Ang Importanting Bisita
Ang mga tagsulat nagpuyo sa Dar Es Salaam, Tanzania, ug Utah, USA.
Sa unsang paagi makatabang si Ammon sa iyang pamilya sa pagdawat sa ilang importanting bisita?
“Pagtukod og usa ka balay sa kahusay, usa ka balay sa Dios” (Doktrina ug mga Pakigsaad 88:119).
Sabado kadto sa hapon. Gusto ni Ammon nga maglingaw-lingaw.
“Mama,” miingon siya, “pwede ko mogawas ug magdula?”
“Kinahanglan imong limpyohan una ang imong kwarto,” miingon si Mama.
“Pero, Mama,” miingon si Ammon, “dili ba makahulat ang akong kwarto?”
“Aduna tay gustong dapiton nga importante nga mahimo natong bisita. Busa gusto nato nga ang atong balay mahimong limpyo ug hapsay.”
“Usa ka importanting bisita?” Miingon si Ammon. “Sa atong panimalay?”
“Oo, ug makatabang ka sa pagdapit kaniya,” miingon si Mama. “Busa adto na ug limpyohi ang imong kwarto.”
Naghinam-hinam si Ammon. Ganahan siya nga adunay mga bisita. Naghunahuna siya kon kinsa kaha ang bisita. Ang mayor? Ang principal gikan sa eskwelahan? Tingali ang bishop!
Miadto si Ammon sa iyang kwarto. Una nakit-an niya ang iyang bulingon nga medyas diha sa salog. Gibutang niya kini sa basket alang sa mga labhanan. Dayon gipahimutang ni Ammon ang iyang libro sa eskwelahan diha sa lamesa. Gusto siya nga ang bisita masayod nga ganahan siyang makakat-on og bag-ong mga butang.
Ang igsoong babaye ni Ammon, si Angel, miadto sa iyang kwarto. “Unsay imong gibuhat?” nangutana siya.
“Si Mama miingon nga kita adunay importanting bisita,” miingon si Ammon. “Mihangyo siya nako sa pagtabang aron maandam alang niya.”
Mihangad silang duha aron motan-aw ni Mama diha sa pultahan.
“Unsa pay atong mabuhat aron maandam?” Miingon si Ammon. “Gusto nato nga ang atong importanting bisita mobati nga giabi-abi.”
“Unsay imong mga ideya?” nangutana si Mama.
“Kita makasulti og karibu,” miingon si Ammon. Sa Swahili kana nagpasabot nga, “Ikaw gihangop sa among balay. Malipay kami kon ikaw mosulti.”
“Kita makapaminaw,” miingon si Angel. “Importante ang pagpaminaw.”
“Kana mga maayong ideya,” miingon si Mama. “Tan-awon nato unsa ang isulti ni Baba (Papa) kon makauli na siya sa balay.”
Mga usa ka oras, miabot si Baba.
Naghulat si Ammon. “Si Mama nag-ingon nga kita magdapit og usa ka espesyal nga bisita sa atong balay. Nangandam na kami.”
Mipahiyom si Baba. “Nalipay ko. Dali. Lingkod. Mag-istoryahanay kita. Angel, anhi usab dinhi palihog.”
Sa dihang nagkatapok na sila, si Baba miingon, “si Mama ug ako nag-istoryahanay bahin sa atong espesyal nga bisita ug unsay atong mabuhat aron sa paghimo kaniya nga mobati nga giabi-abi. Una, sultihan ko kamo kon si kinsa ang atong bisita. Kini mao ang Espiritu Santo. Siya mao ang labing importanting bisita sa tanan.”
Nagtinan-away sila si Ammon ug si Angel sa usag usa. Dili kana mao ang gipaabot ni Ammon!
“Ug Siya ang bisita nga atong madapit nga magauban kanato sa tanang panahon,” miingon si Mama. “Angel, human ka mabunyagan ikaw gikompirmahan. Ug ikaw nahatagan og usa ka gasa. Nakahinumdom ka ba unsa ang gisulti ni Baba nga panalangin?”
“Siya misulti kanako sa pagdawat sa Espiritu Santo.”
“Husto kana,” miingon si Mama. “Ikaw gidapit sa pagdawat sa Espiritu Santo. Busa, Ammon, sa dihang misulti ko nimo nga makatabang ka sa pagdapit Kaniya, unsa ang akong gipasabot? ”
Naghunahuna si Ammon. Nagplano siya sa paghimo og kard aron sa pagdapit sa ilang bisita. Apan unsaon niya pagdapit sa Espiritu Santo? “Siguro nga pinaagi sa pagbuhat og mga butang aron makapahimo Niya nga mobati nga giabi-abi, ako modapit Kaniya,” miingon si Ammon.
“Sakto kana!” Miingon si Baba. “Usa ka paagi nga kita mahimong modapit Kaniya sa atong panimalay mao ang paghimo niini nga hinlo ug limpyo.”
“Mao ba kana ang hinungdan nganong si Mama gusto nga kami manglimpyo sa among mga kwarto?” Nangutana si Ammon.
“Oo!” Miingon si Mama. “Unsa pa ang atong mahimo aron kita makadapit Kaniya nga mag-uban kanato?”
“Mahimo kitang mag-ampo,” miingon si Ammon. “Ug mobasa sa mga kasulatan.”
“Kita mahimong maminaw sa maayong mga musika,” miingon si Angel. “Kita mahimong manganta og dungan sa mga himno.”
“Kita mahimong magbinuotan ug dili mag-away,” miingon si Ammon.
“Husto kana,” miingon si Baba. “Kon maningkamot kita sa pagbuhat sa gitudlo ni Jesukristo, kita magdapit sa Espiritu Santo nga mag-uban kanato. Ug Siya motabang sa atong panimalay nga mahimong usa ka dapit diin kita mobati og gugma ug kalinaw.”
Naghunahuna si Ammon sa makadiyot. “Eksakto ka, Baba. Ang Espiritu Santo mao ang usa sa labing importanting mga bisita sa tanan!”
Mga paghulagway ni Mark Jarman