Seksiyon 78
Pagpadayag nga gihatag pinaagi ni Joseph Smith ang Propeta, sa Kirtland, Ohio, Marso 1, 1832. Nianang adlawa, ang Propeta ug ang ubang mga pangulo nagtigom aron sa paghisgot sa mga buluhaton sa Simbahan. Kini nga pagpadayag sa orihinal nagsugo sa Propeta, ni Sidney Rigdon, ug ni Newel K. Whitney sa pagbiyahe ngadto sa Missouri ug sa pag-organisar sa patigayon ug sa mga buluhaton sa pagmantala sa Simbahan pinaagi sa paghimo og usa ka “pundok” nga maoy modumala niini nga mga paningkamot, magtigom og pundo alang sa pagtukod sa Zion ug sa kaayohan sa mga kabos. Kini nga pundok, nailhan nga Hiniusa nga Pundok, naorganisar niadtong Abril 1832 ug gihunong niadtong 1834 (tan-awa sa seksiyon 82). Sa panahon human sa pagkabungkag niini, ubos sa pagdumala ni Joseph Smith, ang pulong nga “mga kalihokan sa balay tipiganan alang sa mga kabos” giilisan og “patigayon ug mga establisamento sa mga mantalaan” diha sa pagpadayag, ug ang pulong nga “kapunongan” gipuli sa pulong nga “pundok.”
1–4, Ang mga Santos kinahanglan magtukod ug mopahimutang og usa ka balay tipiganan; 5–12, Ang maalamon nga paggamit sa ilang mga kabtangan magsilbing agianan ngadto sa kaluwasan; 13–14, Ang Simbahan kinahanglang gawasnon sa yutan-ong mga gahom; 15–16, Si Miguel (Adan) nag-alagad ubos sa kamandoan sa Usa nga Balaan (Kristo); 17–22, Bulahan ang mga matinud-anon, kay makapanunod sila sa tanang butang.
1 Namulong ang Ginoo kang Joseph Smith, Jun., nga nag-ingon: Patalinghog kanako, miingon ang Ginoo nga inyong Dios, kinsa na-orden ngadto sa halangdon nga pagkapari sa akong simbahan, kinsa nagpundok sa inyong kaugalingon;
2 Ug paminawa ang iyang tambag kinsa mi-orden kaninyo gikan sa kahitas-an, nga mamulong diha sa inyong mga dalunggan og mga pulong sa kaalam, aron maluwas kamo niana nga butang nga inyong gipakita sa akong atubangan, miingon ang Ginoong Dios.
3 Sa pagkatinuod sultihan ko kamo, nga miabot na ang panahon, ug karon haduol na; ug tan-awa, ug sud-onga, kinahanglan nga adunay organisasyon sa akong katawhan, sa pagpatuman ug sa pagpahimutang sa mga kalihokan sa balay tipiganan alang sa mga kabos sa akong katawhan, dinhi niini nga dapit ug diha sa yuta sa Zion—
4 Alang sa permanente ug walay kataposang katukoran ug kapunongan sa akong simbahan, sa pagpadayon sa katuyoan, nga inyong gilambigit, sa kaluwasan sa tawo, ug sa himaya sa inyong Amahan nga anaa sa langit;
5 Nga kamo mahimong patas sa mga gipondo nga langitnong mga butang, oo, ug sa yutan-ong mga butang usab, aron makabaton sa langitnong mga butang.
6 Kay kon kamo dili patas sa yutan-ong mga butang dili kamo mahimong patas sa pagbaton sa langitnong mga butang;
7 Kay kon gusto ninyo nga hatagan ko kamo og usa ka dapit diha sa celestial nga kalibotan, kinahanglan nga andamon ninyo ang inyong kaugalingon pinaagi sa pagbuhat sa mga butang nga akong gisugo ug gikinahanglan gikan kaninyo.
8 Ug karon, sa pagkatinuod miingon ang Ginoo, angay nga kining tanan nga butang pagahimoon alang sa akong himaya, pinaagi kaninyo nga nagkahiusa dinhi niini nga kapunongan;
9 O, sa laing pagkasulti, tugoti nga si Newel K. Whitney ug ang akong sulugoon nga si Joseph Smith, Jun., ug ang akong sulugoon nga si Sidney Rigdon molingkod diha sa konseho uban sa mga santos nga anaa sa Zion;
10 Kay kondili, maninguha si Satanas nga malayo ang ilang mga kasingkasing gikan sa kamatuoran, aron mabutaan sila ug dili makasabot sa mga butang nga giandam alang nila.
11 Mao nga, usa ka sugo ang ihatag nako kaninyo, nga pangandam ug han-aya ang inyong mga kaugalingon pinaagi sa kasabotan o walay kataposang pakigsaad nga dili mahimong lapason.
12 Ug siya nga nakalapas niini mawad-an sa iyang katungdanan ug nahimutangan diha sa simbahan, ug itugyan ngadto sa mga pagkuso-kuso ni Satanas hangtod sa adlaw sa katubsanan.
13 Tan-awa, mao kini ang pagpangandam nga akong giandam kaninyo, ug ang katukoran, ug ang panig-ingnan nga akong ihatag kaninyo, nga niana inyong matuman ang mga sugo nga gihatag kaninyo;
14 Nga pinaagi sa akong pag-amuma, bisan pa sa kalisdanan nga moabot kaninyo, nga ang simbahan mobarog nga labaw kay sa tanang linalang ubos sa celestial nga kalibotan;
15 Nga makaangkon kamo sa korona nga giandam alang kaninyo, ug pagahimoong mga magmamando sa daghang gingharian, miingon ang Ginoong Dios, ang Usa nga Balaan sa Zion, nga mipahimutang sa mga katukoran sa Adam-ondi-Ahman;
16 Kinsa mipili ni Miguel ang inyong prinsipe, ug nagpahimutang sa iyang mga tiil, ug nagbutang kaniya sa itaas, ug gihatag ngadto kaniya ang mga yawe sa kaluwasan ubos sa tambag ug mando sa Usa nga Balaan, kinsa walay sinugdanan sa mga adlaw o kataposan sa kinabuhi.
17 Sa pagkatinuod, sa pagkatinuod, sultihan ko kamo, nga kamo gagmay pang mga bata, ug wala pa kamo makasabot kon unsa ka dako ang mga panalangin sa Amahan nga anaa sa iyang kaugalingong mga kamot ug giandam alang kaninyo;
18 Ug dili kamo makaagwanta sa tanang butang karon; bisan pa man, paglipay, kay giyahan ko kamo. Ang gingharian mainyo ug ang mga panalangin niana mainyo, ug ang mga katigayonan sa kahangtoran mainyo.
19 Ug siya nga modawat sa tanang butang uban sa kamapasalamaton himoong mahimayaon; ug ang mga butang niini nga yuta idugang ngadto kaniya, gani sa gatosan ka pilo-pilo, oo, labaw pa.
20 Mao nga, buhata ang mga butang nga akong gisugo kaninyo, miingon ang inyong Manunubos, gani ang Anak nga si Ahman, nga magaandam sa tanang butang sa dili pa siya mokuha kaninyo;
21 Kay kamo mao ang simbahan sa Unang Natawo, ug siya modala kaninyo sa taas sa panganod, ug mohatag sa matag tawo sa iyang bahin.
22 Ug siya nga matinud-anon ug maalamon nga tinugyanan makapanunod sa tanang butang. Amen.