Seksiyon 81
Pagpadayag nga gihatag pinaagi ni Joseph Smith ang Propeta, sa Hiram, Ohio, Marso 15, 1832. Si Frederick G. Williams gitawag aron mahimong high priest ug magtatambag sa Kapangulohan sa Halangdon nga Pagkapari [High Priesthood]. Ang makasaysayanon nga mga talaan nagpakita nga sa dihang nadawat kini nga pagpadayag niadtong Marso 1832, nagtawag kini kang Jesse Gause ngadto sa katungdanan nga mahimong magtatambag ni Joseph Smith diha sa Kapangulohan. Hinuon, sa dihang napakyas siya sa pagpadayon sa paagi nga nahisubay niini nga pagpili, ang katungdanan gibalhin ngadto kang Frederick G. Williams. Ang pagpadayag (nga gipetsahan og Marso 1832) kinahanglang ilhon isip usa ka lakang paingon sa pormal nga organisasyon sa Unang Kapangulohan, mituyo sa pagtawag alang sa katungdanan sa magtatambag niana nga pundok ug gipasabot ang kamahinungdanon sa pagkapinili. Si Igsoong Gause nagserbisyo sa mubo nga panahon apan gipahimulag gikan sa Simbahan niadtong Disyembre 1832. Si Igsoong Williams gi-orden ngadto sa gihisgotan nga katungdanan pagka-Marso 18, 1833.
1–2, Ang mga yawe sa gingharian kanunay nga gihuptan sa Unang Kapangulohan; 3–7, Kon si Frederick G. Williams magmatinud-anon sa iyang pagpangalagad, makabaton siya og kinabuhing dayon.
1 Sa pagkatinuod, sa pagkatinuod, sultihan ko ikaw akong sulugoon nga Frederick G. Williams: Paminaw sa iyang tingog nga namulong, sa pulong sa Ginoo nga imong Dios, ug patalinghog ngadto sa katungdanan diin ikaw gitawag, gani sa pagkahimong high priest sa akong simbahan, ug magtatambag sa akong sulugoon nga si Joseph Smith, Jun.;
2 Kinsa gihatagan nako sa mga yawe sa gingharian, nga anaa kanunay sa Unang Kapangulohan sa Halangdon nga Pagkapari:
3 Busa, sa pagkatinuod giila nako siya ug mopanalangin kaniya, ug usab kanimo, kon ikaw magmatinud-anon sa tambag, sa katungdanan nga akong gisangon kanimo, sa pag-ampo kanunay, sa dayag ug sa imong kasingkasing, diha sa kadaghanan ug sa kinaugalingon, usab sa imong pagpangalagad sa pagsangyaw sa ebanghelyo sa yuta sa mga buhi, ug taliwala sa imong kaigsoonan.
4 Ug sa pagbuhat niining mga butanga gibuhat nimo ang labing dako nga kaayohan ngadto sa imong mga isigkatawo, ug nagpalambo sa himaya kaniya nga imong Ginoo.
5 Mao nga, pagmatinud-anon; barogi ang katungdanan nga gisangon nako kanimo; tabangi ang maluyahon, ipataas ang mga kamot sa nawad-an og paglaom, ug lig-ona ang nahuyang nga mga tuhod.
6 Ug kon magmatinud-anon ka hangtod sa kataposan makaangkon ka og korona sa imortalidad, ug kinabuhing dayon sa mga mansyon nga giandam nako sa balay sa akong Amahan.
7 Tan-awa, ug sud-onga, mao kini ang mga pulong sa Alpha ug Omega, gani si Jesukristo. Amen.