Talanoaʻi mai ha Meʻa Mālie
Naʻe hokosia e taimi mohé. Ka naʻe teʻeki ai ke fiemohea ʻa Samu.
Naʻá ne pehē, “Mami, talanoaʻi mai angé ha meʻa mālie. Fakamatala angé ki he taimi naʻá ke kei siʻi aí.”
Naʻe talaange ʻe Mami, “Pe sai.” Naʻá ne amoamohi hono ʻulú. Naʻá ne fakakaukau ʻi ha kiʻi taimi.
Naʻe pehē ʻe Mami, “ʻI heʻeku kei siʻí, naʻa mau manako ke fakamuna ʻo langa ha ngaahi kolo. Naʻa mau ngaohi ha ngaahi fale mei he ʻū kafú mo e seá. Ne ʻi ai ha ngaahi ngāue fakangalingali ʻa hoku ngaahi tokouá mo e tuongaʻané kotoa.”
“Ko e hā hoʻo ngāué?” Ko e fehuʻi ange ia ʻa Samú.
“Naʻá ku fakalele e falekoloá. Naʻa mau faʻu ha ngaahi koini pepa. Te ke lava ʻo fakatau ʻaki ha meʻakai mo ha ʻū nusipepa. Naʻa mau saiʻia ʻaupito he vaʻinga fakataha ʻi homau koló.”
“Ko e hā mo ha toe meʻa kehe naʻá ke fakahoko?” Ko e fehuʻi ange ia ʻa Samú.
“ʻI ha taimi ʻe taha ne mau langa ai ha tauhiʻanga ʻo e fanga monumanú ki homau koló. Naʻa mau fakaʻaongaʻi ʻemau fanga monumanu ne ngaohi mei he tupenú.”
Naʻe puke hake ʻe Samu ʻene kiʻi tamapua peá. “Hangē ko ʻení?”
Naʻe pehē ange ʻe Mami, “Hangē tofu pē ko iá. Ne lava ke omi e kakaí ʻo sio ki he fanga monumanú.”
Naʻe fāʻofua ʻa Samu ki heʻene kiʻi tamapua peá. “Mami, talanoa mai ha meʻa lahi ange.”
“Naʻa mau fetohiʻaki foki. Naʻa mau faʻo ia ʻi ha ngaahi puha meili fakangalingali. Ko hoʻo faʻētangatá naʻe tufa meilí. Naʻá ne ʻomi e meilí ki homau ngaahi falé. Naʻe fakafiefia ke maʻu ha ngaahi tohi.”
Naʻe fie faitohi ʻa Samu! Mahalo te ne lava ʻo tohi ʻapongipongi.
Naʻe pehē ange ʻe Mami, “Taimi ʻe niʻihi naʻa mau fakafekiki. Ka naʻa mau kole fakamolemole pea mau toe feinga pē. Naʻa mau ako ke feohi lelei mo fiefia.”
Naʻe pehē ange ʻe Samu, “Hangē pē ko au mo ʻEvá.”
“ʻIo,” ko Mami ange ia. “ʻO pehē tofu pē. ʻOkú mo ako foki ke feohi lelei ange.”
Naʻe pehē ange ʻe Samu, “Ko ha talanoa lelei ia. Te ke talanoaʻi mai ha meʻa mālie ʻe taha ʻapongipongi?”
Naʻe pehē ange ʻe Mami, “ʻIo. Te u talanoaʻi atu fekauʻaki mo e taimi naʻe kei siʻi ai hoʻo tamaí.”
Naʻe ʻuma ʻa Mami kia Samu. Naʻá ne fusi hake hono sipi kafú.
Naʻe pehē ange ʻe Samu, “Mohe ā.” Naʻá ne kuikui leva ʻo fakakaukau ki he ngaahi tauhiʻanga ʻo e fanga monumanú mo e fanga kiʻi koló mo e ʻū koini pepá.