Te tahi mau ’ohipa e rave nō te Mai, pe’e mai

Nō te pō ’utuāfare ’aore rā te ’imira’a pāpa’ira’a mo’a—’aore rā nō te ’ārearea noa !

’A pe’e i tōna ta’ahira’a ’āvae

Hō’ē tamari’i e rēni ra i te ’āvae

Nō Mosia 4–6

’Ua ha’apa’o te ari’i Mosia i te mau fa’auera’a ’e « ’ua haere noa nā te mau ’ē’a o te Fatu » (Mosia 6:6). I ni’a i te hō’ē ’api parau, ’a rēni i tō ’oe ’āvae ’e ’a tāpūpū i te hōho’a. ’A pāpa’i i ni’a i tō ’oe hōho’a ’āvae i te hō’ē rāve’a e ti’a ai ia ’oe e pe’e ia Iesu. ’A tu’u i tō ’oe hōho’a ’āvae i te vāhi e ti’a ai ia ’oe e ha’amana’o i te pe’e i te hi’ora’a o Iesu Mesia.

Nō te mau tamari’i ’āpī a’e : Haere e orihaere. ’A ani i tā ’outou tamari’i ’ia ha’api’ipi’i mai i te ta’ahi i te vāhi tā ’outou e ta’ahi ra. ’A paraparau e nāhea tātou e ti’a ai e pe’e ia Iesu Mesia ma te ravera’a i te ’ohipa ’o tāna i rave, mai te tauturura’a ia vetahi ’ē ’e ’ia bāpetizohia.

Pe’e i te peropheta

E tamāhine e pāpa’i hōho’a ra i ni’a i te ’iri ’ohipara’a

Nō Mosia 7–10

’Ua ha’api’i Amona ē, e nehenehe te mau peropheta e hi’o i te mau mea e tae mai (hi’o Mosia 8:16–17). ’A huri i te ’api 2 nō te tai’o i te a’ora’a a te peresideni Nelson nō roto mai i te ’āmuira’a rahi. E aha tāna i ha’api’i ia tātou ? ’A pāpa’i hōho’a i te reira ’e ’a hāpono mai i te reira ia mātou i te Hoa.

Nō te mau tamari’i ’āpī a’e ’A hīmene « Suis les prophètes » (Chants pour les enfants, 58–59) ’e tā ’outou mau tamari’i. I te mau taime ato’a e hīmene ai ’outou te ta’o peropheta, ’a fa’atoro i ni’a i te hōho’a o te peropheta.

E māramarama i roto i te pōiri

Te mau tamari’i ’e te mau mōrī pata

Nō Mosia 11–17

’Ua ha’api’i Abinadi ē, ’o Iesu Mesia « te hō’ē māramarama hope ’ore, ’o tē ’ore roa e pōiri » (Mosia 16:9). ’A huna i te hō’ē tao’a i roto i te fare. ’A tūpohe i te mau mōrī ’e ’a ani i te mau ta’ata ato’a ’ia tāmata i te ’ite mai i te reira i roto i te pōiri. I muri iho ’a huna i te tao’a ’e ’a tāmata i te ’ite mai i te reira, ma te tū’ama i te mōrī ’aore rā i te mōrī pata. E aha te rāve’a ’ōhie a’e ? Nāhea Iesu i te tauturu ia tātou mai te māramarama tei tauturu ia ’outou ?

Nō te mau tamari’i ’āpī a’e : ’A ani i tā ’outou tamari’i ’ia tāmata i te tū’ama ’e i te tūpohe i te mōrī pata ’aore rā i te hō’ē lamepa. I muri iho ’a paraparau, e mea nāhea Iesu Mesia e riro ai ’ei māramarama, ’o te ’ore roa e nehenehe e hunahia ’aore rā, e tūpohehia.

Mau māfatu tei natihia i roto i te tāhō’ēra’a

Te mau tamari’i ’e te mau māfatu ’api parau

Nō Mosia 18–24

’Ua ha’api’i Alama ia tātou ’ia « tāhō’ē mai i tō [tātou] ’ā’au i roto i te tāhō’ēra’a ’e i roto i te here » (Mosia 18:21). Te aura’a e ha’a ’āmui tātou ’e e fa’a’ite i te here ia vetahi ’ē. ’A hāmani i te hō’ē fifi māfatu nō te fa’aha’amana’o i te reira ia ’outou ! Tāpūpū i te tahi mau māfatu pāpie ’e ’a pāpa’i i te i’oa o te hō’ē melo o te ’utuāfare i ni’a i te māfatu tāta’itahi. ’A fa’a’āpo’o i te māfatu tāta’itahi ’e ’a pātia i te hō’ē taura nā roto i te reira ’ia tū’ati te mau māfatu. ’A fa’atautau i tā ’outou taura māfatu i te vāhi e ’ite pinepine ai ’outou !

Nō te mau tamari’i ’āpī a’e : E ani i tā ’outou tamari’i i te hō’ē ’ohipa tā rātou i here nō ni’a i te ta’ata tāta’itahi i roto i te ’utuāfare. ’A parau i tā ’outou tamari’i i te hō’ē ’ohipa tāna i rave ’o tē fa’a’ite ra i te here ia vetahi ’ē !

Fa’ahōho’ara’a nā Katy Dockrill