Seksiyon 86
Pagpadayag nga gihatag pinaagi ni Joseph Smith ang Propeta, sa Kirtland, Ohio, Disyembre 6, 1832. Kini nga pagpadayag nadawat samtang ang Propeta nagrebyo ug naghimo og kausaban sa manuskrito sa hubad sa Biblia.
1–7, Ang Ginoo naghatag og kahulogan sa sambingay sa trigo ug sa mga sagbot; 8–11, Iyang gipasabot ang mga panalangin sa pagkapari ngadto niadtong adunay katungod nga mga manununod sumala sa kaliwatan.
1 Sa pagkatinuod, nag-ingon ang Ginoo kaninyo akong mga sulugoon, mahitungod sa sambingay sa trigo ug sa mga sagbot:
2 Tan-awa, sa pagkatinuod moingon ko, ang umahan mao ang kalibotan, ug ang mga apostol mao ang mga tigsabwag sa mga binhi;
3 Ug human sila makatulog ang gamhanan nga tiglutos sa simbahan, ang mibiya sa tinuohan, ang nagbaligya og dungog, bisan ang Babilon, nga mipainom sa tanang nasod sa iyang kopa, kansang mga kasingkasing iya sa kaaway, bisan si Satanas, milingkod sa paghari—tan-awa misabwag siya og mga sagbot; busa, ang mga sagbot mituok sa trigo ug miabog sa simbahan ngadto sa kamingawan.
4 Apan tan-awa, sa kataposang mga adlaw, bisan karon samtang ang Ginoo nagsugod sa pagdala sa pulong, ug ang udlot migitib ug gani linghod pa—
5 Tan-awa, sa pagkatinuod sultihan ko kamo, ang mga anghel nangamuyo sa Ginoo maadlaw ug magabii, kinsa andam na ug naghulat nga ipadala sa pag-ani sa mga umahan;
6 Apan gisultihan sila sa Ginoo, ayaw ibta ang mga sagbot samtang ang udlot linghod pa (kay sa pagkatinuod ang inyong pagtuo huyang), basin pa unya og inyong maibot usab ang trigo.
7 Busa, itugot nga ang trigo ug ang mga sagbot magdungan sa pagtubo hangtod sa pag-ani; unya kamo moani pag-una sa trigo gikan sa mga sagbot, ug human sa pagpundok sa trigo, tan-awa ug sud-onga, ang mga sagbot bugkoson, ug ang umahan ibilin aron sunogon.
8 Busa, sa ingon niana miingon ang Ginoo kaninyo, diin ang pagkapari nagpadayon pinaagi sa kaliwatan sa inyong mga amahan—
9 Kay kamo mao ang adunay katungod nga manununod, sumala sa kaliwatan, ug natago gikan sa kalibotan kauban ni Kristo sa Dios—
10 Busa ang inyong kinabuhi ug ang pagkapari nagpabilin, ug kinahanglan nga magpabilin pinaagi kaninyo ug sa inyong kaliwatan hangtod sa pagpahiuli sa tanang butang nga gipamulong sa mga ba-ba sa tanang balaan nga propeta sukad sa sinugdanan sa kalibotan.
11 Busa, bulahan kamo kon padayon ninyong dawaton ang akong pagkamaayo, usa ka kahayag sa mga Hentil, ug pinaagi niini nga pagkapari, usa ka manluluwas sa akong katawhan sa Israel. Ang Ginoo nag-ingon niini. Amen.