Ang Desisyon Bahin sa Droga
Kinahanglan ba nakong sultihan ang usa ka tawo? Naghunahuna si Alvin.
“Buhata gyud kon unsa ang matarung.” (Mga Himno, nu. 145).
Mitingog na ang bagtinganan [bell] sa tibuok dulaanan. Natapos na ang recess. Gihipos ni Alvin ang iyang basketball ug milakaw padulong ngadto sa klasehanan.
“Palihog og lingkod ug ipagawas ang inyong mga libro sa math,” miingon ang iyang magtutudlo, si Mrs. Hall.
Milingkod si Alvin ug mikuot sa iyang bag para sa eskwelahan. Dayon nakadungog siya og tuktok sa pultahan sa klasehanan. Gitubag kini ni Mrs. Hall ug misugod sa pagpakig-istorya sa laing magtutudlo.
Pipila lamang ka lamesa sa unahan, sila si Blake ug Jared misugod sa paghinunghongay.
“Pssst! Tan-awa unsay akong nakit-an!”
“Oy!”
“Gusto nimong sulayan kini human sa klase?”
Unsay nahitabo? Naghunahuna si Alvin.
Igo lang gayod niyang makita sila si Blake ug Jared sa kilid sa iyang mata. Ingon og ang usa kanila nagpagawas og gamay nga plastik nga pakete sa iyang bulsa.
Hulat usa, drogas ba kadto?!
Mas paspas nga mipitik ang kasingkasing ni Alvin. Ang iyang mga ginikanan nakig-istorya kaniya ug sa iyang mga igsoon kaniadto mahitungod sa drogas. Nasayod siya nga ang drogas supak sa Pulong sa Kaalam ug nga kini makadaot sa inyong lawas ug utok. Nasayod usab siya nga delikado ang pagtomar og tambal nga dili inyo.
Unsay akong buhaton? Naghunahuna si Alvin. Mitan-aw siya sa palibot. Kadto nga drogas mahimong makapasakit og usa ka tawo! Daw walay usa sa ubang mga bata ang naghatag og pagtagad. Kinahanglan ba nakong sultihan ang usa ka tawo? O magpakaaron-ingnon lang nga wala ako nakakita niini?
Naglisod si Alvin sa pagpokus panahon sa math. Dili siya makapokus atol sa panahon sa pagbasa. Sa tingpaniudto, mibati siya nga daw adunay bato sulod sa iyang tiyan.
“OK ra ka?” nangutana ang iyang higala nga si Mitch.
Mikibo si Alvin.
“Unsay nahitabo? Sultihi kami,” miingon ang iyang higala nga si Hazel.
Busa si Alvin misulti kanila mahitungod sa unsay iyang nakita. “Nagtuo ako nga kinahanglan nakong sultihan si Mrs. Hall.”
“Apan unsa kaha kon mahibaloan nila nga ikaw kadto?” Miingon si Mitch. “Basin masuko sila og maayo kanimo.”
Miuyon si Alvin. Apan ang lain nga pamati sa iyang tiyan wala mawala. Sa kataposan mihimo siya og desisyon. Sultihan niya ang ilang magtutudlo.
“Mokuyog ko nimo,” miingon si Hazel.
Nakit-an nila ni Alvin ug Hazel si Mrs. Hall sa iyang klasehanan.
“Mrs. Hall?” Nangutana si Alvin. “Mahimo bang makig-istorya kami kanimo sa pribado?”
“Siyempre,” miingon si Mrs. Hall. “Unsay akong ikatabang kaninyo?”
“Kanang … ,” miingon si Alvin. Mabination nga mipahiyom si Mrs. Hall. Kana mihimo kaniya nga mobati nga maisogon. “Nakit-an nako sila si Blake ug Jared nga adunay drogas sa klase karong adlawa. Gibati nako nga kinahanglan nakong isulti kanimo.”
“Gibuhat nimo ang husto nga butang,” miingon si Mrs. Hall. “Mahimo kang kanunay nga moanhi aron makig-istorya kanako kon makakita ka og usa ka problema. Akoy bahala niana.”
Nanghupaw og dako si Alvin. Nawala ang bug-at nga pagbati.
Nianang hapona, ang kaabag sa prinsipal miabot sa ilang lawak ug gitawag sila si Blake ug Jared nga mogawas ngadto sa pasilyo.
Ang mga batang lalaki wala mobalik ngadto sa klase sulod sa tulo ka adlaw.
Sa dihang sa kataposan nga mibalik na sila, gikulbaan si Alvin nga makakita kanila pag-usab.
Unsa kaha kon nadiskobrehan nila nga ako ang misulti sa magtutudlo? naghunahuna siya. Unsa kaha kon suko kaayo sila kanako?
Apan milingkod ug nagkomedyahay lamang sila sa usag usa, sama sa naandan.
“Diin man kamo gikan?” nangutana ang lain nga kauban sa klase kanila.
“Kuan … kanang … nasakpan kami sa usa ka dili maayo nga butang sa eskwelahan,” miingon si Blake. “Mao nga gipapauli kami.”
Ang tanan nagpadayon sa pag-istoryahanay, ug sa kataposan mikalma si Alvin. Nalipay siya nga misulti siya mahitungod sa drogas aron sa pagtabang nga mapabiling luwas ang uban. Gusto siya nga mohimo og maayo nga mga pagpili aron sa pagpabilin sa iyang lawas nga luwas ug himsog.
Paghulagway pinaagi ni Mark Robison