« Te hāmani maita’i i te taime tāmā’ara’a avatea », Hoa, Mē 2024, 36–37.
Te hāmani maita’i i te taime tāmā’ara’a avatea
E fa’ao’oo’o ato’a ra ānei te tahi atu mau tamāroa iāna ?
’Ua tupu teie ’ā’amu i te fenua Firipino.
’Ua fa’aro’o Dave i tōna māmā i te pātōtōra’a i te ’ōpani ’o tōna piha. ’Ua tae te taime nō te ara. ’Ua ti’a mai ’oia nā ni’a mai i te ro’i ’e ’ua haere atu e horoi i tōna mata. I muri iho, ’ua ’āmui atu ’oia ia māmā, pāpā ’e tōna mau taea’e ’e tuahine i roto te piha i mua.
« ’Ia ora na », ’ua parau Māmā. ’Ata’ata mai nei Dave ma te vare’a tā’oto. ’Ua tūturi te ’utuāfare ’e ’ua fa’ahiti pāpā i te pure nō te ha’amata i te mahana.
« Tē hina’aro nei au e fa’a’ite atu i te hō’ē pāpa’ira’a mo’a faufa’a roa i teie po’ipo’i », ’ua parau Māmā. ’Ua ’īriti mai ’oia i tāna Buka a Moromona. « Tei roto te Moroni 7:45.« »« E fa’a’oroma’ira’a roa tō te aroha mau ’e te hāmani maita’i ».
’Ua feruri Dave i te pāpa’ira’a mo’a ’a fa’aineine ai ’oia nō te fare ha’api’ira’a. Hou ’oia ’a haere atu ai nā te ’ūputa, ’ua fa’ahiti ’oia i te hō’ē pure. « Te Atua ē, ’a tauturu mai iā’u ’ia riro ’ei ta’ata hāmani maita’i i teie mahana », ’ua pure ’oia.
I roto i te piha ha’api’ira’a, ’ua ’oa’oa Dave ’a rave noa ai ’oia i tāna ’ohipa ha’api’ira’a. ’Ua fa’aro’o māite ’oia i te ’orometua ha’api’i ia Frida, i te hōro’ara’a mai i te mau ta’o ’āpī nō te tāmau.
’Aita i maoro roa, ’ua tae te hora nō te tāmā’ara’a avatea. ’Ua ho’o mai Dave i te tahi mau ’ūmara euhia i te tihōta ’e te vaiharo [jus] to’eto’e. ’Ua pārahi atu ’oia ’e tōna mau hoa ’e ’ua ha’amata i te paraparau.
’Aita i maoro roa, ’ua fa’aro’o atu ’oia i te tahi mau tamari’i i te aira’amā’a i pīha’i iho noa mai. E piti nā tamāroa e fa’ao’oo’o ra i te hō’ē tamāroa tae-’āpī-mai ’o Jose te i’oa. Mea na’ina’i Jose nō tōna matahiti, e mea maita’i rā i ni’a ia vetahi ’ē ’e te rave itoito i te ’ohipa i roto i te piha ha’api’ira’a. Tē tāmā’a ra te tahi mau tamāroa i te avatea, ’aita rā ’o Jose.
« Nō te aha e mea poto roa ’oe ? ’Aita ānei tā ’oe e mā’a i te fare ? », ui a’era Antonio.
Fāriu atu ra Dave i ni’a i te mau tamāroa i te taime mau, ’a ’ite ai ’oia ia Joaquin i te ravera’a i te pūtē a Jose ’e te tāorara’a atu i te reira ia Antonio ra. ’Ua horo atu Jose nā muri ia Antonio nō te rave mai i tāna mau tauiha’a.
« ’A fa’aho’i mai i tā’u pūtē », ’ua parau ’oia.
