1 Solo, boye elobi Nkolo epayi na bino oyo bosili kowangana esika moko mpo na kozwa bolingi na ye mpo na ntina na bino:

2 Tala, oyo ezali kosepelisa Nkolo na bino, mpe banjelu bazali kosepela likolo na bino; makabo ya sambo na bino esili komata na matoyi ya Nkolo ya Sabato, mpe ekomami lokola lisolo ya makomi kati na buku ya nkombo ya basantisami, kutu bango oyo ya mokili ya selesitiale.

3 Yango wana, natindi sikawa likolo na bino Molendisi mosusu, kutu likolo na bino baninga na ngai, ete akoka kotikala kati na mitema na bino, kutu Molimo Mosantu ya elaka; Molendisi mosusu oyo azali se moko oyo nalakaki bayekoli na ngai, lokola ekomami kati na litatoli ya Yoane.

4 Molendisi oyo azali elaka oyo napesi epayi na bino mpo na bomoi ya seko, kutu mpo na nkembo ya bokonzi ya selesitiale;

5 Oyo nkembo ezali ya eklezia ya Mobotami ya yambo, kutu ya Nzambe, mosantu koleka nyonso, na nzela ya Yesu Klisto Mwana na ye—

6 Ye oyo amataki na likolo, mpe lisusu akitaki na nse ya biloko nyonso, na lolenge ete asosolaki makambo nyonso, ete akoka kozala kati na nyonso mpe na nzela ya biloko nyonso, pole ya bosolo;

7 Bosolo boye wapi ezali kongenga. Oyo ezali pole ya Klisto. Mpe lisusu azali kati na moi, mpe pole na yango, mpe nguya na yango na oyo esalemaki.

8 Mpe lisusu azali kati na sanza, mpe azali pole ya sanza, mpe nguya na yango na oyo nini esalemaki;

9 Lokola pole ya minzoto, mpe nguya na yango na oyo nini misalemaki;

10 Mpe mabele lisusu, mpe nguya na yango, kutu mabele likolo ya oyo botelemi.

11 Mpe pole oyo ezali kongenga, oyo epesaka bino pole, ezali na nzela na ye oyo azali kongengisa miso na bino, azali se pole moko wana oyo epesaka bomoi na bososoli na bino;

12 Oyo pole ebimaka uta wapi Nzambe azali mpo na kotondisa bonene ya etando—

13 Pole oyo ezali kati na biloko nyonso, oyo epesaka bomoi na biloko nyonso, oyo ezali mobeko engebene na oyo wapi biloko nyonso eyangelami, kutu nguya ya Nzambe oyo afandi likolo ya kiti ya bokonzi na ye, oyo azali na ntolo ya boseko, oyo azali na katikati ya biloko nyonso.

14 Sikawa, solo nalobi epayi na bino, ete na nzela ya bosikoli boye bosalemi mpo na bino nde ekokisami bosekwi uta na bakufi.

15 Mpe molimo mpe nzoto ezali molimo ya moto.

16 Mpe bosekwi uta na bakufi ezali bosikoli ya molimo.

17 Mpe bosikoli ya molimo ezali na nzela na ye oyo apesaka bomoi na biloko nyonso, na ntolo ya nani mobeko mopesami ete babola mpe basokemi ya mabele bakosangola yango lokola libula.

18 Boye, esengeli mpenza kosantisama uta na bozangi bosembo nyonso, ete makoka komilengela mpo na nkembo ya selesitiale;

19 Mpo ekosila yango kotondisa ntina ya bokeli na yango, makolatisama motole ya nkembo, kutu na nkembo ya kozala na Nzambe Tata;

20 Ete nzoto oyo ezali ya bokonzi ya selesitiale ekoka kozwa mabele yango libela na libela, mpamba te, esalemaki mpe ekelamaki mpo na mwango oyo, mpe bango basantisami mpo na mwango oyo.

21 Mpe bango oyo basantisami te na nzela ya mobeko oyo nasili kopesa epayi na bino, kutu mobeko ya Klisto, basengeli kosangola libula ya bokonzi mosusu, kutu boye ezali bokonzi ya teresitiale, soki te oyo ya bokonzi ya telesitiale.

