Tau Fakaafeʻi ʻa e Tokotaha Kotoa Pē
ʻOku nofo ʻa e tokotaha naʻá ne faʻu e talanoá ʻi ʻIutā, USA.
Naʻe fie maʻu ʻe Seilomi ke haʻu kotoa hono fāmilí ki hono papitaisó.
“ʻOku ou fie maʻu ke u ʻi ai mo e fāmilí, pea fakahā mai ʻe he ʻEikí, ha founga ʻe lava aí” (Tohi Hiva ʻa e Fānaú, 98).
Naʻe tangutu hifo ʻa Seilomi ʻi he musié ʻi muʻa ʻi he marae ʻo ʻene nená. Naʻe mei hokosia e taimi ke kamata ai e paati fakafāmilí!
Naʻá ne sio hake ki he tā tongitongi kulokula ʻi he tafaʻaki ʻo e falé. Naʻá ne fehuʻi ange, “Mami, ʻoku fēfē hono puʻaki e hingoa ʻo Nená ʻi he lea fakaʻilonga nimá?” Ne tuli e kuifefine ʻa Seilomí. Taimi ʻe niʻihi naʻa nau ako talanoa fakaʻilonga nima ke manatuʻi ia.
Naʻe pehē ange ʻe Mami, “Hangē ko ʻení.” Naʻá ne fakaʻilonga māmālie ʻa e hingoá ʻaki hono ongo nimá. Naʻe ʻai foki ʻe Seilomi e ngaahi fakaʻilongá ʻaki hono ongo nimá. Naʻá ne saiʻia ke ako ʻo kau ki hono fāmilí.
“ʻOku ou fie ʻahiʻahi!” Naʻe tangutu hifo ʻa Kati ne tuofefine ʻaki ʻe Seilomí ʻi hona tafaʻakí. Naʻe toe fakaʻilonga nima ʻe Mami ʻa e hingoá.
“ʻE lava nai ke tau hivaʻi ha foʻi hiva ʻi he lea fakaʻilonga nimá, ʻi he māhina katuʻú ʻi hoku papitaisó?” Ko e fehuʻi ange ia ʻa Seilomí.
Naʻe talaange ʻe Mami, “ʻIo.”
“Ko e hā ʻa e papitaiso?” Ko e fehuʻi ange ia ʻa Katí.
Ko e tokolahi ʻo e fāmili ʻo Seilomí naʻe ʻikai ke nau mēmipa ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe pehē ange ʻe Seilomi, “Ko e papitaisó ko ha meʻa makehe ia ʻi hoku siasí. Ko e taimi ia ʻokú ke fai ai ha palōmesi ke muimui kia Sīsū, pea ʻokú Ne palōmesi ke tokoniʻi koe.”
Naʻe pehē ange ʻe Kati, “Fakalata.”
“Te ke fie haʻu ki heʻeku papitaisó?” Ko e fehuʻi ange ia ʻa Seilomí.
“ʻIo!” Naʻe malimali ‘a Kati. Naʻe tafoki leva ʻa Seilomi ki heʻene faʻeé.
“ʻE lava nai ke ta kole ki he toenga ʻo e kāingá ke nau omi mo kinautolu? Pea mo hoku ngaahi mehikitangá mo e faʻētangatá?”
Naʻe kamokamo pē ʻa Mami. “ʻOku ou pehē ko e fakakaukau lelei ‘aupito ia.”
Naʻe kole ʻe Seilomi mo Mami ki he toenga ʻo e fāmilí ke nau omi ki he papitaisó. Naʻe ʻikai foki ke fuʻu ʻilo lahi ʻa e ngaahi mehikitangá mo e faʻētangatá ki he papitaisó. Ka naʻa nau ʻiloʻi ko ha ʻaho makehe ia kia Seilomi. Naʻa nau pehē, “Te mau ʻi ai!”
Naʻe ʻosi atu ha ngaahi uike. Faifai pea aʻu ki he ʻaho papitaiso ʻo Seilomí! ʻI he taimi naʻe hū atu ai ʻa Seilomi ki he fale lotú, naʻá ne malimali fiefia. Naʻe fonu e ʻotu kotoa pē ʻi he kau mēmipa hono fāmilí!
Naʻe ʻuluaki fai ʻe he tamai ʻa Seilomí ha talanoa kau ki he papitaisó mo e meʻafoaki ʻo e Laumālie Māʻoniʻoní. Naʻá ne toe lea foki ʻo kau ki he mahuʻinga ʻo e fāmilí. Naʻá ne pehē, “ʻOku mau fiefia lahi ke papitaiso ʻa Seilomi he ʻahó ni. Pea ʻoku mau fiefia ʻaupito ke ʻi heni mo homau fāmilí!” Naʻá ne fehuʻi ange, “Ko e hā e meʻa mahuʻinga taha ʻi he māmaní? Ko e kakaí, ko e kakaí, ko e kakaí.”
Naʻe malimali ʻa e tokotaha kotoa pē. Ko ha lea faka-Mauli ia naʻa nau saiʻia kotoa ai.
Hili e lea ʻa Tetí, naʻe hoko mai leva ʻa Seilomi mo Mami. Naʻá na hivaʻi ha foʻi hiva Palaimeli ʻi he lea fakaʻilonga nimá. Naʻe ongoʻi ofi ai ʻa Seilomi ki heʻene nená.
Naʻe lue atu leva ʻa Seilomi mo Teti ki he faiʻanga papitaisó. ʻI he tuʻu ʻa Seilomi ʻi he loto vaí, naʻá ne sio hake ki he kotoa hono fāmilí. Kāingá, ngaahi mehikitangá, mo e faʻētangatá. Naʻa nau ʻi ai kotoa!
Naʻe kuikui ʻa Seilomi. Naʻá ne ongoʻi māfana mo nonga. Na‘á ne ongoʻi ʻo hangē ʻoku fāʻofua ange ha tokotaha kiate iá. Naʻá ne fakakaukau ki heʻene nená. Naʻá ne fakakaukau ki heʻene ngaahi kuí. Naʻá ne ʻiloʻi naʻa nau laukau ʻaki foki ia.
Naʻe fetongi ʻa Seilomi ki ha vala mōmoa. Naʻá ne fāʻofua leva ki he mēmipa takitaha ʻo hono fāmilí. Naʻá ne houngaʻia ʻiate kinautolu kotoa. Pea naʻá ne houngaʻia koeʻuhí ko e kau mēmipa hono fāmilí ʻi langí te ne lava ʻo feʻiloaki mo kinautolu ʻi ha ʻahó. Naʻe fie hokohoko atu ʻa Seilomi hono fai e ngaahi fili leleí ke nau fiefia ai.
Ngaahi tā fakatātā ʻa Oksana Grivina