Imong Sinulat
Kahupayan gikan sa Higala
Usa ka adlaw nagbisikleta ko pauli sa balay gikan sa eskwelahan. Samtang nagkaduol ko sa akong balay, nakit-an nako ang akong mama nga naggunit sa among bag-ong itoy. Naghinam-hinam ko nga makakita nila, mao nga dali kong miambak sa akong bisikleta. Sa kalit lang, nakadungog ko og dakong lagapak! Midulot ang kasakit sa akong tuo nga bukton. Maglisud ko sa pag-isa niini.
Gidala ko ni mama sa ospital. Sa dihang miabot kami, ang doktor mipa-X-ray sa akong bukton. Miingon siya nga ako adunay cyst sa akong mga bukog. Wala ko kahibalo kon unsa kadto, mao nga siya mipasabot. “Ang usa ka cyst sa bukog mao kanang bahin sa bukog nga haw-ang ug puno sa tubig,” miingon ang doktor. “Mao nga dali ra kining mabuak.”
Ang doktor miingon nga tingali kinahanglan ko nga maoperahan. Kana makahadlok nga paminawon. Misulti siya kanamo nga siya makigkita kanamo sa pipila ka semana aron makadesisyon kon kinahanglan ko nga maoperahan o dili. Sukad niana, kinahanglan ko nga magsul-ob og banting alang sa akong bukton. Sa among pagpamauli, nagsige ko og pag-ampo diha sa akong hunahuna. Langitnong Amahan, palihog tabangi ko nga magmaisugon. Makahadlok gyod kini kaayo. Palihog tabangi ko nga magmasaligon.
Human sa usa ka bulan, nakigkita ko sa doktor aron masuta kon ako nagkinahanglan og opera. Nahadlok gihapon ko. Ang Higala nga magasin bag-ohay lang nga migawas alang sa bulan, ug misugod ko sa pagbasa niini. Ang komiks nga Mat ug Mandy mahitungod sa kon unsang paagi nabalian si Matt sa iyang mga bukton (Okt. 2019). Kinahanglan siya nga operahan. Sama nako!
Paghuman nako og basa, mibati ko og kalinaw. Nag-ampo ko sa pagpasalamat sa Langitnong Amahan sa pagtubag sa akong pag-ampo. Nasayod ko nga mahimo ko nga magmaisogon bisan unsa pay mahitabo. Nagpasalamat usab ako sa Langitnong Amahan alang sa kanunay nga pagpaminaw ngari kanako, sama sa usa ka tinuod nga higala.
Paghulagway pinaagi ni Katie Katk