22 Mpo ye oyo akoki te kondima mobeko ya bokonzi ya selesitiale akoki te kolinga kondima nkembo ya selesitiale.

23 Mpe ye oyo akoki te kondima mobeko ya bokonzi ya teresitiale akoki te kolinga kondima nkembo ya teresitiale.

24 Mpe oyo akoki kolanda mobeko ya bokonzi ya telesitiale te akoki kolanda nkembo ya telesitiale te; na boye alongobani te pona bokonzi ya nkembo. Na boye asengeli alanda bokonzi oyo ezali ya nkembo te.

25 Mpe lisusu, solo nalobi epayi na bino, mabele endimaka mobeko ya bokonzi ya selesitiale, mpo etondisaka ntina ya bokeli na yango, mpe ebukaka mobeko te—

26 Yango wana, makosantisama; iyo, ata soki makufi, makopesama bomoi lisusu, mpe makolingisa nguya na nzela ya oyo wapi epesami bomoi, mpe bato ya sembo bakosangola yango lokola libula.

27 Mpo ata soki bakufi, bango mpe bakolamuka lisusu, lokola nzoto ya molimo.

28 Bango baoyo bazali ya molimo ya selesitiale bakozwa nzoto se moko oyo ezalaki ya mokili; kutu bakozwa nzoto na bino, mpe nkembo na bino ekozala nkembo na oyo wapi nzoto na bino epesama bomoi.

29 Bino baoyo bopesami bomoi na ndambo ya nkembo ya selesitiale bokozwa na ntango wana se nkembo moko wana, kutu na litondi.

30 Mpe bango baoyo bopesami bomoi na ndambo moko ya nkembo ya teresitiale bakozwa na ntango wana se nkembo oyo moko wana, kutu na litondi.

31 Mpe lisusu bango baoyo bapesami bomoi na ndambo ya nkembo ya telesitiale bakozwa na ntango wana se nkembo oyo moko wana, kutu na litondi.

32 Mpe bango baoyo batikali bakopesama lisusu bomoi; nzokande, bakozonga lisusu na bisika na bango moko, mpo na kosepela na oyo balingi kozwa, mpamba te balingaki te kosepela na oyo basengelaki kozwa.

33 Mpo litomba nini ekoki moto kozwa soki likabo epesami epayi na ye, mpe azwi likabo yango te? Tala, asepeli te na oyo epesami epayi na ye, mpe akosepela soki te na moto oyo azali mopesi ya likabo yango.

34 Mpe lisusu, solo nalobi epayi na bino, ete oyo eyangelami na mobeko ebatelami lisusu na mobeko mpe ebongisami nie mpe esantisami se na mobeko yango.

35 Oyo ebukaka mobeko, mpe etosaka mobeko te, kasi elukaka kokomisa mobeko yango moko, mpe elingi kotikala kati na lisumu, mpe etikali nyonso mobimba kati na lisumu, ekoki te kosantisama na mobeko, na boboto te, na boyengebene mpe te, na bosambisi mpe te. Boye, basengeli kotikala se na bosoto.

36 Babokonzi nyonso epesama mobeko;

37 Mpe babokonzi ezali ebele; mpo ntaka yoko ezali te kati na oyo wapi bokonzi ezali te; mpe ezali na bokonzi moko te wapi oyo ntaka ezali te; ezala bokonzi ya monene to bokonzi ya moke.

38 Mpe epayi na bokonzi moko moko mobeko mopesami; mpe na mobeko nyonso ezali lisusu na bandelo mpe masengami songolo.

39 Bazalani nyonso oyo batosaka masengami wana te balongisami soki moke te.

40 Mpo mayele ekangamaka se na mayele; bwania ezwaka se bwania; bosolo eyambaka se bosolo; bolamu elingaka se bolamu; pole ekangamaka se na pole; boboto ezalaka na mawa se likolo ya boboto mpe ebatelaka se ya ye moko; boyengebene ekobaka botamboli na yango mpe ebatelaka se ya ye moko; bosambisi ekendaka se liboso ya elongi na ye oyo afandi likolo ya kiti ya bokonzi mpe ayangelaka mpe asalaka makambo nyonso.

