Seksiyon 83
Pagpadayag nga gihatag pinaagi ni Joseph Smith ang Propeta, sa Independence, Missouri, Abril 30, 1832. Kini nga pagpadayag nadawat samtang ang Propeta nagkatigom aron makigtambag sa iyang kaigsoonan.
1–4, Ang kababayen-an ug kabataan may katungod nga makapangayo og suporta gikan sa ilang mga bana ug sa mga amahan alang sa ilang suporta; 5–6, Ang mga biyuda ug mga ilo makapangayo sa Simbahan og ilang suporta.
1 Sa pagkatinuod, miingon ang Ginoo, agi og dugang sa mga balaod sa simbahan mahitungod sa kababayen-an ug kabataan, niadtong mga nahisakop sa simbahan, nga nawad-an sa ilang mga bana o mga amahan:
2 Ang kababayen-an may katungod nga makapangayo sa ilang mga bana alang sa ilang kabuhian, hangtod nga ang ilang mga bana wala na; ug kon mapamatud-an nga dili sila mga malapason, makabaton sila og pakigdait sa simbahan.
3 Ug kon dili sila matinud-anon dili sila makabaton og pakigdait sa simbahan; apan maangkon gihapon nila ang ilang mga kabilin sumala sa mga balaod sa yuta.
4 Ang tanang kabataan may katungod nga makapangayo sa ilang mga ginikanan alang sa ilang kabuhian hangtod sila anaa na sa hustong panuigon.
5 Ug human niana, makapangayo sila sa simbahan, o sa laing pagkasulti, sa balay tipiganan sa Ginoo, kon ang ilang mga ginikanan walay ikahatag kanila nga kabilin.
6 Ug ang balay tipiganan pagadumalahon pinaagi sa mga halad sa mga sakop sa simbahan; ug ang mga biyuda ug ang mga ilo pagahatagan, ingon man usab ang mga kabos. Amen.