Pasiuna

Ang Doktrina ug mga Pakigsaad usa ka koleksiyon sa balaan nga mga pagpadayag ug dinasig nga mga pamahayag nga gihatag alang sa pagpalig-on ug pagdumala sa gingharian sa Dios dinhi sa yuta sa ulahing mga adlaw. Bisan og ang kadaghanan sa mga seksiyon gitumong ngadto sa mga sakop sa Ang Simbahan ni Jesukristo sa mga Santos sa Ulahing mga Adlaw, ang mga mensahe, mga pasidaan, ug mga pag-awhag gituyo alang sa kaayohan sa tanang katawhan ug naglakip og pagdapit sa tanang katawhan sa tanang dapit sa pagpaminaw sa tingog ni Ginoong Jesukristo, namulong ngadto kanila alang sa ilang temporal nga kaayohan ug sa ilang walay kataposan nga kaluwasan.

Kadaghanan sa mga pagpadayag nga anaa niining gitigom nga mga rekord nadawat pinaagi ni Joseph Smith Jr., ang unang propeta ug presidente sa Ang Simbahan ni Jesukristo sa mga Santos sa Ulahing mga Adlaw. Ang uban gimantala pinaagi sa pipila sa iyang mga manununod sa Kapangulohan (tan-awa sa mga ulohan sa D&P 135, 136, ug 138, ug Opisyal nga mga Pamahayag 1 ug 2).

Ang basahon nga Doktrina ug mga Pakigsaad usa sa mga sumbanan nga kasulatan sa Simbahan kauban sa Balaan nga Biblia, sa Basahon ni Mormon, ug sa Perlas nga Labing Bililhon. Hinuon, ang Doktrina ug mga Pakigsaad talagsaon tungod kay dili kini hubad sa karaan nga dokumento, apan gikan sa bag-o nga tinubdan ug hinatag sa Dios pinaagi sa Iyang pinili nga mga propeta aron sa pagpahiuli sa Iyang balaan nga buhat ug sa pagtukod sa gingharian sa Dios dinhi sa yuta niining mga adlawa. Diha sa mga pinadayag, madungog sa tawo ang malumo apan dili matarog nga tingog ni Ginoong Jesukristo, namulong pag-usab atol sa dispensasyon sa kahingpitan sa mga panahon; ug ang buhat nga gisugdan pinaagi niini mao ang pagpangandam sa Iyang Ikaduhang Pag-anhi, agig katumanan ug uyon sa mga pulong sa tanang balaan nga mga propeta sukad pa sa sinugdanan sa kalibotan.

Si Joseph Smith Jr. natawo niadtong Disyembre 23, 1805, sa Sharon, Windsor County, Vermont. Sa sayo nga bahin sa iyang kinabuhi, mibalhin siya kuyog sa iyang pamilya ngadto sa dapit nga karon gitawag og Manchester, sa kasadpan nga bahin sa New York. Mao kadto samtang nagpuyo siya didto niadtong tingpamulak sa 1820, dihang nag-edad siya og napulog-upat ka tuig, nga nasinati niya ang iyang unang panan-awon, diin giduaw siya sa Dios, ang Amahan sa Kahangtoran, ug sa Iyang Anak nga si Jesukristo. Gisultihan siya atol niini nga panan-awon nga ang tinuod nga Simbahan ni Jesukristo nga gitukod sa kapanahonan sa Bag-ong Tugon, ug nagdumala sa kahingpitan sa ebanghelyo, wala na sa yuta. Ang ubang balaan nga mga pagpakita misunod diin gitudloan siya sa daghang anghel; gipakita ngadto kaniya nga ang Dios adunay linain nga buhat nga ipabuhat kaniya dinhi sa yuta ug nga pinaagi kaniya ang Simbahan ni Jesukristo ipahiuli dinhi sa yuta.