41 Ye asosolaka biloko nyonso, mpe biloko nyonso ezali liboso na ye, mpe biloko nyonso ezali nzinganzinga na ye; mpe azali likolo ya biloko nyonso, mpe kati na biloko nyonso, mpe azali bipayi na biloko nyonso, mpe nzinganzinga na biloko nyonso; mpe biloko nyonso biwuti na ye, mpe mpo na ye, kutu Nzambe, libela na libela.

42 Mpe lisusu, solo nalobi epayi na bino, apesaki mobeko moko na biloko nyonso, engebene na oyo mobeko biloko bitambolaka na ntango mpe na bileko na yango;

43 Mpe nzela na yango etiami, kutu nzela ya lola mpe ya mabele, na oyo ezali na mabele mpe minzoto nyonso oyo minene.

44 Mpe mipesaka pole moko na mosusu na ntango mpe na bileko na yango, na minuti na yango, na ngonga na yango, na mikolo na yango; na mposo na yango, na sanza na yango, na mibu na yango—nyonso oyo ezali se mobu moko na lolenge ya Nzambe, kasi na lolenge ya moto te.

45 Mabele ebalukaka na mapapu na ye, mpe moi mopesaka pole na ye na ntango ya moi, mpe sanza epesaka pole na ye na ntango ya butu, mpe minzoto mipesaka lisusu pole na bango, lokola mibalukaka na mapapu na bango na nkembo na bango, na katikati ya nguya ya Nzambe.

46 Nakomekisa babokonzi oyo na nini, ete bokoka kososola?

47 Tala, nyonso oyo ezali babokonzi, mpe moto nyonso oyo amoni moko ya oyo soki te ya moke koleka oyo asili nde komona Nzambe kosalaka kati na lokumu mpe nguya na ye.

48 Nalobi epayi na bino, ye oyo amoni ye; nzokande, ye oyo ayaki epayi ya bato na ye moko bayambaki ye te.

49 Pole engengaka kati na molili, mpe molili moyambaka yango te; nzokande, mokolo ekoya ntango bokozwa bososoli kutu ya Nzambe, mpamba te bokopesama bomoi na ye mpe na nzela na ye.

50 Na ntango wana nde bokoyeba ete bomoni ngai, ete nazali, mpe ete nazali pole ya solo oyo ezali kati na bino, ete bozali kati na ngai; soki bongo te bokoki kofuluka te.

51 Tala, nakomeka babokonzi oye na moto oyo azali na elanga, mpe atindi basali na ye na elanga kotimola mabele kati na elanga.

52 Mpe alobaki epayi na oyo ya yambo: Kende mpe sala kati na elanga, mpe na ngonga ya yambo na koya epayi na yo, mpe okomona bosepeli ya elongi na ngai.

53 Mpe alobaki epayi na oyo ya mibale: Kende yo lisusu na elanga, mpe na ngonga ya mibale nakoya kotala yo na bosepeli ya elongi na ngai.

54 Mpe lisusu epayi na oyo ya misato, kolobaka: Nakoya kotala yo;

55 Mpe epayi na oyo ya minei, mpe bongo na bongo kino na oyo ya zomi na mibale.

56 Mpe nkolo ya elanga akendaki epayi na ya yambo na ngonga ya yambo, mpe atikalaki elongo na ye ngonga nyonso wana, mpe azalaki na esengo mpo na pole uta na elongi ya nkolo na ye.

57 Mpe alongwaki uta na mosali ya yambo mpo ete akoka kotala lisusu ya mibale, mpe ya misato, mpe ya minei, mpe bongo na bongo kino epayi na ya zomi na mibale.

58 Mpe boye bango nyonso bazwaki pole uta na elongi ya nkolo na bango, moto na moto na ngonga na ye, mpe na ntango na ye, mpe na eleko na ye—

59 Kobandaka na ya yambo, mpe bongo na bongo kino epayi na oyo ya nsuka, mpe uta na ya nsuka kino epayi na ya yambo, mpe uta epayi na ya yambo kino epayi na ya nsuka;

60 Moto na moto na molongo na ye moko, kino ekokisamaki ngonga na ye, kutu engebene lokola nkolo na ye atindaki ye, ete nkolo na ye akoka kokembelama na ye, mpe ye na nkolo na ye, ete bango nyonso bakembelama.

61 Boye, na lisese oyo nakomeka babokonzi nyonso oyo, mpe bafandi na yango—bokonzi na bokonzi na ngonga na yango, mpe na ntango na yango, mpe na eleko na yango, kutu engebene na mokano oyo Nzambe akamataki.

