Seksiyon 96
Pagpadayag nga gihatag ngadto ni Joseph Smith ang Propeta, nga nagpakita sa kahan-ayan sa siyudad sa stake sa Zion sa Kirtland, Ohio, Hunyo 4, 1833, isip sanglitanan sa mga Santos sa Kirtland. Ang okasyon mao ang usa ka komperensiya sa mga labaw nga pari, ug ang labing mahinungdanon nga hilisgotan mao ang pagpang-apod-apod sa pipila ka yuta, nga gitawag og French nga umahan, nga gipanag-iya sa Simbahan duol sa Kirtland. Tungod kay ang komperensiya dili magkauyon kon kinsa ang magdumala sa umahan, ang tanan nagkauyon sa pagpangutana sa Ginoo mahitungod sa maong butang.
1, Ang Stake sa Zion sa Kirtland himoon nga lig-on; 2–5, Ang bishop mao ang mobahin-bahin sa mga kabilin alang sa mga Santos; 6–9, Si John Johnson mamahimong sakop sa hiniusa nga kapunongan.
1 Tan-awa, sultihan ko kamo, ania ang kaalam, nga pinaagi niini inyong masayran unsa ang buhaton mahitungod niining butanga, kay mahinungdanon alang kanako nga kini nga stake nga akong gipahiluna alang sa kalig-on sa Zion kinahanglan nga himoong lig-on.
2 Busa, ipadumala sa akong sulugoon nga si Newel K.Whitney ang dapit nga inyong gihisgotan, diin akong gilaraw nga itukod ang akong balaan nga balay.
3 Ug usab, ilote-lote ang pagbahin niini, sumala sa kaalam, alang sa kaayohan niadtong nagtinguha og mga kabilin, sama sa unsay mahukman pinaagi sa konseho taliwala kaninyo.
4 Busa, paminaw kamo aron makakita niini nga mga butang, ug kana nga bahin nga gikinahanglan aron makaayo sa akong kapunongan, alang sa katuyoan sa pagdala sa akong pulong ngadto sa mga anak sa katawhan.
5 Kay tan-awa, sa pagkatinuod sultihan ko kamo, kini ang labing mahinungdanon alang kanako, nga ang akong mga pulong kinahanglan mahiadto sa mga anak sa katawhan, alang sa katuyoan sa paglukmay sa mga kasingkasing sa mga anak sa katawhan alang sa inyong kaayohan. Ug mao gayod kana. Amen.
6 Ug usab, sa pagkatinuod sultihan ko kamo, kaalam kini ug mahinungdanon alang kanako, nga ang akong sulugoon nga si John Johnson kansang halad akong gidawat, ug kansang mga pag-ampo akong gidungog, kinsa akong gihatagan og saad sa kinabuhing dayon kon ugaling tumanon niya ang akong mga sugo gikan karon—
7 Kay kaliwat siya ni Jose ug mag-aambit sa mga panalangin sa saad nga gihimo ngadto sa iyang mga amahan—
8 Sa pagkatinuod sultihan ko kamo, mahinungdanon alang kanako nga mahimo siyang sakop sa kapunongan, nga motabang siya sa pagdala sa akong pulong ngadto sa mga anak sa katawhan.
9 Busa ordinahan ninyo siya niini nga panalangin, ug magtinguha siya nga makugihon sa pagbayad sa mga balayranan niana nga balay nga inyong gihinganlan, aron makapuyo siya niini. Ug mao gayod kana. Amen.