Kinsa ang Atong Matabangan?
Ang tagsulat nagpuyo sa Utah, USA.
Kini nga istorya nahitabo sa Auckland, New Zealand.
Ang pamilya ni Tadiana mipakigbahin sa ilang tanaman. Karon unsa pa ang mahimo nilang ipakigbahin?
“Mopadayon sa unahan uban ang … usa ka gugma sa Dios ug sa tanan nga mga tawo” (2 Nephi 31:20).
“Andam na ka nga putlon ang mga saging?” Nangutana si Papa. Mitan-aw si Tadiana uban sa iyang mga igsoon, sila si Alicia ug si Kavi. Migamit si Papa og kutsilyo sa pagputol sa daghang pundok sa mga saging.
Maayo ang tubo sa mga tanom niining tuiga! Apan daghang uban nga mga butang ang lisod. Dihay quarantine sa New Zealand tungod sa coronavirus. Wala makakita si Tadiana sa iyang mga higala o makaadto sa eskwelahan. Apan nalipay siya nga nakagahin siya og daghan kaayong panahon uban sa iyang pamilya.
Midako ang mga mata ni Kavi samtang mitutok siya sa tanang bunga. “Dili posible nga makaon nato kanang tanan kon kita lang!” miingon siya.
Mitando si Mama. “Segurado ko nga ganahan og pipila ka saging si Sister Banks. Wala na siya makatrabaho sa iyang tanaman sukad namatay ang iyang bana.”
“Nahibalo ako nga si Sister Finau nag-inusara usab,” miingon si Tadiana. “Mahimo kong magdala og pipila ka saging ngadto kaniya!”
“Kinsa pa?” Miingon si Papa. Milingkod silang tanan sa kasagbotan. Mihimo sila og lista sa mga tawo nga tingali nagkinahanglan og gamay nga tabang.
Pagkasunod adlaw gipuno nila ang mga sako og mga pechay, kamote, ug saging. Milibot si Mama ug Papa sa kasilinganan. Sa matag balay diha sa ilang lista nagbilin sila og usa ka sako.
Milili si Tadiana sa bintana sa sakyanan ug mitan-aw kang Sister Banks nga nag-abli sa pultahan. Gigamit ni Sister Banks ang iyang sungkod aron hinay nga molakaw padulong sa bag. Dako kaayo ang iyang pahiyom nga makita kini ni Tadiana bisan og mibiya na sila sa ilang sakyanan.
Mibati og mainiton, malipayon nga pagbati si Tadiana. Apan mibati usab siya nga naguol og gamay. Kauban niya ang iyang pamilya atol sa quarantine. Apan si Sister Banks nagpuyo nga nag-inusara ra gayod. Tingali wala siyay bisan kinsa nga nakaistorya sulod sa pipila ka semana!
“Nagtuo ko nga adunay lain nga butang nga atong mahimo alang sa atong mga silingan,” miingon si Tadiana. “Unsa kaha kon dapiton nato sila sa usa ka video call alang sa atong pamilya nga gabii sa kasulatan?”
“Nindot kaayo kana nga ideya!” miingon si Papa.
Sa dihang nauli na sila, gitawagan ni Tadiana si Sister Banks. “Hi, Sister Banks! Ang among pamilya magpahigayon og gabii sa kasulatan karong gabii. Gusto ba nimong moapil sa video call niini?”
“Ganahan gayod ko!” Miingon si Sister Banks. Human niana nga tawag, gihatag ni Tadiana ang telepono kang Alicia. Nagpuli-puli sila sa pagtawag sa mga tawo sa ward ug sa pagdapit kanila.
Nianang gabhiona gikulbaan nga naghulat diha sa kompyuter si Tadiana. Moapil ba kaha ang mga tawo? Dayon, sa tagsa-tagsa mipakita ang mga nawong sa ilang mga silingan diha sa screen sa kompyuter. Ang uban kanila naglisod sa paggamit sa teknolohiya, mao nga gitabangan sila ni Mama.
Ang usa ka babaye mipakita og usa ka plato sa hokey pokey (honeycomb toffee). “Nahibalo ako nga walay usa kaninyo ang makakaon niini,” miingon siya. “Apan mahinamon kaayo ko alang karong gabhiona nga nagluto ko og espesyal nga panam-is [dessert]! Tingali mahimo kamong magpakaaron-ingnon nga simhoton kini diha sa screen!”
Nangatawa ang tanan ug nag-istoryahanay mahitungod kon sa unsang paagi sila migahin sa ilang mga adlaw. Daghang mga tawo ang naglisod, apan kini mihimo sa tanan nga mas malipayon nga makaistorya ang usag usa.
Sa dihang nahuman na sila og istoryahanay, mipaambit og kasulatan si Tadiana, 2 Nephi 31:20: “Mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaum, ug usa ka gugma sa Dios ug sa tanan nga mga tawo.”
Aduna silay mubo nga leksyon ug nagpuli-puli sa pagbasa gikan sa mga kasulatan. Dayon nag-ampo si Kavi.
“Hinumdomi nga mobalik sa sunod semana!” Miingon si Tadiana. Tagsa-tagsa ang mga tawo nanamilit ug mibiya sa tawag.
Sa dihang mibiya na ang kataposan nga tawo, gipundok ni Mama ug Papa ang pamilya sa usa ka dako nga gakos sa grupo. Nalipay si Tadiana nga siya ug ang iyang pamilya nakatabang sa ilang mga silingan. Silang tanan mopadayon sa unahan og dungan.
Mga paghulagway pinaagi ni Liz Brizzi