« Fa’a’ite i te here o te Atua », Hoa, Mē 2024, 32-33.
Fa’a’ite i te here o te Atua
’Aita ’o Thais i ’ite e aha te mea e parau ’aore rā e aha te rave, ’ua hina’aro rā ’oia e tauturu.
’Ua tupu teie ’ā’amu i te fenua Pōrīvia.
E po’ipo’i ve’ave’a taua po’ipo’i ra. Tē paraparau ra ’e tē ’ata’ata ra Thais ’e tōna hoa ’o Claudia, ’a hāhaere ai rāua nā te tahu’a tu’era’a popo. Nō fa’aoti noa mai ra rāua i tā rāua piha fa’a’eta’etara’a tino ’e teienei, tē haere ra rāua i te piha nō te ’ohipa nūmerara’a.
E taime fa’afa’aeara’a nā te mau tamari’i na’ina’i a’e. ’Ua hi’ohi’o noa Thais ia rātou ’ia ha’uti.
I muri iho, ’ite atu ra ’oia i te hō’ē tamāhine iti e pārahi ra ’ōna ana’e i ni’a i te ’ē’a. I tō rāua ha’afātatara’a atu, ’ua ’ite atu Thais tē ta’i ra ’oia.
Tārape atu ra Thais ia Claudia ’ia haere atu i pīha’i iho i te tamāhine iti.
Fa’atu’atu’a mai ra Claudia i te mata ma te tā’iri’iri i te upo’o. « E tāerehia tāua ».
Hou ’o Thais ’a paraparau atu ai, ’ua reva a’ena ’o Claudia.
’Ua hi’o atu Thais i te tamāhine iti ra. E au ra e 5 matahiti tōna. ’Ua hunahia tōna hōho’a mata i rotopū i tōna nā turi ’āvae ’e ’ua tāpo’i i tōna upo’o i tōna nā rima.
Pārahi atu ra Thais i pīha’i iho iāna. Fa’anu’u ri’i a’e ra te tamāhine iti i te ātea.
« Maita’i ’oe ? » Ui marū atu ra Thais.
’Aita te tamāhine i pāhonō mai. ’Aita ’o Thais i ’ite roa e aha te mea e parau ’aore rā e rave.
I muri iho, ui atu ra ’oia, « e nehenehe ānei au e tauturu ia ’oe ? »
Ha’ape’e mai ra te tamāhine iti i tōna tapono.
« ’O Thais tō’u i’oa. ’O vai tō ’oe i’oa ? »
I te hope’a, hi’o mai nei te tamāhine iti ra ia Thais. « Nicol ».
« Nō te aha ’oe i ta’i ai, e Nicol ? »
« E fa’ao’oo’o-noa-hia vau nō tō’u pāpāri’a menemene », parau mai ra ’oia ma te ta’i.
Tāmarō a’e ra Thais i te hōho’a mata o Nicol. « Tē ’oto nei au nō tō rātou paraura’a i te reira.« »E ’ere i te mea faufa’a te mea tā te ta’ata e mana’o ra ».
« Tē parau nei rātou e ’ere au i te mea nehenehe ».
« E pa’i, tē mana’o nei au ’ua hape roa rātou ! » Parau a’e ra Thais ma te mata ’ata’ata. « Mea nehenehe roa ’oe ’e e mea ta’a ’ē roa ato’a.« »’Ua ’ite ānei ’oe i te reira ? »
’Ua ha’amana’o Thais i te hō’ē o te mau hīmene Paraimere tāna e au roa. ’Ua ’ite ’oia i teienei e aha te mea e parau.
« E tamari’i ’oe nā te Atua », ’ua parau Thais, ma te rave i nā rima o te tamāhine iti.
’Ua ’āparau ri’i Thais ’e ’o Nicol. ’Ua fa’ata’a atu ’oia i te faufa’a rahi o Nicol nā tō tātou Metua i te ao ra, nā tōna ’utuāfare, ’e nā te tahi atu mau ta’ata e rave rahi tei here roa iāna. Ha’amata ri’i a’era Nicol i te ’ata’ata.
Tau minuti i muri mai, ti’a mai ra Nicol ’e ’ua tauahi pūai atu ia Thais. « Maūruuru ! » ’ua parau ’oia.
’Ua hi’o atu Thais i tōna hoa ’āpī i te horo-’ē-ra’a atu ma te mata ’ata’ata rahi. E putapūra’a maita’i i te tauturura’a ’ia maita’i mai Nicol ’e ’ia ’ite i te here rahi o te Atua iāna.
I muri iho, ’ōu’a ato’a mai ra Thais. E ti’a ato’a paha iā’u e horo mai ia Nicol, ’aita ana’e e tāerehia vau nō te ’ohipa nūmerara’a ! mana’o ihora ’oia ma te ’ata’ata, ’a haere rū ai ’oia i tāna piha.
Fa’ahōho’ara’a nā Flavio Remontti