɛm ntsi, hɔn nyimpadua yɛ terrestrial dze, na nnyɛ celestial nyimpadua, na soronko da hɔn enyimnyam no ntamu tse dɛ mbrɛ soronko da bosoom na ewia ntamu no.

79 Woyinom nye hɔn a hɔn dasegye a ɔwɔ Jesus ho no nnyɛ dzen; dɛm ntsi, woennya Nyankopɔn n’ahenman mu ahenkyɛw no.

80 Na afei, iyi nye enyido-adzehu a yehunii wɔ terrestrial no ho no n’ewiei, dza Ewuradze hyɛɛ hɛn dɛ yɛnkyerɛw wɔ ber a nna yɛda ho wɔ sunsum mu no.

81 Na bio, yehun telestial n’enyimnyam no, na dɛm enyimnyam no yɛ ketseaba, dɛ mbrɛ soronko da nworaba enyimnyam nye bosoom n’enyimnyam mu wɔ wimu no, dɛmara na no so tse.

82 Woyinom nye hɔn a woennya Christ n’asɛmpa no, nye Jesus ho dasegye no.

83 Woyinom nye hɔn a wɔammpow Sunsum Krɔnkrɔn no.

84 Woyinom nye hɔn a wɔatow hɔn egu hɛl.

85 Woyinom nye hɔn a wɔrennpon hɔn mmfi abɔnsam hɔ, gyedɛ owusoɛr a odzi ewiei no mu, kesi dɛ Ewuradze, Christ Eguambaa no mpo, bowie n’edwuma yɛ.

86 Woyinom nye hɔn a woennya ne mãhyɛ wɔ onnyiewiei wiadze no mu, na mbom wɔnam terrestrialfo no hɔn som do benya Sunsum Krɔnkrɔn no;

87 Na terrestrialfo no so nam celestialfo no hɔn som do.

88 Na telestialfo no so nam abɔfo hɔn dwuma a wɔdze ahyɛ hɔn nsa dɛ wɔnnsom hɔn no do benya, anaadɛ hɔn a wɔahyɛ hɔn dɛ wɔnyɛ esunsum mu asomfo mma hɔn no; na hɔn so wɔbɛyɛ nkwagye n’adzedzifo.

89 Na dɛm na yehunii wɔ ɔsor enyido-adzehu no mu, telestial n’enyimnyam no, na ɔbor ntseasee nyina do;

90 Na ɔdasanyi biara nnyim gyedɛ nyia Nyame beyi akyerɛ no.

91 Na dɛm na yehun terrestrial n’enyimnyam no a ɔbɔ telestial ho ndzɛmba nyina n’enyimnyam do, wɔ enyimnyam nye tum nyina mu mpo, wɔ ahoɔdzen na ahendzi mu.

92 Na dɛm na yehun celestial n’enyimnyam no a ɔbɔ ndzɛmba nyina do no—bea a Nyankopɔn, Egya no mpo, tse dzi hen wɔ n’ahengua do afebɔɔ kesi afebɔɔ;

93 N’ahengua enyim na ndzɛmba nyina bɔ hɔn mu adze ahobrɛadze na enyidzi mu, na wɔhyɛ no enyimnyam afebɔɔ kesi afebɔɔ.

94 Hɔn a wɔtse n’enyim nye Abakamba n’asɔr mu mba; na wohu dɛ mbrɛ wohu hɔn, na wonyim dɛ mbrɛ wonyim hɔn, a woeenya ne mãhyɛ nye n’adom no;

95 Na ɔayɛ hɔn pɛr wɔ tum, nye ahoɔdzen, nye ahendzi mu.

96 Na celestial n’enyimnyam no yɛ kor, dɛ mbrɛ ewia so n’enyimnyam yɛ kor no.

97 Na terrestrial n’enyimnyam no yɛ kor, dɛ mbrɛ bosoom so n’enyimnyam yɛ kor.

98 Na telestial n’enyimnyam no yɛ kor, dɛ mbrɛ nworaba so hɔn enyimnyam yɛ kor no; na dɛ mbrɛ soronko da woraba kor nye kor ntamu wɔ enyimnyam mu no, dɛmara so na soronko da kor na kor ntamu wɔ enyimnyam mu wɔ telestial wiadze no mu;

