Ngaahi Fifili ʻa Hilamaní
“Ko e ngaahi ʻīmeili pē ia. Ko e hisitōlia fakafāmili nai ia?”
“ʻE liliu ʻa e loto ʻo e fānaú ki heʻenau ngaahi tamaí” (Tokāteline mo e Ngaahi Fuakava 2:2).
Naʻe fifili ʻa Hilamani ki ha ngaahi meʻa lahi. Naʻá ne fifili fekauʻaki mo e saienisí mo e hisitōliá. Pea naʻá ne fifili pe naʻe fēfē ʻi he taimi naʻe taʻu tatau ai ʻene ngaahi kuí mo iá.
ʻI ha ʻaho ʻe taha naʻá ne ʻakahi ha foʻi pulu soka ki ha ʻā ʻi tuʻa. Naʻá ne ʻaka ia ki muʻa mo mui, ki muʻa mo mui.
Naʻá ne fakakaukau ʻo pehē, ʻOku ou fifili pe ko e hā nai e faʻahinga vaʻinga naʻe fai ʻe he fānaú ʻi tuʻa he taimi koeé. Naʻe vaʻinga soka nai mo ʻene ngaahi kuí ʻi heʻenau kei īkí?
Naʻe taʻofi ʻe Hilamani e foʻi pulú ʻaki hono vaʻé. ʻOleva angé … te ne lava ʻo ʻeke kiate kinautolu!
Naʻá ne lele oma ki fale ki he komipiutá ʻo hū ki loto ki heʻene ʻakauni ʻīmeilí. Ne ʻosi fokotuʻu ʻe Mami mo Teti ha ʻakauni maʻana toko taha pē. Naʻá ne fakaʻaongaʻi ia ke ʻīmeili ki hono fāmili naʻa nau nofo mamaʻó. Naʻá ne tangutu hifo ʻo taipeʻi ha ʻīmeili kia Kulenimā Pānesi.
ʻOku fifili ʻa Hilamani …
Ko e hā e vaʻinga naʻá ke saiʻia taha ke fakahoko ʻi tuʻa ʻi hoʻo kei siʻí? Ko au ko e soká.
ʻOfa atu,
Hilamani
Lomiʻi! Naʻá ne ʻave ʻene fehuʻí. Naʻá ne ʻave ʻa e fehuʻi tatau pē kia Kulenipā Pānesi. Hili iá, naʻá ne ʻave foki ia kia Kulenimā mo Kulenipā Uaiti.
ʻI he ʻaho hono hokó, naʻe vakaiʻi ʻe Hilamani ʻene ʻīmeilí. Naʻe ʻi ai ʻene meili foʻou ʻe ua! Naʻá ne lomiʻi ʻa e ʻuluakí ke fakaava hake.
Mālō e lelei, Hilamani!
Ko e meʻa naʻá ku saiʻia taha ke vaʻinga mo ia ʻi tuʻá ko e fanga kiʻi tamapua pepá. Naʻá ku faʻa tautau mo hoku ngaahi kaungāmeʻá ha sipi kafu ke fokotuʻu ʻaki ha kiʻi fale. Naʻá ku saiʻia foki ʻi he vaʻinga lomi pulú (jacks) mo e sikotí mo e heka ʻi heʻeku pasikalá.
ʻOfa atu,
Kulenimā Uaiti
Naʻá ne lau leva e ʻīmeili ʻa Kulenipā Uaití.
Mālō e lelei, Hilamani,
ʻI heʻeku kei siʻí, naʻe ʻikai ke ʻi ai haʻamau TV pe komipiuta. Ko ia ai ne lahi ʻemau vaʻinga ʻi tuʻá. Naʻa mau ō ʻo kakau ʻi he faʻahitaʻu māfaná, pea ʻi he faʻahitaʻu momokó naʻa mau ō ʻo sikeiti ʻi he ʻaisí. Naʻá ku saiʻia foki he vaʻinga mo hoku ngaahi kaungāmeʻá ʻi hono feinga ke maʻu ʻa e fuká.
