« ’Ua mā fa’ahou », Hoa, Mē 2024, 18–19.
’Ua mā fa’ahou
’Aita i ti’a iā’u e mā’iti i te maita’i i te hō’ē mahana tā’āto’a ! ’Ua feruri Emily.
’Ua tupu teie ’ā’amu i te fenua Marite.
Tē ti’a ra Emily i roto i te pape ’e ’o pāpā ’e tē ’ata’ata ra. E rave rahi hepetona tōna tīa’i-noa-ra’a i teie mahana ! ’Ua hepohepo roa tōna māfatu nō te mea ’aita ā ’oia i hopu a’enei i raro i te pape. E ’oa’oa rahi rā tōna ’ia bāpetizohia ’oia mai ia Iesu Mesia.
’Ua tāpiri ’oia i tōna nā mata ’e ’ua fa’aro’o ia pāpā i te fa’ahitira’a i te pure bāpetizora’a. I muri iho, ’ua tāpiri ’oia i tōna ihu, ’ua tāpiri i tōna nā mata, ’e ’ua tūfetu i tōna nā turi ’āva’e, ’a fa’ahopu ai pāpā iāna i raro i te pape.
’Ua huti ’oi’oi mai pāpā iāna i ni’a, ’e ’ua mani’i haere te pape nā ni’a iāna. ’Ua tāmarō atu Emily i te reira i ni’a i tōna nā mata, ’ua ’ata’ata rā ’oia. E au ra iāna e ta’ata ta’a ’ē ’oia i teienei. E nino’a mana’o ’āpī ’e te ’oa’oa tei fa’aī iāna. ’Ua hina’aro ’oia ’ia tāmau noa te reira i te putapū iāna !
’Ua tauahi maita’i pāpā iāna. ’Ua ’ite au e nāhea ’ia tāpe’a i teie nino’a mana’o maita’i, ’ua feruri Emily. Tā’u noa ’ohipa e rave ’o te mā’itira’a ïa i te maita’i ’e ’ia riro mai ia Iesu Mesia te huru ! ’Ua pāpū roa iāna e nehenehe ’oia e nā reira.
I tō rātou tāpaera’a i te fare, ’ua horo atu Emily mai te pere’o’o i te ’ūputa fare. Mai tōna taea’e e maha matahiti, ’o Jonah. I te taime mau ’a tae ai Emily i mua i te ’ōpani ’e ’a ha’amata ai i te ’īriti i te reira, ’ua haru mai Jonah i tōna piritoti ’e ’ua huti mai iāna i muri—ma te pūai.
« ’Eiaha » ’Ua tuō Emily. Huti mai ra ’oia i tōna piritoti i roto i te rima i tōna taea’e. I muri iho, ’ua pāruru Emily iāna ’ia ’ore ’oia ’ia tomo mātāmua i roto. E mana’o ’ino’ino roa tō Emily !
’Oi’oi ’oia i te fa’aeara’a. E nino’a mana’o ri’ari’a tei fa’aī iāna. ’Ua fa’aātea ’oia ’e ’ua vaiiho ia Jonah ’ia horo i roto.
« ’Eiaha e ’ino’ino mai ! » ’ua pi’i atu ’oia ia Jonah. Nō rave iho nei ’oia i te hō’ē mā’itira’a hape. E’ita roa te Fa’aora e tuō riri i ni’a ia Jonah. Mea nāhea ’oia i te rave-’oi’oi-ra’a i te hō’ē hape ? ’Ua mo’e roa tōna nino’a mana’o ’āpī o te ’oa’oa.
’Ua fa’a’ino vau i te reira, mana’o a’era ’oia. ’Aita i ti’a iā’u e mā’iti i te maita’i i te hō’ē mahana tā’āto’a !
E sābati te mahana nō muri iho. ’A fa’aineine ai Emily nō te haere i te purera’a, ’ua feruri fa’ahou ’oia i tōna tuō-riri-ra’a ia Jonah. Tē vai noa ra tōna mana’o pe’ape’a.
I roto i te purera’a ’ōro’a, ’ua ani te ’episekōpo ia Emily ’ia haere mai i mua. Tē ha’amauhia ra ’oia. Tē aura’a ra, e fa’ari’i ’oia i te hōro’a o te Vārua Maita’i. ’Ua pārahi atu ’oia i ni’a i te hō’ē pārahira’a. ’Ua tu’u marū noa pāpā i tōna nā rima i ni’a i tōna upo’o.
’Ua tāpiri Emily i tōna nā mata ’a ha’amata ai pāpā. ’Ua fa’aro’o ’oia ia pāpā i te paraura’a i te mau parau, « ’a fa’ari’i mai i te Vārua Maita’i ».
’Ua tāmau noa Emily i te fa’aro’o.
« Emily, ’a ha’amana’o noa ē, maoti Iesu Mesia, e nehenehe ’oe e tātarahapa ’ia rave ana’e ’oe i te hō’ē mā’itira’a hape », ’ua parau pāpā. « I te mau taime ato’a ’a rave ai ’oe i te ’ōro’a mo’a, e nehenehe ’oe e feruri i te fafaura’a tā ’oe i rave i te taime ’a bāpetizohia ai ’oe. E nehenehe fa’ahou ā ’oe e fafau e pe’e iāna ».
’A fa’aoti ai pāpā i te ha’amaita’ira’a, ’ua putapū Emily i te ’oa’oa ’e te hau. ’Ua ’ite ’oia ē, tē parau mai ra te Vārua Maita’i iāna ē, e maita’i te mau mea ato’a. ’Aita e fifi i te mea ē, ’aita ’oia i mea parauti’a roa. Maoti ra Iesu Mesia ’e tāna tāra’ehara, ’ua nehenehe iāna e tātarahapa ’e ’ia fa’aorehia tāna mau hara ! ’Ua tātarahapa ’oia i te tuō-riri-ra’a ia Jonah, ’e ’ua ’ite te Metua i te ao ra e tāmau noa ’oia i te tāmata.
’Ua ’ata’ata Emily ’a ho’i ai rāua pāpā i tō rāua pārahira’a. ’A ’ōperehia ai te ’ōro’a mo’a, ’e ’a tīa’i ai Emily i te reira ma te fa’aoroma’i.
Fa’ahōho’ara’a nā Audrey Day