« Auhoara’a i roto i te ha’uti perē fa’anu’u », Hoa, Mē 2024, 14–15.
Auhoara’a i roto i te ha’uti perē fa’anu’u
Nāhea rātou e nehenehe ai e ha’uti mai te mea ’aita rātou e hāro’aro’a i te tahi ’e te tahi ?
’Ua tupu teie ’ā’amu i Heremani.
« Tei roto i tō’u nei ’ā’au ! » ’Ua hīmene Matvii. ’Ua hīmene mai tōna māmā ’e tōna taea’e, ’o Tymofii, nā muri iho iāna. E mea pōiri i rāpae mai i te ha’amāramarama o te pere’o’o. ’Ua tauturu rā te hīmene ’ia māramarama ri’i a’e te mau mea ato’a.
E taime ri’ari’a nō Matvii ’e nō tōna ’utuāfare. Tē haere nei rātou e fa’aea i Helemani, nō te mea e ’ere tō rātou fare i te mea pāruru-fa’ahou-hia. E piti mahana tō rātou rāterera’a, ’e i teienei, tē fātata atu ra rātou i te tāpae. Tē fa’ahoro nei te hō’ē ’episekōpo nō Heremani ia rātou i te hō’ē vāhi nō te fa’aea.
’Ua ’oa’oa ’o Matvii i te tauturura’a te Metua i te ao ra ia rātou, ’ia haere atu i Helemani ma te pāruruhia. Tē mihi nei rā ’oia ia pāpā. ’Ua tītauhia iāna e fa’aea atu i roto i tō rātou fenua nō te tama’i. Tē ha’ape’ape’a rahi nei Matvii nōna.
’Ua tāpe’a te ’episekōpo i te pere’o’o i mua i te hō’ē fare. « Manava i te taera’a mai i tō’u fare ».
’Ua rave mai Matvii i tāna pūtē ’e ’ua pe’e atu i tōna ’utuāfare i roto mai. E mea hau roa. ’Ua haere a’ena ïa te ’utuāfare o te ’episekōpo e ta’oto.
« E nehenehe ’outou e fa’aea i roto i te piha o Mats ’e o Lore, ’ia fa’aea mai ’outou i’ō nei », ’ua parau te ’episekōpo.
« Heru na », te reo ïa o māmā. « ’Aita e tītauhia ia rāua e vaiiho mai i tō rāua piha nō mātou ».
’Ua ’ata’ata te ’episekōpo. « ’Ua ’oa’oa rāua i te nā-reira-ra’a. Tē hina’aro nei mātou ’ia ’ite ’outou i te au maita’i ».
’Ua tā’iri’iri te upo’o o māmā. « Māuruuru roa ».
I te po’ipo’i, ’ua haere atu Matvii ’e ’o Tymofii i te fare tūtu nō te tāmā’ara’a i te po’ipo’i. Tē pārahi ra te ’episekōpo i te ’aira’amā’a ’e te hō’ē tamāroa ’e te hō’ē tamāhine. E ’ere rāua i te mea pa’ari roa atu ia Matvii.
« Teie tā’u nā tamari’i ’o Mats ’e ’o Lore », ’ua parau te ’episekōpo.
« ’Oa’oa i te fārereira’a ia ’ōrua », parau atu ra Tymofii.
E huru ha’amā ri’i tō Mats ’e tō Lore.
« ’Aita rāua e parau i tō ’ōrua reo », tē parau ra te ’episekōpo. « ’Ua pāpū rā iā’u ē, e riro mai ’outou ’ei mau hoa maita’i ».
’Ua fa’atu’atu’a iho ra Matvii i te mata. Nāhea rātou e nehenehe ai e riro ’ei mau hoa, mai te mea ’aita rātou e nehenehe e paraparau i te tahi ’e te tahi ? E au ra iāna, te māramarama ’o tāna i hīmene i napo ra, ’ua mo’e ïa.
I muri a’e i te tāmā’ara’a, ’ua fa’a’ite atu Mats ’e ’o Lore ia rāua i te hō’ē piha ha’utira’a. E piti tamari’i na’ina’i e ha’uti ra i te tahi mau tao’a ha’uti. ’Ua mana’o iho ra Matvii ē, e nau teina teie o Mats ’e o Lore.
’Ua parau Mats i te hō’ē parau. Mai te huru ra e uira’a teie, ’aita rā Matvii i ’ite i te mea tāna e parau ra. Pārahi atu ra Mats ’e ’īriti mai ra i te hō’ē ’āfata tāreta. ’Ua fa’ata’ata’a i te reira ma te ’āpapa. I muri iho ’ua rave mai ’oia ’e ’o Lore i tā rāua mau tāreta. ’Ua hina’aro Matvii e ha’uti. ’Aita rā ’oia i ’ite e nāhea ra !
’Ua tu’u atu Mats i te hō’ē tāreta i raro ’e ’ua hi’o noa Matvii. ’Ua parau fa’ahou Mats i te hō’ē mea.
’Ua hina’aro roa Matvii e ta’i. ’Aita ’oia e hina’aro e ora i te fenua Heremani, mai te mea ’aita ’oia e hāro’aro’a i te hō’ē ta’ata.
’Ua parau a’era Lore i te hō’ē mea ia Mats, i muri iho horo atu ra i te ’āfata vaira’a tauiha’a. Ho’i mai nei ’oia ’e tu’u mai nei i te hō’ē ha’uti ’āpī i ni’a i te tahua.
’Ua ’ite Matvii i teie ha’uti. E au ra te mau tuha’a rā’au mai terā ïa tāna e vai ra i tōna fare. E perē fa’anu’u ! E ha’uti na ’oia i te perē fa’anu’u ’e ’o pāpā e rave rahi hora te maoro. ’Ua tā’iri’iri Matvii i te upo’o ma te ’oa’oa. ’Ua ’ite ’oia nāhea e ha’uti i teie ha’uti.
E ’ata rahi tō Lore ’e ’ua ha’amata i te fa’anaho i te mau tuha’a.
’Ua fa’anu’u Matvii i tāna tāpa’o e piti ’āfata ’e ’ua hi’o ia Lore i te fa’anu’ura’a i tāna chevalier. I muri iho fa’anu’u atu ra Matvii i tāna fou i ni’a i te chevalier a Lore. Pōpō a’era ’oia ’e ’o Tymofii. ’Ū’uru ri’i iho ra Lore i te ha’amā, ma te ’ata’ata rā.
’Ua ha’uti maoro rātou. ’Aita i maoro roa, ’ua ’ata’ata rātou. ’Aita rātou i ta’a i te mau parau a te tahi ’e te tahi, ’ua ’ārearea noa rā rātou.
I roto i te mau hepetoma i muri mai, ’ua ’itehia mai ia rātou i te tahi atu mau ha’uti tā rātou pā’āto’a i mātau. ’Ua ha’uti rātou i te tu’e popo i rāpae’au ’e te tahi atu mau tamari’i heremani. ’Ua ha’api’i ato’a mai Matvii i te tahi mau ta’o nā roto i te reo heremani. I te tahi taime e hape ’oia, ’ua tāmau noa rā ’oia i te tāmata.
Tē mihi noa nei Matvii i tōna pāpā ’e tōna fare. ’Ua māuruuru rā ’oia ē, ’ua tauturu mai te Metua i te ao ra iāna ’ia roa’a te mau hoa ’āpī.
Fa’ahōho’ara’a nā Hannah Li