ʻOfa atu,
Kulenipā Uaiti
Naʻe malimali ʻa Hilamani. Naʻe fakafiefia ke ako fekauʻaki mo ʻene ngaahi kuí!
Ne ʻosi atu ha ngaahi ʻaho mo e kei fifili pē ʻa Hilamani. Ko e taimi kotoa pē naʻá ne fifili aí, naʻá ne fai ha fehuʻi ki heʻene ngaahi kuí. Pea naʻá ne ako ha meʻa lahi fekauʻaki mo kinautolu!
Naʻá ne ʻilo ai naʻe kau ʻa Kulenipā Pānesi ʻi he ngaahi kalasi hulohulá. Naʻe manako ʻa Kulenimā Pānesi ke ako maʻuloto ha ngaahi foʻi lea mo faʻu ha ngaahi tohi manatu. Naʻe faʻa ilifia ʻa Kulenimā Uaiti ke hiva ʻi muʻa ʻi he kakaí. Ka naʻá ne hiva kimui ange ʻi heʻene ʻosi mei he ako māʻolungá. Naʻe ako ʻa Kulenipā Uaiti ʻi heʻene kei siʻí ki he founga hono faʻu e ngaahi sīpinga ki he vakapuná, pea naʻá ne kei saiʻia pē ke faʻu kinautolu.
Naʻe kata ʻa Hilamani ʻi heʻene lau e tohi ʻa Kulenimā Uaiti fekauʻaki mo ʻene pusi motuʻa, ko Tomí. Naʻá ne faʻa fakatui ai ha vala tamapua pea teke holo ia ʻi heʻene saliote tamapuá.
“Ko e hā e meʻa ko ʻena ʻokú ke laú, Hilamani?” Ko e fehuʻi ange ia ʻa Tetí.
Naʻe pehē ange ʻe Hilamani, “Ko ha ʻīmeili meia Kulenimā Uaiti. Ne u faʻa ʻeke ange ha ngaahi fehuʻi.”
Naʻe fakahā ange ʻe Hilamani kia Teti ʻa e ngaahi ʻīmeili kotoa naʻe feʻaveʻaki meiate ia mo ʻene ngaahi kuí.
“Ngali kuó ke tānaki ha ngaahi talanoa maʻongoʻonga ki he hisitōlia fakafāmilí!” Ko Teti ange ia. “ʻE hā kapau te tau fakahū kinautolu ki he FamilySearch?”
Ne kiʻi tafoki hake e ʻulu ʻo Hilamaní. “Ko e ngaahi ʻīmeili pē ia. Ko e hisitōlia fakafāmili nai ia?”
“ʻAupito!” Ko Teti ange ia. “Ko e taimi pē ʻokú ke ako ai fekauʻaki mo ho fāmilí, ko e hisitōlia fakafāmilí ia. Ko ha fakakaukau lelei ia ke tauhi e ngaahi talanoa ko ʻení ke tau lava ʻo manatuʻi kinautolu ʻamui ange. Ko ʻeni. Tuku ke u fakaʻaliʻali atu.”
Naʻe tokoniʻi ʻe Teti ʻa Hilamani ke hū ki loto ki he FamilySearch.org pea taipeʻi ki ai e ngaahi meʻa kotoa naʻe talaange ʻe heʻene ngaahi kuí.
“Kuo seivi he taimí ni e ngaahi talanoá koeʻuhí ke lava hotau fāmilí ʻo lau ia ʻamui ange. Hono ʻikai ke fakalata ia?” Ko e fehuʻi ia ʻa Tetí.
“ʻIo!” Ne malimali ange ʻa Hilamani. “Pea ʻoku ʻi ai haʻaku ngaahi fehuʻi lahi ange ʻoku ou fie ʻeke.”
Ngaahi tā fakatātā ʻa Gareth Conway