Mga Pioneer sa Matag Yuta
Olga Šnederfler
Unang Matron sa Templo gikan sa Czechoslovakia
Nasayod si Olga nga moadto siya sa templo usa ka adlaw.
Gitutokan ni Olga ang litrato sa templo nga nagbitay sa iyang bungbong. Nanghupaw siya. Kon makaadto lamang ang iyang pamilya sa templo! Apan walay mga templo sa duol, ug lisod kaayo nga mobiya sa iyang nasod.
Nabunyagan si Olga pipila ka tuig ang milabay. Apan dayon ang mga misyonaryo napugos sa pagbiya sa nasod. Ang mga miyembro sa Simbahan wala na gitugotan nga moadto sa simbahan. Dili gani sila mahimong moistorya sa uban mahitungod sa ilang pagtuo.
Nagpadayon gihapon si Olga sa pagsunod sa ebanghelyo. Mao usab ang iyang bana, si Jirí. Nag-ampo ug nagbasa sila sa mga kasulatan. Nagpahigayon sila og home evening ug mitudlo sa ilang mga anak. Sa matag Dominggo, nagpahigayon sila og miting sa sakramento diha sa ilang gamay nga apartment. Misab-it sila og daghang litrato sa templo.
Ug sa dihang si Olga ug ang iyang pamilya mibati nga nag-inusara, gihinumdoman nila nga adunay liboan ka miyembro sa Simbahan sa tibuok kalibotan.
Usa ka adlaw adunay makapahinam nga butang nga nahitabo. Si Presidente Russell M. Nelson, ang Kinatibuk-ang Presidente sa Sunday School, miabot sa ilang nasod aron mobisita. Mipahiyom si Olga samtang milamano siya sa kamot ni Presidente Nelson. Dayon siya mihimo kaniya og espesyal nga saad. “Sister, usa ka adlaw moadto ka sa templo.”
Mibati nga mainiton ang kasingkasing ni Olga. “Salamat,” mihunghong siya.
Milabay ang mga bulan. Dayon ang katuigan. Mahandomon nga mitan-aw si Olga sa mga litrato sa templo nga nagbitay sa mga bungbong. Ang pag-adto sa templo ingon og imposible!
Human sa upat ka tuig, si Olga ug si Jirí gidapit nga motambong sa kinatibuk-ang komperensiya sa Siyudad sa Salt Lake, Utah, USA. Nabalaka si Olga nga dili sila makaadto. Lisod gihapon ang mga butang sa ilang nasod. Magkinahanglan kini og daghang papeles aron makabiyahe. Apan bisan pa man nagmalamposon ang tanan. Gikulbaan si Olga samtang ang ilang eroplano milupad padulong sa Estados Unidos. Usa kadto ka milagro!
Si Olga ug si Jirí mitambong sa komperensiya ug naminaw sa propeta. Nakakita sila sa Temple Square ug nakaadto sa visitors’ center. Apan ang kinanindotan nga bahin mao ang pagsulod sa templo!
Nagsul-ob og puti, mibati si Olga nga siya ingon og anaa sa langit samtang mihimo siya og espesyal nga mga saad sa Dios. Nasilyo gani siya ngadto kang Jirí. Ang saad ni Presidente Nelson natinuod!
Mipauli si Olga ug si Jirí. Sa paglabay sa panahon, miarang-arang ang mga butang sa ilang nasod. Sa kataposan nakahimo na sila sa pagsimba, ug ang mga misyonaryo makatudlo na usab.
Usa ka adlaw mibagting ang telepono. Si Presidente Thomas S. Monson kini. Gitawag niya si Olga nga mahimong matron sa Templo sa Freiberg Germany. Si Jirí mao ang mahimong presidente sa templo.
Mipahiyom si Olga samtang nagbarog siya sa iyang taas, puti nga sinina sulod sa Templo sa Freiberg. Ang templo kaniadto daw layo kaayo. Apan karon mahimo niya kining mahalon kada adlaw! Kini usa ka talagsaon nga damgo nga natinuod.
Ang dapit nga gipuy-an ni Olga sa wala madugay nahimong kabahin sa Czech Republic.
Adunay gatosan ka kastilyo sa Czech Republic.
Ang usa ka matron sa templo mao ang usa ka babaye nga lider diha sa templo.
Si Olga adunay sobra sa 20 ka litrato sa templo diha sa iyang apartment.
Siya ug Jirí adunay anak nga lalaki ug anak nga babaye.
Gitipigan niya ang usa ka libro sa hulagway nga adunay mga litrato sa mga misyonaryo nga mitudlo kaniya.
Mga paghulagway pinaagi ni Shawna J. C. Tenney