Kahadlok sa Buhawi
Ang tagsulat nagpuyo sa Vermont, USA.
Makahahadlok nga mga butang ang nahitabo sa tibuok kalibotan. Unsa kaha ang mabuhat ni Josiah?
“Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17).
Sa dihang nakadungog si Josiah bahin sa buhawi, nahadlok siya. Pirmi siyang naghunahuna kabahin sa mga litrato nga iyang nakita—mga litrato sa buhawi ug mga litrato sa tanang kadaot nga nahimo niini. Sa usa ka litrato, nakakita si Josiah og gamay nga batang babaye nga nagsul-ob og pink nga botas. Siya ingon og kaedad niya ug nagbarog sa usa ka pundok sa mga natumpag nga kaniadto iyang panimalay. Unsa kaha ang mahitabo kaniya? Sa tanang tawo nga nawad-an sa ilang mga panimalay?
“Katulgon kaayo ka tan-awon,” miingon si Mama pagkasunod buntag. “OK ra ba ka?”
Mikibo si Josiah.
Gihikap ni Mama ang iyang nawong. “Walay hilanat. Tan-awon nato kon mahimong maayo ang imong pamati atol sa pamahaw? Nagluto si Papa og mga pancake.”
Sa kosina, nagbarog si Papa tupad sa sug-angan, nga nagbali-bali sa mga pancake. Sige siya og pasiplat sa iyang telepono.
“Daghan kaayong kadaot gikan sa buhawi,” miingon siya. “Liboan gihapon ang walay kuryente.”
“Hinaot nga mabalik na kini kanila sa dili madugay,” miingon si Mama. Siya ug si Papa mipadayon sa pag-istorya mahitungod sa buhawi. Milingkod si Josiah sa lamesa. Gibutang niya ang iyang ulo sa iyang mga kamot.
“OK ra ka, dong?” Nangutana si Papa.
Mihangad si Josiah. “Nahadlok ko,” miingon siya. “Magkanaa ba kita og buhawi? Dili ko gusto nga atong balay mapalid.” Misugod siya sa paghilak.
Milingkod si Mama ug gigakos si Josiah.
“Wala kita masayod kon adunay makahahadlok nga butang ang mahitabo kanato, apan makasalig kita sa Langitnong Amahan nga motabang kanato bisan unsa pay mahitabo.”
“Apan unsaon man kadtong tanan nga tawo diha sa buhawi?” Miingon si Josiah. “Nganong wala man sila tabangi sa Langitnong Amahan?”
“Ang Langitnong Amahan kay nagtabang kanila,” miingon si Papa. Gibutang niya ang usa ka dakong pundok sa mga pancake diha sa lamesa. “Dili Niya hunongon ang tanang dili maayo nga mga butang nga mahitabo, apan ang Langitnong Amahan kanunay nga motabang sa Iyang mga anak.”
“Giunsa man?” Miingon si Josiah.
“Kuan, usahay magpadala Siya og gagmay nga mga milagro, o motabang sa mga tawo nga mobati og kahupayan, o modasig sa ubang mga tawo nga motabang.”
Mitando si Mama. “Sa daghang higayon, ang Langitnong Amahan nagtabang sa ubang mga tawo pinaagi nato.”
“Kahinumdom ka sa dihang ang mga Johnson nasunogan ug gidapit nato sila nga mopuyo uban kanato? Gipakigbahin nimo ang imong kwarto,” miingon si Papa.
“Ug nakigdula ka sa gamayng bata aron makatabang kami kanila sa pagtukod og balik sa ilang balay,” midugang si Mama. “Dako kaayo kadto nga tabang. Karon ang mga Johnson nabalik na sa ilang panimalay.”
Mipahiyom si Josiah. Ganahan siya sa pagtabang sa mga Johnson. Ang Langitnong Amahan ba kadto nga nagtabang pinaagi kaniya?
“Ug dayon dihay spaghetti nga panihapon aron sa pagtigom og kwarta alang sa mga tawo nga naigo sa linog,” miingon si Papa.
“Mitabang ko sa pagpanilhig sa salog,” miingon si Josiah.
“Oo, gihimo nimo,” miingon si Papa.
“Unsa pod kabahin sa mga tawo nga duol sa buhawi?” nangutana si Josiah. “Makatabang ba kita kanila?”
“Nagtuo ko nga ang Langitnong Amahan nagdasig kanimo sa pagtabang. Sa imong hunahuna unsa kaha ang atong mabuhat?” nangutana si Mama.
“Makatabang ba ang kwarta sa akong adlawng natawhan?” nangutana si Josiah. “Anaa pa kini kanako.”
“Oo, makatabang kana,” miingon si Mama. “Si Papa ug ako adunay gamayng kwarta nga atong mapadala usab.”
Mitan-aw si Josiah sa mga pancake. Kini ingon og lamian. “Mahimo ba nga ako ang mag-ampo?”
“Pwede kaayo,” miingon si Papa.
Miduko si Josiah. Nagpasalamat siya sa Langitnong Amahan alang sa ilang pagkaon ug sa pagtabang kanunay sa Iyang mga anak. Dayon nag-ampo si Josiah alang sa mga tawo nga naangol tungod sa buhawi. Nangutana siya aron masayod pa og dugang nga mga paagi nga siya ug ang iyang pamilya makatabang.
Pagkahuman, mikaon og daghang pancake si Josiah. Dunay daghang paagi sa pagtabang! Ug si Josiah mibati nga mas maayo.
Paghulagway pinaagi ni Kasia Dudziuk