62 Mpe lisusu, solo nalobi epayi na bino, baninga na ngai, natikeli bino maloba oyo mpo na komanyola na mitema na bino, elongo na motindo oyo nazali kopesa epayi na bino, ete bobelela ngai wana ezali ngai penepene—

63 Bopusana penepene na ngai mpe nakopusana penepene na bino; boluka ngai na molende mpe bokomona ngai; bosenga, mpe bokozwa; bobeta, mpe ekofunguamela bino.

64 Nyonso oyo bokosenga Tata na nkombo na ngai, oyo wana elongobani mpo na bino, ekopesamela bino;

65 Mpe soki bosengi eloko nyonso oyo elongobani te mpo na bino, ekobaluka na bokweisami na bino.

66 Tala, oyo wana bozali koyoka ezali lokola mongongo ya moto moko kogangaka na esobe—na esobe, mpo ete bokoki komona ye te—mongongo na ngai, mpo ete mongongo na ngai ezali Molimo; Molimo na ngai ezali bosolo; bosolo ekobaka se kokende mpe ezalaka te na nsuka; mpe soki ezali na bino ekoyikana.

67 Mpe soki liso na bino ezali bobele kotalela nkembo na ngai, nzoto na bino mobimba ekotondisama na pole, mpe molili ekozala te kati na bino; mpe nzoto oyo wana etondisami na pole nde esosolaka makambo nyonso.

68 Boye, bomisantisa bino moko ete mayele na bino makoma bobele kotalela Nzambe, mpe mikolo mikoya ete bokomona ye; mpo akolongolela bino elamba na elongi na ye, mpe ekozala na ntango se ya ye moko, mpe na nzela se ya ye moko, mpe engebene na bolingi na ye moko.

69 Bomikundola elaka monene mpe ya nsuka oyo nasili kopesa epayi na bino; bobengana makanisi mazanga ntina mpe bolekeli ya koseka na bino mosika uta na bino.

70 Botikala, botikala na esika oyo, mpe bobenga eyangani ya bato nyonso, kutu baye wana bazali basali bilanga ya yambo kati na bokonzi boye ya nsuka.

71 Mpe tika baoyo wana bakebisaki na mobembo na bango babelela Nkolo, mpe bamanyola bokebisi boye bazwaki na mitema na bango, se mpo na eleko moke.

72 Tala, mpe mona, nakobatela bitonga na bino, mpe nakotelemisa bampaka mpe kotindela bango epayi bitonga yango.

73 Tala, nakotambwisa mosala na ngai mbangu na ntango na yango.

74 Mpe napesi epayi na bino, baoyo bozali basali na yambo kati na bokonzi ya nsuka boye, motindo moko ete boyangana esika moko, mpe bomibongisama bino moko, mpe bomilengela, mpe bomisantisana; iyo, petola mitema na bino, mpe bosukola maboko mpe makolo na bino liboso na ngai, ete nakoka kokomisa bino peto;

75 Ete nakoka kotatola epayi na Tata na bino, mpe Nzambe na bino, mpe Nzambe na ngai, ete bozali peto uta na makila ya nkola oyo ya nkuna; ete nakoka kokokisa elaka oyo, elaka monene oyo mpe ya nsuka, oyo nasili kopesa epayi na bino na ntango ekolinga ngai.

76 Lisusu, napesi epayi na bino motindo moko ete bokoba kosambela mpe kokila bilei uta na ntango oyo mpe kokende liboso.

77 Mpe napesi epayi na bino motindo moko ete boteyana moko mpe mosusu malongi etali bokonzi.

78 Boteya na molende mpe ngolu na ngai ekozala na bino, ete bokoka koteyama na lolenge ya kobonga nie koleka na eteyeli, na liteya, na malongi, na mobeko ya nsango malamu, na makambo nyonso etali bokonzi ya Nzambe, oyo malongobani mpo bino kososola;

79 Na oyo etali biloko oyo ezali na lola mpe na mabele, mpe na nse ya mabele; biloko oyo ezalaki, biloko oyo ezali, biloko oyo esengeli koya kala te; biloko oyo ezali na ndako epayi, biloko oyo ezali na mboka misusu; bitumba mpe mibulungano ya bikolo mpe masambisi oyo ezali likolo ya mabele; mpe lisusu boyebi ya bikolo mpe ya mikonzi—

80 Ete bokoka kozala bato bamilengeli na makambo nyonso ntango nakotinda bino lisusu komatisa libiangi oyo epayi wapi nabiangaki bino, mpe etinda oyo wapi napesaki bino.

