Seksiyon 7
Pagpadayag nga gihatag ngadto nila nilang Joseph Smith ang Propeta ug Oliver Cowdery, didto sa Harmony, Pennsylvania, Abril 1829, sa diha nga nangutana sila pinaagi sa Urim ug Thummim kon si Juan, ang hinigugma nga tinun-an, nagpabilin ba nga buhi o namatay. Ang pagpadayag mao ang hinubad nga saysay sa talaan nga gisulat ni Juan ngadto sa maayo og kalidad nga papel ug siya mismo ang mitago niini.
1–3, Si Juan ang Hinigugma mabuhi hangtod ang Ginoo moabot; 4–8, Sila si Pedro, Santiago, ug Juan naghupot sa mga yawe sa ebanghelyo.
1 Ug ang Ginoo misulti ngari kanako: Juan, akong hinigugma, unsa ang imong gitinguha? Kay kon ikaw mangayo sa imong gusto, kini ihatag kanimo.
2 Ug misulti ako kaniya: Ginoo, ihatag ngari kanako ang gahom batok sa kamatayon, aron ako mabuhi ug modala og mga kalag nganha kanimo.
3 Ug ang Ginoo misulti kanako: Sa pagkatinuod, sa pagkatinuod, sultihan ko ikaw, tungod kay ikaw nagtinguha niini ikaw magpabilin hangtod ako moabot sa akong himaya, ug managna sa atubangan sa kanasoran, kaliwatan, mga pinulongan ug katawhan.
4 Ug tungod niini nga hinungdan gisultihan sa Ginoo si Pedro: Kon maoy akong pagbuot nga magpabilin siya hangtod sa akong pag-anhi, unsa may imong labot? Kay mihangyo siya kanako nga makadala unta siya og mga kalag ngari kanako, apan ikaw nagtinguha nga makaabot ikaw sa labing madali ngari kanako sa akong gingharian.
5 Sultihan ko ikaw, Pedro, maayo kini nga tinguha; apan ang akong hinigugma nagtinguha nga makahimo pa siya og dugang, o mas mahinungdanon nga buhat ngadto sa mga tawo kay sa unsay iyang nabuhat sa una.
6 Oo, nagtinguha siya og mas mahinungdanon nga buhat; busa himoon ko siyang sama sa nagdilaab nga kalayo ug tigpangalagad nga anghel; mangalagad siya alang niadtong mamahimong manununod sa kaluwasan kinsa nagpuyo sa yuta.
7 Ug himoon ko ikaw nga mangalagad kaniya ug sa imong igsoon nga si Santiago; ug nganha kaninyong tulo akong ihatag kini nga gahom ug ang mga yawe niini nga pagpangalagad hangtod nga ako moabot.
8 Sa pagkatinuod sultihan ko kamo, kamong duha makaangkon sumala sa inyong mga tinguha, kay kamong duha nalipay niana nga inyong gitinguha.