« E parau fafau nō te bāpetizora’a », Hoa, Mē 2024, 8–9.
E parau fafau nō te bāpetizora’a
« Nō te aha ’oe e hina’aro ai ’ia bāpetizohia ’oe ? » ’Ua ui atu pāpā.
’Ua tupu teie ’ā’amu i te fenua Marite.
« Pāpā, e nehenehe ānei au e bāpetizohia i te va’ura’a o tō’u matahiti ? » ’Ua ui atu Keaton.
’Ua hi’o mai ra pāpā mai ni’a mai i te ha’uti tā rāua e ha’uti ra. « E mā’itira’a rahi te reira. E mea maita’i paha e tīa’i, ē tae roa i te 18ra’a o tō ’oe matahiti ? »
’Ua feruri Keaton i te reira. « Fātata roa ho’i tō’u e va’u matahiti i teienei. ’E e mea ātea roa ā te 18 ! »
’Ua vai māmū noa pāpā ma’a taime. ’Ua fa’anu’u a’era ’oia i tāna ha’uti. « Nō te aha ’oe e hina’aro ai ’ia bāpetizohia ’oe ? »
« ’Ua here au ia Iesu », ’ua parau Keaton. « ’E tē hina’aro nei au e pe’e ia iāna ».
« E tumu maita’i roa te reira ’ia bāpetizohia », ’ua parau pāpā. ’Ua ’ata’ata ’oia. « E pāturu vau ia ’oe mai te mea ’o terā tā ’oe e mā’iti. E va’u ’aore rā e 18 ānei tō ’oe matahiti ».
Tauahi atu ra Keaton i tōna pāpā. « Māuruuru ! ».
E ’ere pāpā i te melo nō Te ’Ēkālēsia a Iesu Mesia i te Feiā Mo’a i te mau Mahana Hope’a nei. Terā rā i te tahi taime, e haere ’oia i te purera’a nā muri ia Keaton ’e ia māmā. ’E ’ia hōro’a ana’e Keaton i te mau a’ora’a, ’aore rā ’ia hīmene ’e te tahi atu mau tamari’i o te Paraimere i roto i te purera’a ’ōro’a, e haere mai iho ā pāpā.
I te otira’a tā rāua ha’utira’a, ’ite atu ra Keaton ia māmā i roto i te piha tūtu.
« ’Ua parau pāpā ē, e nehenehe au e bāpetizohia i te va’ura’a o tō’u matahiti », ’ua parau ’oia.
’Ua ’ata’ata māmā. « E mea ’oa’oa roa ! ’Ua feruri ānei ’oe ’o vai tā ’oe e hina’aro e bāpetizo ia ’oe ? »
’Ua tu’u atu Keaton i te mau merēti i ni’a i te ’aira’a mā’a. « ’Ia mana’o ’oe e nehenehe ānei tā pāpā rū’au e rave ? » Tē tāvini ra pāpā rū’au ’e ’o māmā rū’au i te hō’ē misiōni i roto i te tahi atu ’oire.
« E nehenehe tāua e ani », ’ua parau māmā.
I muri a’e i te tāmā’ara’a i te pō, ’ua pi’i video Keaton ia pāpā rū’au ’e ia māmā rū’au, nā ni’a i te niuniu a māmā. I muri a’e i te tahi ta’ira’a niuniu, ’ua pura mai tō rāua hōho’a mata ’ata’ata i ni’a i te paruai.
« ’Ia ora na, māmā rū’au ! ’Ia ora na pāpā rū’au ! » ’Ua parau atu Keaton. ’Ua ’ite ’ōrua, e aha ? E bāpetizohia vau i tō’u mahana fānaura’a i teie matahiti »
« E mea fa’ahiahia mau ! » Tē parau ra māmā rū’au.
« E bāpetizo ānei ’oe iā’u, e pāpā rū’au ? » ’Ua ui atu Keaton.
’Ua rahi roa atu ā tā pāpā rū’au ’ata. « E ’oa’oa roa ïa vau ».
I te taera’a mai tōna mahana bāpetizora’a, ’ua ineine ’o Keaton. ’Ua fa’ahoro māmā ’e ’o pāpā iāna i te hō’ē fare purera’a na’ina’i, fātata i te vāhi tei reira tō pāpā rū’au ’e tō māmā rū’au tāvinira’a i tā rāua misiōni.
’Ua ’ahuhia Keaton ’e ’o pāpā rū’au i te ’ahu ’uo’uo. ’Ua pārahi ’āmui rāua, ’a hīmene ai te mau ta’ata. I muri iho, ’ua pure māmā.
I muri mai, ’ua hōro’a mai pāpā i te hō’ē a’ora’a. « ’Ia bāpetizo-ana’e-hia ’oe, e fafau ’oe ’ia pe’e ia Iesu Mesia ’e ’ia ha’apa’o i tāna mau fa’auera’a. ’Ua ha’api’i ’oia ia tātou ’ia here i te tahi ’e te tahi. Te here ’o te rāve’a maita’i roa a’e ïa nō te ora », ’ua parau ’oia.
’Ua hi’o atu Keaton i te hōho’a o Iesu tā pāpā e tāpe’a ra.
« ’Ia here ana’e tātou ia vetahi ’ē, e putapū rātou ē, tē aupuruhia ra rātou. E tauturu ato’a te reira ia tātou ’ia ’oa’oa ’e ’ia fa’ari’i i te hau ». ’Ua hi’o ’āfaro ti’a atu pāpā ia Keaton. « Tē ha’apeu nei au ia ’oe i teie mahana, nō te fafaura’a ’ia pe’e ia Iesu Mesia. Tē ti’aturi nei au ē, e fa’aha’amana’o noa tō ’oe bāpetizora’a ia ’oe ’ia here i te Atua ’e ’ia here ia vetahi ’ē ».
’Ua ’āpā maita’i atu ra Keaton ia pāpā. I muri iho, ’ua pe’e atu ’oia ia pāpā rū’au i roto i te vāhi bāpetizora’a. ’Ua tu’u Keaton i te hō’ē rima i ni’a i te rima o pāpā rū’au ’e te tahi i roto i te rima o pāpā rū’au. ’Ua fa’ahiti pāpā rū’au i te mau parau nō te pure bāpetizora’a. I muri iho, ’ua tauturu ’oia ia Keaton ’ia hapu atu i raro i te pape.
I te haerera’a mai Keaton i rāpae i te pape, ’ua ’ata’ata ’oia. ’Ua rave oia ! ’Ua pe’e ’oia ia Iesu Mesia. ’Aita e maoro roa, e ha’amau-ato’a-hia ’oia ’e e fa’ari’i i te hōro’a o te Vārua Maita’i. ’Ei reira ’oia e riro mai ai ’ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei.
’Ua ’oa’oa roa Keaton i te ha’apa’ora’a i tāna fafaura’a, ’ia ha’amana’o noa ia Iesu ’e ’ia ha’apa’o i tāna mau fa’auera’a.
Fa’ahōho’ara’a nā Alyssa Tallent