81 Tala, natindi bino kotatola mpe kokebisa bato, mpe esengeli ete moto nyonso oyo asili kokebisama akebisa moninga na ye.

82 Boye, bazali na mokalo te, mpe masumu na bango ezali se likolo ya mitu na bango moko.

83 Ye oyo akoluka ngai na molende akomona ngai, mpe akotikama te.

84 Yango wana, botikala, mpe bosala na molende, ete bokoka kokoma bato babongi nie kati na mosala na bino ya kokendaka na kati ya baoyo bazali Bayuda-te mpo na ntango ya nsuka, mingi lokola monoko ya Nkolo ekotanga nkombo, mpo na kokanga mobeko singa soki mpe kokanga litatoli, mpe mpo na kolengela basantu mpo na ngonga ya bosambisi oyo ezali koya;

85 Ete milimo na bango mikima nkele ya Nzambe, libebi ya bonsomo boye ezali kozela bato ya nkuna, ezala kati na mokili oyo mpe kati na mokili ekoya. Solo, nalobi epayi na bino, tika ete baoyo wana bazali te bampaka ya yambo bakoba kosala kati na elanga ya vinyo kino babiangami na monoko ya Nkolo ekobianga bango, mpo ete ntango na bango ekomi naino te; bilamba na bango ezali peto te uta na makila ya nkola oyo.

86 Botikala kati na lipanda na nzela ya oyo wapi bokomisami nsomi; bomikangisa te kati na masumu, kasi botika maboko na bino mazala peto, kino ekoya Nkolo.

87 Mpo mikolo ezali mingi te uta na ntango oyo mpe mabele makoningana mpe makotetema awa mpe esika mosusu kuna lokola moto ya molangwa; mpe moi ekobomba elongi na ye, mpe ekoboya kopesa pole; mpe sanza ekobongwana na makila; mpe minzoto ekokoma na nkanda ya koleka ndelo, mpe mikobwakama yango moko na nse lokola mbuma ya mosuke oyo ekweyi uta na nzete ya mosuke.

88 Mpe nsima ya litatoli na bino nkele mpe bosiliki ekoya likolo ya bato.

89 Mpo ete nsima ya litatoli na bino litatoli ya boningani ya mabele ekoya, oyo ekoyokisa monkime na katikati ya mabele, mpe bato bakokweya likolo ya mabele mpe bakokoka kotelema te.

90 Mpe lisusu litatoli ya mongongo ya kake, mpe mongongo ya minkalikali, mpe mongongo ya ekumbaki, mpe mongongo ya mbonge ya mbu komataka yango moko makasi koleka ndelo na yango.

91 Mpe biloko nyonso bikozala kilikili, mpe solo mpenza, mitema ya bato mikozanga bango; mpo bobangi ekoya likolo ya bato nyonso.

92 Mpe banjelu bakopumbwa na katikati ya lola, kogangaka na mongongo makasi, kobetaka kelelo ya Nzambe, kolobaka ete: Bomilengela, bomilengela, O bafandi ya mabele; mpo bosambisi ya Nzambe na biso ekomi. Tala, mpe mona, Mobali ya libala ayei; bobima libanda mpo na kokutana na ye.

93 Mpe sikasika wana elembo monene ekomonana na lola, mpe bato nyonso bakomona yango elongo.

94 Mpe anjelu mosusu akobeta kelelo na ye, kolobaka: Eklezia wana ya monene, mama ya bonsomo, oyo elangwisaki mabota nyonso na vinyo ya nkele ya bondumba na ye, oyo eniokolaka basantu ya Nzambe, oyo esopi makila na bango—ye oyo afandi likolo ya mai ebele, mpe likolo ya mabongo ya mbu—tala, azali matiti mabe ya mabele; akangisami na maboke; singa na ye ekangisami makasi, moto moko te akoki kofungola yango; boye, asili kobelema mpo na kotumbama na moto. Mpe anjelu yango akobeta kelelo na ye ntango molai mpe makasi, mpe mabota nyonso ekoyoka yango.