99 Na woyinom nye hɔn a wɔyɛ Paul, na Appollos nye Cephas dze.

100 Woyinom nye hɔn a wɔkã dɛ hɔn mu binom yɛ oyi nedze na binom so yɛ oyi nedze no—binom yɛ Christ dze, na binom yɛ John dze, na binom so yɛ Moses dze, na binom so yɛ Elias dze, na binom so yɛ Esiaias dze, na binom so yɛ Isaiah dze, na binom so yɛ Enoch dze;

101 Mbom woennya asɛmpa no, nna woennya Jesus anaa nkɔnhyɛfo no ho dasegye, anaa ahyɛmu a ɔwɔ hɔ daapem no.

102 Ewiei no, woyinom nye hɔn a wɔrennkan hɔn mmfora ahotseweefo no ma wonnhwim hɔn mmfa nsuwusiw mu nntu nnkehyia Abakamba n’asɔr no mu.

103 Woyinom nye hɔn a wɔyɛ atorfo, na nkaberkyerfo, awartofo, na ndwaman, nye obiara a ɔpɛ na odzi ator.

104 Woyinom nye hɔn a wohu amandze wɔ Nyame n’ebufuw ano wɔ asaase do.

105 Woyinom nye hɔn a wohu amandze wɔ onnyiewiei awerdzi ogya no mu.

106 Woyinom nye hɔn a wɔtow hɔn gu hɛl na wohu amandze wɔ Otumfo Nyankopɔn n’ebufuw ano, kodu mber ne mãhyɛ, ber a Christ dze n’atamfo nyina bɛhyɛ n’ananadze na ɔama n’edwuma edzi mu.

107 Ber a obegyaa ahenman no mu na ɔdze ama Egya no, dɛ nkekãa nnyi ho, na ɔase dɛ; medzi konyim na monko na mitsiatsiaa wenyintwer no do no, Otumfo Nyankopɔn n’ebufuhyew wenyintwer a ɔyɛ hu no mpo.

108 Afei na wɔdze enyimnyam ahenkyɛw no bɔsoa no, ma ɔaatsena no tum ahengua no do edzi hen afebɔɔ kesi afebɔɔ.

109 Mbom hwɛ, na hu, yehun telestial wiadze n’enyimnyam no nye hɔn a wɔwɔ mu no, na hɔn dodow tse dɛ sor nworaba anaadɛ mpoano anhwea;

110 Na yɛtsee Ewuradze ndze dɛ ɔrese dɛ: Woyinom nyina bɔbɔ hɔn mu adze, na tɛkyerɛma nyina bɛkã hɔn bɔn akyerɛ nyia ɔtse ahengua do afebɔɔ kesi afebɔɔ.

111 Na wobobu hɔn atsɛn dɛ mbrɛ hɔn ndwuma tse, na mbrɛ ɔdasanyi biara no ndwuma tse no na ɔbɛkyerɛ ne tsenabew a obenya wɔ efi a woesiesie no mu;

112 Na wɔbɛyɛ Ɔsorsornyi no no nkowaa; mbom bea a Nyankopɔn na Christ tse no dze, wonnkotum akɔ hɔ mbersantsen mfesantsen nyina mu.

113 Iyi nye enyido-adzehu a yehunii no n’ewiei, ɔno na wɔhyɛɛ hɛn dɛ yɛnkyerɛw ber a yɛda ho wɔ Sunsum mu no.

114 Mbom Ewuradze no ndwuma sõ na ɔyɛ ahobow, na n’ahenman no mu esumasɛm no a oyii kyerɛɛ hɛn no, bor ntseasee nyina a ɔwɔ enyimnyam, tum, nye ahendzi mu do.

115 A ɔhyɛɛ hɛn dɛ mma yɛnnkyerɛw wɔ ber a yɛda ho wɔ Sunsum mu no, na nyimpa nnyi ho kwan dɛ ɔkã;

116 Na nyimpa so nnkotum ada no edzi, osiandɛ wɔnam Sunsum Krɔnkrɔn no tum no a Nyankopɔn dze ma hɔn a wɔdɔ no no, na wɔtsew hɔnho wɔ n’enyim no nko do na wɔdze bohu na wɔatse ase;

117 Hɔn na ɔma hɔn ho ndzinoa ma wohu na wɔtse ase dze ma hɔnankasa hɔnho;

118 Ama ber a wɔwɔ honam mu yi, wɔnam Sunsum no tum nye edziyi do eetum egyina n’enyim wɔ enyimnyam wiadze no mu.

119 Na enyimnyam, na enyidzi, na ahendzi nyɛ Nyankopɔn na Eguambaa no hɔndze afebɔɔ kesi afebɔɔ. Amen.