Pagkataudtaod, si Joseph Smith gihatagan og katakos sa paghubad ug pagmantala sa Basahon ni Mormon pinaagi sa balaan nga tabang. Sa kasamtangan siya ug si Oliver Cowdery gi-orden ngadto sa Aaronic nga Pagkapari pinaagi ni Juan Bautista niadtong Mayo 1829 (tan-awa sa D&P 13), ug pagkahuman dayon gi-orden usab sila ngadto sa Melchizedek nga Pagkapari pinaagi sa karaang mga Apostoles nga si Pedro, Santiago, ug Juan (tan-awa sa D&P 27:12). Uban pang mga pag-orden misunod diin ang mga yawe sa pagkapari gitugyan pinaagi nila ni Moises, Elijah, Elias, ug daghan pa nga karaang mga propeta (tan-awa sa D&P 110; 128:18, 21). Kini nga mga pag-orden, sa pagkatinuod, mao ang pagpahiuli sa balaan nga awtoridad ngadto sa tawo dinhi sa yuta. Pagka Abril 6, 1830, ubos sa langitnong kamandoan, si Propeta Joseph Smith miorganisar sa Simbahan, ug sa ingon niana ang tinuod nga Simbahan ni Jesukristo sa makausa pa naglihok na usab sa mga buluhaton ingon nga usa ka institusyon taliwala sa mga tawo, nga adunay awtoridad sa pagtudlo sa ebanghelyo ug pagpatuman sa mga ordinansa sa kaluwasan. (Tan-awa sa D&P 20 ug sa Perlas nga Labing Bililhon, Joseph Smith—Kasaysayan 1.)

Kining sagrado nga mga pagpadayag nadawat agig tubag sa pag-ampo, sa panahon sa panginahanglan, ug miresulta gikan sa tinuod nga mga sitwasyon sa kinabuhi nga naglakip sa tinuod nga katawhan. Ang Propeta ug ang iyang mga kauban nagtinguha sa balaan nga paggiya, ug kini nga mga pagpadayag nagpamatuod nga nakadawat sila niini. Diha sa mga pagpadayag, ang tawo makakita sa pagpahiuli ug sa hinayhinay nga pagbutyag sa ebanghelyo ni Jesukristo ug sa pagpahitabo sa dispensasyon sa kahingpitan sa panahon. Ang pagbalhin sa Simbahan ngadto sa kasadpan gikan sa New York ug Pennsylvania ngadto sa Ohio, ngadto sa Missouri, ngadto sa Illinois, ug sa kataposan ngadto sa Dakong Kapatagan sa kasadpang Amerika ug ang gamhanan nga pakigbisog sa mga Santos sa tinguha nga matukod nila ang Zion dinhi sa yuta sa bag-o nga mga panahon gipakita usab dinhi niini nga mga pagpadayag.

Daghan sa unang mga seksiyon adunay kalabotan sa paghubad ug pagmantala sa Basahon ni Mormon (tan-awa sa mga seksiyon 3, 5, 10, 17, ug 19). Ang ubang ulahi nga mga seksiyon nagpahayag sa buhat ni Propeta Joseph Smith sa paghimo og dinasig nga paghubad sa Biblia, sa panahon nga kadaghanan sa mga seksiyon nga naglangkob sa mahinungdanong mga seksiyon sa doktrina nadawat (tan-awa, sama pananglit, sa mga seksiyon 37, 45, 73, 76, 77, 86, 91, ug 132, diin ang matag usa niini adunay direkta nga kalabotan sa paghubad sa Biblia).

Diha sa mga pagpadayag, ang mga doktrina sa ebanghelyo gihatag uban sa pagpasabot mahitungod niana nga sukaranang mga butang sama sa kinaiya sa Diosnong Kapangulohan, ang gigikanan sa tawo, ang pagkatinuod ni Satanas, ang katuyoan sa pagka-mortal, ang panginahanglan sa pagkamasulundon, ang panginahanglan sa paghinulsol, ang mga buhat sa Balaang Espiritu, ang mga ordinansa ug mga buluhaton nga kalabot sa kaluwasan, ang dangatan sa yuta, ang umaabot nga kahimtang sa tawo human sa Pagkabanhaw ug sa Paghukom, ang mahangtoron nga relasyon sa kaminyoon, ug ang mahangtoron nga kinaiyahan sa pamilya. Sa samang paagi, ang inanay nga pagbutyag sa estraktura sa pagdumala sa Simbahan gipakita pinaagi sa pagtawag og mga bishop, sa Unang Kapangulohan, sa Konseho sa Napulog Duha, ug sa Seventy ug sa pagpahimutang sa ubang tigdumala nga mga buhatan ug mga korum. Sa kataposan, ang pagpamatuod nga gihatag mahitungod ni Jesukristo—ang Iyang pagkabalaan, Iyang pagkahalangdon, Iyang pagkahingpit, Iyang gugma, ug ang Iyang gahom sa pagtubos—nakahimo niini nga basahon nga bililhon kaayo ngadto sa tawhanon nga pamilya ug “bililhon kini sa Simbahan sama sa katigayonan sa tibuok Kalibotan” (tan-awa sa ulohan ngadto sa D&P 70).