95 Mpe kimia ekozala na lola mpo na ntaka ya ndambo ya ngonga moko; mpe sikasikawa nsima nde lizeka ya lola ekofungwama, lokola mokanda mofungwamaka nsima ya kokangisama, mpe elongi ya Nkolo ekozipolama;

96 Mpe basantu oyo bazali likolo ya mabele, oyo bazali na bomoi, bakopesama nguya ya bomoi mpe bakokamatama likolo mpo na kokutana na ye.

97 Mpe baoyo basili kolala na malita na bango bakobima, mpo malita na bango ekofungwama; mpe bango lisusu bakokamatama likolo mpo na kokutana na ye na katikati ya likonzi ya lola—

98 Bazali baoyo ya Klisto, mbuma ya yambo, bango oyo bakokita liboso elongo na ye, mpe bango oyo bazali likolo ya mabele mpe kati na malita na bango, oyo bazali bato ya yambo oyo bakokamatama likolo mpo na kokutana na ye; mpe nyonso oyo ekosalema na mongongo ya kelelo oyo ekobetama na banjelu ya Nzambe.

99 Mpe nsima na oyo anjelu mosusu akobeta, oyo ezali kelelo ya mibale; mpe nsima nde ekoya bosikoli ya baoyo wana bazali bato ya Klisto na boyei na ye; oyo bazwaki likabo na bango kati na boloko boye ebongisami mpo na bango, ete bakoka koyamba nsango malamu, mpe kosambisama engebene na bato na mosuni.

100 Mpe lisusu, kelelo mosusu ekobeta, oyo ezali kelelo ya misato; mpe nsima ekoya milimo ya bato oyo basengeli kosambisama, mpe bazwami na nse ya bokweisami;

101 Mpe baoyo bazali montika ya bakufi; mpe bazali lisusu na bomoi te kino nsuka ya mibu nkoto moko, bakozala lisusu mpe te, kino na nsuka ya mabele.

102 Mpe kelelo mosusu ekobeta, oyo ezali kelelo ya minei, kolobaka: Ezali na baoyo bakozwama kino na mokolo wana monene mpe ya nsuka, kutu kino na nsuka, baoyo bakotikala kaka na mbindo.

103 Mpe kelelo mosusu ekobeta, oyo ezali kelelo ya mitano, oyo ezali anjelu ya mitano oyo kopumbwaka na katikati ya lola—atindami kopesa nsango malamu ya libela na mabota nyonso, bikolo nyonso, minoko nyonso, mpe bato nyonso;

104 Mpe oyo ekozala lokito ya kelelo na ye, kolobaka na bato nyonso, ezala na lola mpe na mabele, mpe na baoyo bazali na nse ya mabele—mpo litoyi nyonso ekoyoka yango, mpe libolongo nyonso ekongumbama, mpe monoko nyonso mokotubela, wana ezali bango koyoka lokito ya kelelo, kolobaka: Bobanga Nzambe, mpe bopesa nkembo na ye oyo afandi likolo ya kiti ya bokonzi, libela na libela; mpo ngonga ya bosambisi na ye ekomi.

105 Mpe lisusu, anjelu mosusu akobeta kelelo na ye, oyo azali anjelu ya motoba, kolobaka: Akwei oyo alangwisaki mabota nyonso na vinyo ya nkele ya bondumba na ye; akwei, akwei!

106 Mpe lisusu, anjelu mosusu akobeta kelelo na ye, oyo azali anjelu ya sambo, kolobaka: Esili; esili! Mwana ya mpate ya Nzambe alongi mpe aniati nzungu ya vinyo ye moko, kutu nzungu ya vinyo ya nkele ya Nzambe ya Bokasi nyonso.

107 Mpe nsima banjelu bakolatisama motole na nkembo ya bokasi na ye, mpe basantu bakotondisama na nkembo na ye, mpe bakozwa libula na bango ya kosangola mpe bakokokana na ye.

108 Mpe nsima anjelu ya yambo akobeta lisusu kelelo na ye na matoyi ya baoyo bazali na bomoi nyonso, mpe akobimisa makambo ya nkuku ya bato, mpe misala ya bokasi ya Nzambe na mibu nkoto moko ya yambo.

