Si Anna Mipakigbahin sa Iyang Pagpamatuod
Ang tagsulat nagpuyo sa Colorado, USA.
Si Anna hilom nga milingkod sa iyang klase sa Primary. Siya mitan-aw sa hulagway ni Jesus nga gigunitan ni Sister Albo.
“Aduna bay nakahibalo kon unsa ang pagpamatuod?” Nangutana si Sister Albo.
Giisa ni Anna ang iyang kamot. “Kini nag-ingon ba nga kita nasayod nga ang Simbahan tinuod?”
“Kana kabahin niini.” Mipahiyom si Sister Albo. “Kon kita mopakigbahin sa atong pagpamatuod, kita mopakigbahin sa unsay atong nahibaloan o gituohan nga tinuod mahitungod ni Jesukristo ug sa Simbahan. Unsa ang imong nahibaloan nga tinuod, Anna? ”
Naghunahuna si Anna mahitungod niini. “Ako nasayod nga si Jesus nahigugma kanako!”
“Oo, Siya nahigugma nimo. Ikaw adunay pagpamatuod nga si Jesus nahigugma kanimo.”
Human sa pagsimba, si Mama nangutana, “Unsay imong nakat-onan sa Primary karon, Anna?”
“Akong nakat-onan unsa ang pagpamatuod. Kanus-a man ko makapaambit sa akong pagpamatuod?”
“Bisan kanus-a nimo gusto!” Miingon si Papa. “Kita mahimong adunay atong kaugalingong miting sa pagpamatuod sa atong gabii sa panimalay.”
Si Anna ganahan ana nga ideya. “Makasul-ob gani kita sa atong pang-Dominggo nga mga sinina!”
Diha sa panahon na sa gabii sa panimalay, si Anna nag-ilis sa iyang paborito nga sinina.
“Gihangop kamo sa miting sa pagpamatuod sa pamilya, ” miingon si Papa.
Ang igsoong lalaki ni Anna, si Ethan, ang miuna. “Nasayod ko nga ang ebanghelyo tinuod. Nasayod ko nga si Joseph Smith usa ka propeta. Nasayod ko nga si Russell M. Nelson mao ang atong propeta karon. Nasayod ko nga si Jesukristo buhi.”
Dayon turno na ni Anna. Mitindog siya. “Gimahal nako pag-ayo si Jesus. Nasayod ko nga Siya nagmahal kanako. Siya nagpakabana kabahin nako ug mohimo kanako nga magmalipayon. Sa ngalan ni Jesukristo, amen.” Ang iyang kasingkasing mibati og kamainiton.
Gigakos siya ni Mama. “Salamat, Anna. Akong mabati kon unsa nimo ka mahal si Jesus.”
Mipahiyom si Anna. “Ang pagpaambit sa akong pagpamatuod nakapalipay kanako.”
Mga paghulagway ni Joanne Lew Vriethoff