Ang mga pagpadayag sa sinugdanan gitala sa mga tigsulat ni Joseph Smith, ug ang mga miyembro sa Simbahan mahinamon nga mipakigbahin sa sinulat sa kamot nga mga kopya ngadto sa usag-usa. Aron makahimo og mas permanente nga talaan, ang mga tigsulat sa wala madugay mikopya niining mga pagpadayag ngadto sa mga libro nga talaan sa manuskrito, nga maoy gigamit sa mga pangulo sa Simbahan sa pagpangandam alang sa pag-imprinta sa mga pagpadayag. Si Joseph ug ang nag-unang mga Santos midawat sa mga pagpadayag sama sa ilang pagdawat sa Simbahan: buhi, padayon nga naglambo, ug mahimo pang hapsayon uban sa dugang nga mga pagpadayag. Gidawat usab nila nga tingali adunay wala tuyoa nga mga sayop atol sa proseso sa pagkopya sa mga pagpadayag ug sa pag-andam niini alang sa pagmantala. Sa ingon niana, ang usa ka komperensiya sa Simbahan mihangyo kang Joseph Smith niadtong 1831 sa “pagkorehir sa mga sayop nga tingali iyang makita pinaagi sa Espiritu Santo.”

Human marebyo ug nakorehian ang mga pagpadayag, ang mga miyembro sa Simbahan sa Missouri misugod sa pag-imprinta sa basahon nga giulohan og A Book of Commandments for the Government of the Church of Christ, [Basahon sa mga Sugo alang sa Pagdumala sa Simbahan ni Kristo] nga naglangkob sa daghang nag-unang mga pagpadayag sa Propeta. Kining unang paningkamot sa pagmantala sa mga pagpadayag hinuon, natapos, sa dihang ang mga manggugubot miguba sa opisina sa imprintahanan sa mga Santos didto sa Distrito sa Jackson niadtong Hulyo 20, 1833.

Sa pagkadungog mahitungod sa pagkaguba sa opisina sa imprintahanan sa Missouri, si Joseph Smith ug ang ubang mga pangulo sa Simbahan misugod sa pagpangandam aron imantala ang mga pagpadayag didto sa Kirtland, Ohio. Aron makorehian na usab ang mga sayop, makahatag og katin-awan sa gigamit nga mga pulong, ug pag-ila sa mga kalamboan sa doktrina ug organisasyon sa Simbahan, si Joseph Smith miasikaso sa paghimo og mga koreksiyon sa mga teksto sa ubang mga pagpadayag aron maandam alang sa pagmantala niadtong 1835 isip ang Doctrine and Covenants of the Church of the Latter Day Saints. [Doktrina ug mga Pakigsaad sa Simbahan sa mga Santos sa Ulahing mga Adlaw.] Si Joseph Smith mihatag og pagtugot sa laing edisyon sa Doktrina ug mga Pakigsaad, nga gimantala mga bulan lamang human sa pagkamartir sa Propeta niadtong 1844.

Bililhon kaayo sa unang mga Santos sa Ulahing mga Adlaw ang mga pagpadayag ug nagtan-aw niini isip mga mensahe gikan sa Dios. Sa usa ka okasyon sa ulahing bahin sa tuig 1831, adunay pipila ka elder sa Simbahan nga mihatag og sagradong pagpamatuod nga ang Ginoo mipamatuod ngadto sa ilang kalag sa pagkatinuod sa mga pagpadayag. Kini nga pagpamatuod gimantala sa 1835 nga edisyon sa Doktrina ug mga Pakigsaad isip sinulat nga pagpamatuod sa Napulog Duha ka Apostoles:

Ang Pagpamatuod sa
Napulog Duha ka Apostoles mahitungod sa Pagkatinuod sa
Basahon sa Doktrina ug mga Pakigsaad

Ang Pagpamatuod sa mga Saksi sa Basahon sa mga Sugo sa Ginoo, ang mga sugo nga Iyang gihatag ngadto sa Iyang Simbahan pinaagi ni Joseph Smith, Jun., kinsa gitudlo pinaagi sa tingog sa Simbahan alang niini nga katuyoan:

Busa, kami, mibati nga andam sa paghatag og pagpamatuod ngadto sa tanang katawhan sa kalibotan, sa matag nilalang sa ibabaw sa yuta, nga ang Ginoo mipamatuod sa among mga kalag, pinaagi sa Espiritu Santo nga naghatag kanamo og kahayag, nga kini nga mga sugo gihatag pinaagi sa pagdasig sa Dios, ug mapuslanon alang sa tanang tawo ug tinuod gayod.