’Aita rā Antonio ’e ’o Joaquin i fa’aro’o. Nā ’o atu ra Joaquin, « mea tahito roa ’e te hā’iri’iri mau tā ’oe pūtē ! »
’Ua fa’aro’o atu Dave i teie mau parau ’ī’ino ato’a, ’ua hitahita rā ’oia i te tauturu atu ia Jose. E aha te mana’o o te tahi atu mau tamari’i ? E fa’ao’oo’o ato’a ānei Joaquin ’e ’o Antonio iāna ?
I muri iho, ’ua ha’amana’o ’oia i te pāpa’ira’a mo’a i tai’ohia e Māmā i taua po’ipo’i ra. E hāmani maita’i te aroha. ’Ua hina’aro Iesu Mesia ’ia riro ’oia ’ei tamaiti hāmani maita’i. ’O te ’ohipa tano ïa e ti’a ’ia rave.
Ti’a mai nei Dave ’e ’ua fa’aruru atu i te tahi atu mau tamāroa. « ’A fa’aea na i te fa’a’a’a ia Jose. ’A fa’aho’i mai i tāna pūtē ».
Nā ’ō atu ra Joaquin, « tē fifi ra ’oe ? ».
« Nō te aha e mea ’ino ’oe i ni’a ia Jose ?« »’Aita ’oia i rave i te hō’ē ’ohipa ’ino », ’ua parau Dave. Huti māite a’era ’oia i te aho. « ’Ua here Iesu ia tātou pā’āto’a, ’e tē hina’aro nei ’oia ’ia hāmani maita’i tātou ia tātou. ’A fa’aea i te fa’a’a’a ia Jose. E mea ’ino roa te fa’a’ami’amira’a [intimidation]. ’Ia ’ore ’oe e fa’aea, e haere au e ti’i ia Frida, te ’orometua ha’api’i ».
Pi’o a’era te upo’o o Antonio i raro i ni’a i tōna nā tia’a. ’Ua fa’aho’i atu ’oia i te pūtē a Jose. Munamuna ihora ’oia « ’eiaha e ’ino’ino mai ». Ho’i atu ra rāua Joaquin i tō rāua pārahira’a.
« Māuruuru » parau mai ra Jose.
Pa’ipa’i ihora Dave i te tapono o Jose. « E hoa tāua i teienei ».
’Ata’ata a’era Jose.
I te fare, ’ua fa’ati’a Dave i tōna ’utuāfare i te ’ohipa i tupu.
Nā ’ō mai nei Pāpā, « e ’ere i te mea ’ōhie, ’ua rave rā ’oe i te ’ohipa maita’i ».
« Tē ha’apeu nei au i tō ’oe huru hāmani maita’i », ’ua parau atu Māmā.
I te mahana i muri iho, ’a tauturu ai Māmā iāna nō te fa’aineine i tāna mā’a nō te avatea, ’ua ui atu Dave, « e nehenehe ānei tāua e hāmani e piti faraoa ’īna’i ? »
« Nō te aha ? « E po’ia rahi tō ’oe ? » ’Ua ui atu Māmā.
’Ata’ata ihora Dave. « ’Aita, inanahi ra ’ua ’ite atu vau ē ’aita tā Jose e mā’a. Tē hina’aro nei au e hōro’a ato’a te tahi ’o tā’u nāna.
« E mana’o maita’i roa te reira ! » Tātara mai ra Māmā i te tahi atu faraoa ’e ’ua hāmani Dave i te tahi atu ā faraoa ’īna’i.
I te tāmā’ara’a avatea, pārahi ihora Dave ’e ’o Jose i te hō’ē vāhi nō te ’amu ’āmui i tā rāua faraoa ’īna’i. E tītauhia te itoito nō te tāpe’a i te tahi mau tamari’i ’ia fa’a’ami’ami ia Jose. ’Ua here rā Dave i tōna hoa ’āpī ’e ’ua ’ite ’oia, tē ’oa’oa nei te Metua i te ao ra i te mā’itira’a ’oia ’ia riro ’ei ta’ata hāmani maita’i.
Fa’ahōho’ara’a nā Mark Robison