Ongo Kaungāmeʻa ʻi he Palaimelí
Naʻe fakafiefia ange ʻa e Palaimelí ʻi he taimi naʻe tokoniʻi ai ʻe Lisi ʻa ʻEpí.
“Ka ke ʻi he kakai tuí ko e fakaʻilonga” (1 Tīmote 4:12).
Naʻe faʻa fakakaukau ʻa Lisi naʻe taʻeoli ha ngaahi hiva Palaimeli lahi. Naʻá ne saiʻia ʻi he niʻihi fekauʻaki mo Sīsuú, ka naʻá ne ongoʻi taʻeoliʻia he niʻihi naʻe fakakatá. Naʻá ne faʻa tangutu fakatoupīkoi pē mo puʻaki fakapikopiko ʻa e ngaahi leá.
Ka naʻe ʻikai toe pehē ia. Naʻe hiva fiefia ʻe Lisi he taimí ni ʻa e ʻū hiva kotoa pē ʻi he fiefia taha naʻá ne lavá. Naʻá ne tangutu hangatonu. Naʻá ne hiva leʻolahi. Naʻá ne fiefia.
Koeʻuhí ko e taimi ní, naʻe tangutu ʻa ʻEpi ʻi hono tafaʻakí.
ʻI he konga kimuʻa ʻo e taʻú, ne fakahoa ʻa Lisi mo e fānau kehe ʻi heʻene kalasí ki ha Sanipiimi foʻou. Ko honau fatongiá ke tokoni ki honau kaungāmeʻa Sanipīmí ke nau ongoʻi lata ange ʻi he Palaimelí.
Naʻe hoko ʻa ʻEpi ko e kaungāmeʻa Sanipiimi ʻo Lisí. Naʻá na tangutu fakataha ʻi he Palaimelí. Naʻá na hiva fakataha. Ko e taimi pē naʻá na fesiofaki ai ʻi he lotú, ne na taʻataʻalo pe fāʻofua maʻu pē.
Naʻe saiʻia ʻaupito ʻa Lisi he sio kia ʻEpi he Sāpate kotoa pē. Pea naʻá ne ʻiloʻi naʻe saiʻia ʻaupito ʻa ʻEpi ke sio kiate ia. Naʻe siofi lahi ia ʻe ʻEpi. ʻI he taimi naʻe hiva leʻolahi ai ʻa Lisí, naʻe pehē pē mo ʻEpi. ʻI he taimi naʻe kūnima ai ʻa Lisi ʻo tangutu ʻi he loto-ʻapasiá, naʻe pehē pē mo ʻEpi. Naʻe fie hoko ai ʻa Lisi ko ha faʻifaʻitakiʻanga lelei maʻu pē.
Naʻe loto ʻa Lisi ke saiʻia ʻaupito ʻa ʻEpi ʻi he Palaimelí. Naʻá ne loto ke fiefia ʻa ʻEpi mo ongoʻi ʻoku ʻofaʻi ia. Te na lava ʻo ako fakataha ki he ongoongoleleí!
Naʻe tangutu fakataha ʻa ʻEpi mo Lisi, ʻo pehē pē ʻi he Sāpate kotoa pē. Ka ʻi he ʻaho ní, naʻá na tangutu ʻi muʻa ʻi he fale lotú mo e toenga ʻo ʻena Palaimelí. Ko e ʻaho polokalama ʻeni ʻa e Palaimelí!
Naʻe fakatāupe ʻe ʻEpi hono ongo vaʻé peá ne malimali hake kia Lisi.
Naʻe fanafana ange ʻa Lisi, “Kuo mei hoko ho taimí.” Naʻe ʻi ai ha konga lea ʻa e fānau Palaimeli takitaha ʻi heʻenau polokalamá. Naʻe lau ʻe he fānau lalahi angé, hangē ko Lisí, ha ngaahi konga lōloa ange. Naʻe lau maʻuloto ʻe he niʻihi kei iiki angé, hangē ko ʻEpí, ha ngaahi konga lea nounou ange. Ne faʻa tokoniʻi ʻe Lisi ʻa ʻEpi ke ne ako ʻene polokalamá.
Naʻe pehē ange ʻe Lisi, “Manatuʻi pē, ke leʻolahi mo mahino ke fanongo ʻa e tokotaha kotoa pē.”
“Te ke haʻu mo au, ko ia?” Ko e lea ange ia ʻa ʻEpí. Naʻá ne manavasiʻi.
“ʻIo!” Ko Lisi ange ia. “Te u ʻi ho tafaʻakí pē. Te ke sai pē koe.”
Naʻá na tuʻu ʻo hivaʻi ha foʻi hiva mo e toenga ʻo e fānaú. Naʻe manatuʻi ʻe Lisi ʻa e ʻikai ke ne faʻa saiʻia ke kau ʻi he polokalama Palaimelí. Ka naʻe fakafiefia ʻaupito, he ʻi ai ʻa ʻEpí!
Ne hoko leva e taimi ke lea ai ʻa ʻEpí. Naʻe lue fakataha ʻa e ongo tamaiki fefiné ki he maiká. Naʻe tokoniʻi ʻe Lisi ʻa ʻEpi ke ne manga hake ki ha kiʻi tuʻunga. Naʻe tuʻu maʻu ʻa ʻEpi. Naʻá ne mataʻi ilifia.
Ne hili ʻe Lisi hono nimá ʻi he uma ʻo ʻEpí. Naʻá ne kiʻi kuku hono umá mo fanafana ange, “ʻI heʻeku ngaahi lotú …”
Naʻe mihiʻi lahi ʻe ʻEpi ʻene mānavá. “ʻI heʻeku ngaahi lotú, ʻoku ou fakahā ki he Tamai Hēvaní ʻa e meʻa ʻoku ou houngaʻia aí.” Naʻe mālohi mo mahino hono leʻó.
Naʻe malimali fiefia ʻa ʻEpi, puke e nima ʻo Lisí, peá ne puna hifo mei he tuʻungá. Naʻá na tangutu hifo kae tuʻu hake ʻa e fānau kehé ki he maiká.
“Tōatu ʻaupito koe ia ʻEpi!” Ko Lisi ange ia.
“Naʻe leʻolahi feʻunga pē mo mahino ʻeku leá?” Ko e fehuʻi ange ia ʻa ʻEpí.
“Naʻe tōtōatu ia!” Ko Lisi ange ia. “ʻOku ou tui naʻa nau ongoʻi kotoa koe ʻo aʻu ki he ʻotu muí!”
Naʻe futefute fiefia ʻa ʻEpi peá ne falala atu kia Lisi. Naʻá na fakafanongo kae lau ʻe he fānau kehé ʻa e meʻa naʻa nau houngaʻia aí.
“ʻE Lisi?” Ko ʻEpi ange ia. Naʻá ne fusiʻi hifo ʻa Lisi ke fafana ʻi hono telingá.
“ʻOku ou houngaʻia ʻiate koe!”
Naʻe malimali ʻa Lisi. “ʻOku ou houngaʻia foki mo au ʻiate koe!”
Tā fakatātā ʻa Liz Brizzi