Seksiyon 94
Pagpadayag nga gihatag pinaagi ni Joseph Smith ang Propeta, sa Kirtland, Ohio, Agosto 2, 1833. Sila si Hyrum Smith, Reynolds Cahoon, ug si Jared Carter gitudlo isip usa ka komitiba nga maoy responsable sa pagtukod og mga gambalay alang sa Simbahan.
1–9, Ang Ginoo mihatag og sugo kabahin sa pagpabarog og balay alang sa buluhaton sa Kapangulohan; 10–12, Usa ka balay nga imprintahanan pagatukoron; 13–17, Ang pipila ka mga kabilin gihatag.
1 Ug usab, sa pagkatinuod sultihan ko kamo, akong mga higala, hatagan ko kamo og usa ka sugo, nga inyong sugdan ang usa ka buhat sa pagpahimutang ug sa pagpangandam sa sinugdanan ug tukoranan sa siyudad sa stake sa Zion, dinhi sa yuta sa Kirtland, nga magsugod sa akong balay.
2 Ug tan-awa, kini kinahanglan nga pagabuhaton sumala sa sundanan nga gihatag ko na kaninyo.
3 Ug ang unang lote sa habagatan ipahinungod ngari kanako alang sa pagtukod og balay alang sa kapangulohan, alang sa buluhaton sa kapangulohan, sa pagdawat og mga pagpadayag; ug alang sa buluhaton sa pagpangalagad sa kapangulohan, sa tanang butang mahitungod sa simbahan ug sa gingharian.
4 Sa pagkatinuod sultihan ko kamo, nga kini pagatukoron sa kalim-an ug lima ug kan-oman ug lima ka tiil ang gilapdon ug ang gitas-on niini, sa sulod nga hawanan.
5 Ug adunay hawanan sa ubos ug sa taas, sumala sa sundanan nga ihatag kaninyo human niini.
6 Ug kini ipahinungod ngadto sa Ginoo, gikan sa tukoranan niini, sumala sa kapunongan sa pagkapari, sumala sa sundanan nga ihatag nganha kaninyo sa umaabot.
7 Ug ihalad kini sa kinatibuk-an ngadto sa Ginoo alang sa buluhaton sa unang kapangulohan.
8 Ug dili ninyo itugot nga adunay mahugaw nga butang nga mosulod niini; ug ang akong himaya maanaa dinha, ug ang akong presensiya maanaa dinha.
9 Apan kon adunay mosulod niini nga bisan unsa nga mahugaw nga butang, ang akong himaya mawala dinha; ug ang akong presensiya dili moduol niini.
10 Ug usab, sa pagkatinuod sultihan ko kamo, ang ikaduha nga lote sa habagatan kinahanglan nga ipahinungod ngari kanako aron tukoran og balay alang kanako, alang sa buluhaton sa pag-imprinta sa paghubad sa akong mga kasulatan, ug sa tanang butang bisan unsa nga akong isugo kaninyo.
11 Ug kalim-an ug lima ug kan-oman ug lima ka tiil ang gilapdon niini ug ang gitas-on niini, sa sulod nga hawanan; ug adunay hawanan sa ubos ug sa taas.
12 Ug ang kinatibuk-an niini nga balay ipahinungod ngadto sa Ginoo gikan sa tukoranan niini, alang sa buluhaton sa pag-imprinta, sa tanang bisan unsa nga akong isugo kaninyo, aron mahimong balaan, walay lama, sumala sa sundanan sa tanang butang ingon nga kini igahatag kaninyo.
13 Ug sa ikatulong lote makadawat ang akong sulugoon nga si Hyrum Smith sa iyang kabilin.
14 Ug sa una ug sa ikaduhang mga lote sa amihanan makadawat ang akong mga sulugoon nga sila si Reynolds Cahoon ug Jared Carter sa ilang mga kabilin—
15 Aron buhaton nila ang buhat nga akong gisangon kanila, nga mahimong komitiba sa pagtukod sa akong mga balay, sumala sa sugo, diin ako, ang Ginoong Dios, mihatag kaninyo.
16 Kining duha ka balay dili pagatukoron hangtod ako mohatag kaninyo og sugo kabahin niini.
17 Ug karon dili ako mohatag pa kaninyo og pagpadayag niining panahona. Amen.