Seksiyon 99
Pagpadayag nga gihatag pinaagi ni Joseph Smith ang Propeta ngadto ni John Murdock, Agosto 29, 1832, sa Hiram, Ohio. Kapin sa usa ka tuig, si John Murdock nagsangyaw sa ebanghelyo samtang ang iyang mga anak—wala nay inahan dihang namatay ang iyang asawa, si Julia Clapp, niadtong Abril 1831—mipuyo sa laing mga pamilya sa Ohio.
1–8, Si John Murdock gitawag sa pagsangyaw sa ebanghelyo, ug kadtong modawat kaniya modawat sa Ginoo ug makaangkon og kaluoy.
1 Tan-awa, sa ingon niana miingon ang Ginoo ngadto sa akong sulugoon nga si John Murdock—Gitawag ka sa pag-adto sa silangang mga nasod gikan sa usa ka balay ngadto sa laing balay, gikan sa usa ka balangay ngadto sa laing balangay, ug gikan sa usa ka siyudad ngadto sa laing siyudad, sa pagsangyaw sa akong walay kataposang ebanghelyo ngadto sa mga lumulupyo niini, taliwala sa pagpanglutos ug pagkadaotan.
2 Ug kinsa kadtong modawat kanimo modawat kanako; ug makabaton ikaw og gahom sa pagpadayag sa akong pulong pinaagi sa pagpadayag sa akong Balaang Espiritu.
3 Ug kadtong modawat kanimo sama sa usa ka gamay nga bata, makadawat sa akong gingharian; ug bulahan sila, kay makaangkon sila og kaluoy.
4 Ug kadtong mosalikway kanimo isalikway sa akong Amahan ug sa iyang balay; ug limpyohan nimo ang imong mga tiil sa tinago nga mga dapit diha sa agianan alang sa usa ka pagpamatuod batok kanila.
5 Ug tan-awa, ug sud-onga, ako moabot sa dili madugay aron sa paghukom, sa pagmatuod sa ilang tanang buhat nga dili diosnon nga ilang gihimo batok kanako, sama sa daghang nahisulat mahitungod kanako diha sa basahon sa kasulatan.
6 Ug karon, sa pagkatinuod sultihan ko kamo, wala kinahanglana nga molakaw kamo hangtod nga ang inyong mga anak masangkapan sa panginahanglan, ug sa mabination nga paagi ipadala ngadto sa bishop sa Zion.
7 Ug human sa pipila ka tuig, kon ikaw magtinguha gikan kanako, mahimo usab nga moadto ka sa maayo nga yuta, aron makaangkon sa imong kabilin;
8 Gawas niini ikaw mopadayon sa pagsangyaw sa akong ebanghelyo hangtod nga ikaw pagakuhaon. Amen.