109 Mpe nsima anjelu ya mibale akobeta kelelo na ye; mpe akobimisa makambo ya nkuku ya bato, mpe makanisi mpe mikano ya mitema, mpe misala makasi ya Nzambe na nkoto ya mibu ya mibale—

110 Mpe bongo na bongo, kino anjelu ya sambo akobeta kelelo na ye; mpe akotelema liboso likolo ya mabele mpe likolo ya mbu, mpe akolapa ndai na nkombo na ye oyo afandi likolo ya kiti ya bokonzi, ete ntango ekozala lisusu te; mpe Satana akokangisama, nioka wana ya kala, oyo babengi zabulu, mpe bakotika ye te mpo na ntaka ya mibu nkoto moko.

111 Mpe nsima bakofungola ye mpo na eleko moke, ete akoka kosangisa mampinga na ye esika moko.

112 Mpe Mikaele, anjelu ya sambo, kutu anjelu monene, akosangisa mampinga na ye esika moko, kutu bibele ya lola.

113 Mpe zabulu akosangisa mampinga na ye esika moko; kutu bibele ya lifelo, mpe bakoya kobunda na Mikaele mpe mampinga na ye.

114 Mpe nsima ekoya nde etumba ya Nzambe monene; mpe zabulu na mampinga na ye bakobwakama mosika na esika na bango moko, ete bazala lisusu na nguya likolo ya basantu soki moke te.

115 Mpo ete Mikaele akobunda bitumba na bango, mpe akolonga ye oyo alukaka kiti ya bokonzi na ye oyo afandi likolo ya kiti ya bokonzi, kutu Mwana ya mpate.

116 Oyo ezali nkembo ya Nzambe, mpe ya basantisami, mpe bakomona liwa lisusu te.

117 Boye, solo nalobi epayi na bino, baninga na ngai, bobenga eyangani ya bato nyonso, lokola natindaki bino.

118 Mpe lokola nyonso bazali na bondimi te, boluka na molende mpe boteyana moko na moko maloba ya bwania; iyo, boluka kati ya buku ya malamu koleka maloba ya bwania; boluka boyebi, kutu na boyekoli mpe lisusu na bondimi.

119 Bomibongisa bino moko; bolengela eloko nyonso ya ntina; mpe bofandisa ndako moko, kutu ndako ya losambo, ndako ya kokila, ndako ya bondimi, ndako ya boyebi, ndako ya nkembo, ndako ya molongo, ndako ya Nzambe;

120 Ete kokota na bino ekoka kozala na nkombo ya Nkolo; ete kobima na bino ekoka kozala na nkombo ya Nkolo; ete mbote nyonso bokopesana ekoka kozala na nkombo ya Nkolo, na maboko matombwami likolo epayi na oyo Aleki Likolo.

121 Boye, bosukisa masolo nyonso ya bino ezanga ntina, koseka-seka nyonso, bamposa na bino nyonso ya bilengi na mosuni, lolendo na bino nyonso mpe bomoto na bino nyonso ya elema, mpe misala na bino nyonso ya nkuna.

122 Bopona moteyi moko na kati na bino moko, mpe tika ete nyonso boloba elongo na mbala moko te; kasi botika moko aloba na ntango yoko mpe nyonso bayoka maloba na ye, ete ekosila nyonso koloba ete nyonso balendisama na nyonso, mpe ete moto nyonso akoka kozala na lotomo ekokani.

123 Mona ete bolingani moko mpe mosusu; botika kozala bilula-lula; boyekola kokaba moko na mosusu lokola nsango malamu esengi.

124 Botika kozala goigoi; botika kozala mbindo; botika kozwana mabe moko na mosusu; botika kolala mingi koleka ete esengeli; bokende kolala noki, ete bokoka te kolemba; bolamuka noki, ete nzoto na bino mpe mayele na bino ekoka kozwa makasi.

125 Mpe likolo ya nyonso, bolatisama na mokangano ya bolingani, lokola na nzambala, oyo ezali mokangano ya kobonga nie mpe kimia.

126 Bosambela ntango nyonso, ete bokoka kolemba te, kino nakoya. Tala, mpe mona, nakoya na lombangu, mpe nakoyamba bino epayi na ngai moko. Amene.

