Tohi ʻe Koe

ʻOku Nau Talitali Mai kiate Au!

Fai ʻe Giselle Olivia K., taʻu 8, Kānataka, ʻInitia

ʻOku ʻikai ke u faʻa tatali ke papitaiso maʻa ʻeku ngaahi kuí!

Mālō e Lelei! Ko hoku hingoá ko Siseli ʻOlivia. Naʻe fāʻeleʻi au ʻi ʻInitia. ʻOku ou ʻofa ʻia Sīsū Kalaisi. Ko e peseti pē ʻe 2.3 ʻo e kakai ʻi ʻInitiá ʻoku Kalisitiané. ʻIo, ʻoku faingataʻa he taimi ʻe niʻihi. Ka ʻoku ou ʻiloʻi ʻokú Ne tokoniʻi mo tataki au. Pea ʻoku langa ʻe he Siasí he taimí ni ha temipale ʻi ʻInitia!

ʻOku ou nofo ʻi ha kolo fakaʻofoʻofa mo ha kakai ʻe laui miliona. ʻI he kotoa ʻo e laui milioná, ʻoku ʻi ai ha kakai ʻe toko ono ʻoku ou ʻofa taha ai: ko ʻeku faʻeé; mo hoku kiʻi tehina ko Haleí; ko ʻeku ongo kui ʻofá; ko ʻeku faʻētangatá; pea mo e tokoua ʻeku faʻeé. Ko e kakai mahuʻinga taha kinautolu ʻi heʻeku moʻuí.

Ne mau fakahoko he taʻú ni ha ngaahi ʻekitivitī hisitōlia fakafāmili, pea ne u ako ai fekauʻaki mo ʻeku ngaahi kuí. Naʻe talamai ʻe Mama naʻe laʻiʻulu loloa ʻaupito ʻa e kau fafine mo e kau tangata fakatouʻosi ʻi hoku fāmilí, ʻo hangē pē ko aú. Naʻá ne talamai leva ha meʻa mahuʻinga ʻaupito ʻe taha: ʻoku talitali mai ʻeku ngaahi kuí kiate au ʻi he maama tataliʻanga ʻo e ngaahi laumālié! Naʻá ne pehē ʻoku nau tatali ke papitaiso—ʻo hangē pē ko e pau ke u tatali kae ʻoua kuo hoko hoku taʻu valú ka u toki papitaisó. (Kaikehe, naʻe papitaiso au ʻi hoku ʻaho fāʻeleʻí! Tika, ē?)

Naʻe pehē ʻe Mama ʻoku ʻi he maama tataliʻanga ʻo e ngaahi laumālié ʻeku ngaahi kuí. ʻOku ʻikai ke nau maʻu ha sino hangē ko aú, ko ia he ʻikai lava ke papitaiso kinautolu. Fakaʻofa ʻaupito! Ko e ʻuhinga ia ʻoku tau papitaiso ai maʻanautolu ʻi he temipalé. Naʻá ku talaange kia Mama ko ʻene langa pē ʻa e temipale ʻi Penikalulú, pea ko ʻeku lahi feʻungá pē, ʻoku ou fie papitaiso maʻanautolu.

ʻOku ou fiefia ʻaupito ʻe tuʻu ha temipale ʻi ʻInitia! Ko ha tāpuaki lahi ia he ʻoku ʻikai lava ke ʻave kimautolu ʻe Mama ki he ngaahi temipale ʻi he ngaahi fonua kehé. ʻOku nau fuʻu mamaʻo ʻaupito.

Naʻá ku fanongo ʻoku lahi e ngaahi matalaʻiʻakau fakaʻofoʻofa ʻi he ʻū ngoue ʻo e temipalé. Ko ia ʻoku ou fiefia ke sio ki he ngoué ʻi he taimi ʻe langa ai e temipalé. Ka ko e meʻa mahuʻinga tahá, ʻoku ʻikai ke u faʻa tatali ke papitaiso maʻa ʻeku ngaahi kuí. ʻOku ou ʻofa ʻi hoku fāmilí, pea ʻoku ou ʻofa foki ʻi heʻeku ngaahi kuí.

Kuó ke ʻalu nai ki he temipalé? Naʻe fēfē ia? ʻOfa pē naʻe fakaʻofoʻofa!

Ko e Temipale Bengaluru India ʻeni ʻi he taimi ʻe ʻosi aí!