Ko e Kau Paionia ʻi he Fonua Kotoa Pē
ʻAnitelū Senisoni
Faihisitōlia mei Tenimaʻake
Naʻe mahuʻinga ʻa e talanoa ʻo e tokotaha kotoa pē, kia ʻAnitelū.
Naʻe toʻo hake ʻe ʻAnitelū ha peni mo fakaava hake ʻene tohinoá. Naʻá ne tohi ʻo pehē, ʻI he ʻaho ní, ʻoku ou foki mai mei heʻeku ngāue fakafaifekaú.
Naʻá ne malimali mo sio ki tuʻa ʻi he matapā sioʻata ʻo e lēlué. Naʻá ne nofo ʻi Tenimaʻake ʻi he taʻu ʻe ua kuo ʻosí, ʻa e fonua naʻe fanauʻi ai iá. Ko e feituʻu foki ia naʻe papitaiso ai hono fāmilí. Naʻa nau hiki ki ʻIutā, USA, ʻi heʻene kei taʻu hongofulu tupú. Pea ʻe vavé ni pē haʻane fakataha mo kinautolu!
Naʻe huke ʻe ʻAnitelū ʻa e pēsí pea hoko atu ʻene tohí. Naʻá ne saiʻia ke tohi. Naʻá ne saiʻia foki ke ako fekauʻaki mo e hisitōlia ʻo e Siasí. Kuó ne ʻosi lau e meʻa kotoa pē naʻá ne lava ʻo lau fekauʻaki mo Siosefa Sāmitá. Naʻá ne maʻuloto foki ʻa e ngaahi ʻaho mahuʻinga ʻi he moʻui ʻa Siosefa Sāmitá.
Ne ʻikai fuoloa kuo ʻi ʻapi ʻa ʻAnitelū mo hono fāmilí. Naʻá ne tokoniʻi kinautolu ʻi he ʻaho kotoa pē ʻi heʻenau ngāue ʻi he fāmá. Naʻá ne palau. Naʻá ne tō. Ka naʻá ne fie fakahoko ha meʻa lahi ange. Naʻá ne fie laukonga mo tohi mo folau.
Ko ia ne lotu leva ʻa ʻAnitelū. Naʻá ne fakakaukau lahi ki he meʻa ʻoku totonu ke ne faí. Ne fakafokifā haʻane maʻu ha foʻi fakakaukau! Naʻe kamata ke ne liliu ha niʻihi ʻo e hisitōlia ʻo Siosefa Sāmitá ki he lea faka-Tenimaʻaké.
Pea ko e kamataʻangá pē ia. Naʻe hoko atu pē e tohi, laukonga, mo e liliu lea ʻa ʻAniteluú. Naʻá ne kamata ngāue maʻá e Siasí ko ha faihisitōlia. Naʻá ne ʻalu ki ha ngaahi feituʻu kehekehe ʻi he ʻIunaiteti Siteití. Naʻá ne tānaki mai ha ngaahi talanoa mo ha ngaahi pepa mahuʻinga.
ʻI ha ʻaho ʻe taha, naʻe kole ai ʻe he kau taki ʻo e Siasí kia ʻAnitelū ke ne fakahoko ha meʻa ne toe fakafiefia ange. Naʻa nau kole ange ke ne ʻalu ki ha ngaahi fonua kehekehe. Naʻá ne tohi ha ngaahi talanoa fekauʻaki mo e kāingalotu ʻo e Siasí naʻá ne fetaulaki mo iá. Naʻe ʻikai faʻa tatali ʻa ʻAnitelū!
Naʻe lea māvae ʻa ʻAnitelū ki hono fāmilí. Hili iá, naʻe mavahe leva ʻa ʻAnitelū, ʻokú ne puke ʻene paasipōtí ʻi hono nimá! Naʻá ne folau ʻi he vaká. Naʻá ne fononga ʻi he lēlué. Ko e taimi ʻe niʻihi naʻá ne fononga saliote pe heka hoosi pe kāmeli.
Ko e fē pē ha feituʻu naʻá ne ʻalu ki ai, naʻe talanoa ʻa ʻAnitelū ki he kāingalotu ʻo e Siasí fekauʻaki mo ʻenau moʻuí. Naʻá ne talanoa kiate kinautolu fekauʻaki mo ʻenau tuí. Naʻá ne hiki ʻenau ngaahi talanoá koeʻuhí ke lava ʻe he kakai kehé ʻo lau ia. Naʻe mahuʻinga ʻa e talanoa ʻo e tokotaha kotoa pē, kia ʻAnitelū.
ʻI he foki mai ʻa ʻAnitelū mei heʻene fonongá, naʻá ne fakatahaʻi e ngaahi talanoá ki ha tohi. Naʻá Ne akoʻi e niʻihi kehé fekauʻaki mo hono hiki e ngaahi meʻá mo hono tauhi ia ʻi ha feituʻu malú.
Naʻe fiefia ʻa ʻAnitelū ʻi hono fai e ngāue naʻá ne manako aí. Ka naʻá ne faʻa fifili he taimi ʻe niʻihi pe naʻá ne fakahoko moʻoni ha meʻa makehe. Naʻá ne fakakaukau ke ne lotua ia.
“Tamai Hēvani, ko e hā ʻoku ʻikai fie maʻu ai ke u fakahoko ha ngaahi meʻa mahuʻinga lahi angé?” Naʻe haʻu ha tali mahino ki he fakakaukau ʻa ʻAniteluú. Kuo ueʻi fakalaumālie koe ʻe he ʻOtuá ke ke fakahoko e ngāue kuó ke faí.
Naʻe malimali ʻa ʻAnitelū. Naʻá ne ʻiloʻi naʻá ne fakahoko e meʻa naʻe finangalo e ʻOtuá ke ne faí. Pea ʻe ʻikai ke ne toe tuku ia!
Naʻe fakahaofi ʻe ʻAnitelū ʻa e ngaahi talanoa ʻa ha kakai ʻe toko 15,000 tupu. Te tau lava ʻo muimui ki heʻene tā sīpingá ʻaki hono hiki e ngaahi talanoa hotau fāmilí. ʻOku mahuʻinga e talanoa ʻo e tokotaha kotoa pē—kau ai mo koe!
ʻOku tohi mo fakahaofi ʻe ha faihisitōlia ha ngaahi talanoa maʻá e kakaí ke nau ako ki ai ʻi ha ʻaho.
ʻI he ʻaho ní, ʻoku ʻi ai ha temipale ʻe taha ʻi Tenimaʻake.
Naʻe hiki ha Kāingalotu Tenimaʻake ʻe meimei toko 17,000 ki ʻIutā ʻi he konga loto ʻo e 1800 tupú, ʻo hangē ko ʻAniteluú.
Naʻe hiki ʻe ʻAnitelū ha tohi ʻe 27 mo ha ngaahi fakamatala nusipepa ʻe 2,000 tupu.
Naʻá ne fononga ʻi ha meimei maile ʻe taha miliona (km ʻe 1.6 miliona)!
Naʻe ngāue fakafaifekau ʻa ʻAnitelū ʻi ha ngaahi misiona kehe ʻe hiva—ʻi Tenimaʻake, ngaahi feituʻu kehe ʻi ʻIulope, pea ʻi he ʻIunaiteti Siteití.
Ngaahi tā fakatātā ʻa Christopher Thornock