127 Mpe lisusu, molongo ya ndako oyo elengelami mpo na bokambi ya eteyelo ya baprofeta, oyo etiami mpo na kolakisa bango mpo na oyo etali makambo nyonso oyo malongobani mpo na bango, kutu mpo na bakambi ya eklezia, to na maloba mosusu, baoyo wana babiangami na mosala kati na eklezia, kobandaka na banganganzambe minene, kutu kokita kino na badiakona—

128 Mpe oyo ekozala molongo ya ndako ya bokambi ya eteyelo yango: Ye oyo aponami kozala mokambi, soki te molakisi, asengeli kozala na esika na ye, kati na ndako oyo ekolengelama mpo na ye.

129 Boye, asengeli kozala moto ya yambo ya kokoma na ndako ya Nzambe, na esika oyo wapi lingomba kati na ndako ekoki koyoka maloba na ye na bokebi mpe polele, na kogangaka makasi te.

130 Mpe ntango akoya na ndako ya Nzambe, mpo ete asengeli kozala moto ya yambo ya kokoma na ndako yango—tala, oyo ezali malamu, mpo ete akoka kozala ndakisa—

131 Tika ete amipesa kati na losambo na mabolongo na ye liboso ya Nzambe, lokola elembo to bokundoli ya liyokani ya libela.

132 Mpe ntango moto nyonso oyo akokota nsima na ye, tika ete moteyi atelema, mpe, na maboko matombwami likolo na lola, iyo, kutu semba, apesa mbote na bandeko mibali mpe basi bandimi na maloba oyo:

133 Ezali yo ndeko mondimi to ezali bino bandeko bandimi? Napesi yo to bino mbote na nkombo ya Nkolo Yesu Klisto, lokola elembo to bokundoli ya liyokani ya libela, liyokani kati na oyo nayambi yo to bino kati na bondeko ya lingomba, na mokano oyo motiami sikisiki, oyo mobongwanaka te, mpe mobongolamaka te, mpo na kozala moninga mpe ndeko mondimi na yo to ya bino na nzela ya ngolu ya Nzambe kati na mokangano ya bolingo, kotambolaka na kozanga mpamela, na kopesaka matondi, kati na mitindo nyonso ya Nzambe, libela na libela. Amene.

134 Mpe ye oyo amoni ete alongobani te na mbote oyo asengeli te kozala na esika yango na kati na bino; mpo bokoki te kopesa nzela ete ndako na ngai ebebisama na ye.

135 Mpe ye oyo akokota mpe azali sembo liboso na ngai, mpe azali ndeko mondimi, to soki bazali bandeko bandimi, basengeli kopesa mokambi soki te moteyi mbote na maboko matombwami likolo na lola, na losambo se moko oyo mpe liyokani se moko oyo, to na kolobaka Amene, lokola elembo ya losambo mpe liyokani se moko oyo.

136 Tala, solo, nalobi epayi na bino, oyo ezali momekoli mpo na bino lokola mbote epayi ya moko mpe mosusu kati na ndako ya Nzambe, kati na eteyelo ya baprofeta.

137 Mpe bobiangami kosala oyo na ntango ya losambo mpe ya bopesi matondi, lokola Molimo mokopesa maloba na misala na bino nyonso kati na ndako ya Nkolo, kati na eteyelo ya baprofeta, ete ekoka kokoma ndako esantu, tabelenakele ya Molimo Mosantu mpo na bolendisi na bino.

138 Mpe bosengeli te koyamba moto songolo na kati na bino kati na eteyelo oyo longola se soki azali peto uta na makila ya nkola oyo;

139 Mpe asengeli koyambama na bokuli ya bosukoli makolo, mpamba te ezali na ntina oyo nde bokuli ya bosukoli makolo etiamaki.

140 Mpe lisusu, bokuli ya bosukoli makolo esengeli kopesama na mokambi, to na mpaka moyangeli ya eklezia.

141 Esengeli kobanda na losambo; mpe nsima ya kokabola lipa mpe vinyo, asengeli komilatisa elamba na nketo na ye engebene na emekoleli epesami na mokapo ya zomi na misato ya litatoli ya Yoane mpo na oyo etali ngai. Amene.