Higala ngadto sa Higala

Kalinaw pinaagi sa Gahom sa Pagkapari

Ni Elder Steven R. Bangerter

Sa Seventy

Gikan sa usa ka interbyu ni Lucy Stevenson Ewell.

Sa dihang nagtubo ko, ang akong lawas nanglimbasog sa gamma globulin anemia. Naglisod ako sa pagkombate sa mga kagaw, mao nga sige ako og kasakit.

Usa ka gabii nakamata ako nga sakit kaayo ang akong mga dalunggan. Sakit kaayo kini nga nagtuo ako nga mobuto ang akong ulo! Nakahinumdom ako nga misulod ang akong mama ug papa sa akong kwarto. Milingkod ang akong mama sa kilid sa higdaanan ug gikugos ako diha sa iyang mga bukton. Dayon ang akong amahan mibutang sa iyang mga kamot sa akong ulo ug mihatag kanako og panalangin sa pagkapari. Niana nga panalangin, misulti siya kanako nga ang akong Amahan sa Langit nakaila kanako. Nakahibalo Siya sa akong kasakit. Mopanalangin Siya kanako nga makatulog sa tibuok gabii.

Sa wala madugay mikalma ako, nakatulog, ug natulog sa tibuok gabii ug hangtod sa ulahing bahin sa kabuntagon. Sa dihang nakamata ako, ang akong mga dalunggan mibati nga mas maayo. Apan milungtad gihapon kini og pipila ka tuig sa wala pa ako hingpit nga naayo gikan sa akong sakit.

Sulod sa sunod nga pipila ka tuig, ang akong amahan nagpadayon sa paghatag kanako og mga panalangin sa pagkapari aron sa paghatag kanako og kalig-on. Gitudloan ko niya nga kadto nga mga panalangin mao ang mga kahigayonan alang sa Langitnong Amahan nga makigsulti kanako. Ang akong sakit nahimong usa ka paagi alang sa Langitnong Amahan nga motabang sa akong pagtuo nga molambo.

Ang mga panalangin sa pagkapari anaa alang kaninyo ug sa tanang anak sa Langitnong Amahan. Kitang tanan adunay lain-lain nga mga hagit. Nagpuyo kita sa lain-lain nga mga dapit ug adunay lain-lain nga mga pamilya. Ang pipila kaninyo tingali walay amahan nga makahatag kaninyo og mga panalangin sa pagkapari. Hinoon makapangayo kamo og tabang sa inyong tigpangalagad nga mga brother o sa mga lider sa Simbahan.

Usa ka butang ang pareha alang kanatong tanan. Kini mao ang gugma sa atong Langitnong Amahan alang kanato. Kitang tanan managsama sa panan-aw sa Dios. Ang Langitnong Amahan gusto nga mopanalangin kanatong tanan pinaagi sa Iyang gahom sa pagkapari.

Gusto ko nga masayod kamo nga ang Langitnong Amahan nakaila ug nahigugma kaninyo. Nakaila Siya sa inyong ngalan. Nagtinguha Siya sa pagtabang kaninyo tungod sa Iyang gugma alang kaninyo.

Paghulagway pinaagi ni Ben Simonsen