Among ihatag kini nga pagpamatuod ngadto sa kalibotan nga ang Ginoo isip among tigtabang; ug pinaagi sa grasya sa Dios nga Amahan, ug sa Iyang Anak, si Jesukristo, nga kami gitugotan nga makabaton niini nga kahigayonan sa paghatag niini nga pagpamatuod ngadto sa kalibotan, diin kami nagmaya sa hilabihan, nag-ampo sa Ginoo sa kanunay nga ang katawhan makabaton og kaayohan pinaagi niini.

Ang mga ngalan sa Napulog Duha mao kini:

Thomas B. Marsh
David W. Patten
Brigham Young
Heber C. Kimball
Orson Hyde
William E. McLellin
Parley P. Pratt
Luke S. Johnson
William Smith
Orson Pratt
John F. Boynton
Lyman E. Johnson

Diha sa nagsunod nga mga edisyon sa Doktrina ug mga Pakigsaad, dugang pa nga mga pagpadayag o ubang butang nga nahibaloan nga tinuod gidugang, ingon nga nadawat ug giuyonan sa kwalipikadong mga katigoman o mga komperensiya sa Simbahan. Ang 1876 nga edisyon, nga giandam ni Elder Orson Pratt ubos sa direksiyon ni Brigham Young, mihan-ay sa nagsunod-sunod nga mga pagpadayag sumala sa petsa sa pagkadawat niini ug gibutangan og bag-ong mga ulohan nga adunay mga pasiuna sa kasaysayan.

Sugod sa 1835 nga edisyon, gidugang usab ang serye sa pito ka teyolohikanhon nga mga leksiyon; Giulohan kini og Lectures on Faith. [Mga Pamulong mahitungod sa Pagtuo]. Giandam kini aron gamiton alang sa Tulunghaan sa mga Propeta didto sa Kirtland, Ohio, gikan niadtong 1834 hangtod sa 1835. Bisan kon mapuslanon kini alang sa doktrina ug panudlo, kini nga mga pamulong giwala gikan sa Doktrina ug mga Pakigsaad sukad sa 1921 nga edisyon tungod kay wala kini ihatag o ipresentar isip mga pagpadayag ngadto sa tibuok Simbahan.

Sa 1981 nga Iningles nga edisyon sa Doktrina ug mga Pakigsaad, tulo ka dokumento ang gilakip sa unang higayon. Mao kini ang seksiyon 137 ug 138 nga nagsaysay sa mga sukaranan sa kaluwasan alang sa mga patay; ug Opisyal nga Pahayag 2, nga nagpahibalo nga ang tanang takos nga mga miyembro nga lalaki sa Simbahan mahimong i-orden sa pagkapari nga dili igsapayan ang kaliwat o kolor.

Ang matag bag-ong edisyon sa Doktrina ug mga Pakigsaad mikorehir sa nangaging mga sayop ug midugang og bag-ong impormasyon, ilabi na sa makasaysayanon nga mga bahin sa mga ulohan sa seksiyon. Ang kasamtangan nga edisyon naghatag og dugang nga katin-awan sa mga petsa ug mga ngalan sa dapit ug naghimo og ubang mga pagkorehir. Kini nga mga kausaban gihimo aron mapahiuyon kini nga materyal ngadto sa labing tukma nga makasaysayanon nga impormasyon. Ang ubang espesyal nga mga bahin niining labing bag-o nga edisyon naglakip sa inusab nga mga mapa nga nagpakita sa dagkong heyograpikanhong mga dapit diin ang mga pagpadayag nadawat, pun-an sa gipalambo nga mga litrato sa makasaysayanon nga mga luna sa Simbahan, mga pakisayran nga gikonektar sa lainlaing mga kapanguhaan og impormasyon, mga ulohan sa seksiyon, ug minubo nga mga asoy sa hilisgotan, diin kining tanan gihimo aron matabangan ang mga magbabasa nga makasabot ug magmaya sa mensahe sa Ginoo nga gihatag diha sa Doktrina ug mga Pakigsaad. Ang impormasyon alang sa mga ulohan sa seksiyon gikuha gikan sa Manuskrito sa Kasaysayan sa Simbahan ug sa gimantala nga History of the Church [Kasaysayan sa Simbahan] (nga gihisgotan diha sa mga ulohan isip ang kasaysayan ni Joseph Smith) ug ang Joseph Smith Papers. [Mga Dokumento ni Joseph Smith]