E ’āparaura’a ’e ’o Isabela nō ni’a i te mau fafaura’a

Nō Alajuela, Costa Rica mai ’o Isabela. ’Ua ui atu mātou iāna i te tahi mau uira’a, nō ni’a e aha te aura’a ’ia ha’apa’o i tāna mau fafaura’a nō te bāpetizora’a.

’A fa’a’ite mai ’o vai ’oe.

E 13 tō’u matahiti. Mea au nā’u i te tu’e popo, te tunu mā’a, te nira ’ahu, te ’au ’e te tāvini ia vetahi ’ē. Tā’u moemoeā ’o te rirora’a mai ïa ’ei taote ’ānimara nō te mea, mea au nā’u e tauturu i te mau ’ānimara. Tā’u mā’a au roa, te spaghetti ’e te pizza, ’e tā’u ’ū au roa a’e te ’ere’ere tapemoana [violet].

Nāhea ’oe i te ha’apa’o i tā oe mau fafaura’a nō te bāpetizora’a ?

E tātarahapa vau ’e e rave i te ’ōro’a mo’a i te hepetoma ato’a. E pi’ira’a tō’u i roto i tā’u piha a te feiā ’āpī tamāhine, ’e tē tāmata nei au i te ha’apa’o māite i te reira. E ha’apa’o ato’a vau i tā’u mau fafaura’a nā roto i te tāvinira’a ia vetahi ’ē.

E aha tā ’oe e rave nei nō te tāvini ia vetahi ’ē ?

Mea au nā’u e tauturu i tō’u ’utuāfare. Pinepine au i te ha’uti ’e tō’u tuahine fēti’i e toru matahiti te pa’ari ’o Lina, ’ia rave ana’e tōna nā metua i te ’ohipa. Mea au nā’u e tauturu i tō’u mau metua tupuna, ’ia hina’aro ana’e rātou iā’u. E tauturu ato’a vau i tō’u taetaea’e o te piha ha’api’ira’a, ’ia ’imi maita’i nō tāna mau hi’opo’ara’a reo farāni i te fare ha’api’ira’a.

’A fa’ati’a mai na nō ni’a i tō ’oe pi’ira’a.

’O vau te tauturu mātāmua i roto i tā’u piha o te Feiā ’Āpī Tamāhine. I roto i tā’u mau hōpoi’a, tē vai ra te aupurura’a i te feiā ’āpī tamāhine. Te aura’a o te reira, te tauturura’a ïa ia rātou ’e te mau mea ato’a tā rātou e hina’aro. E haere au i te piha ha’api’ira’a ’e i te mau ’ātivite, ’e e tāmata vau ’ia riro ’ei hoa nō te tahi atu mau tamāhine i roto i tā’u piha ha’api’ira’a, ’aita e haere mai nei.

E aha te a’o tā ’oe e hōro’a i te hō’ē ta’ata, nō ni’a i tōna pi’ira’a mātāmua ?

E parau vau ia rātou, ’eiaha roa e ha’ape’ape’a. Te hō’ē pi’ira’a ’o te hō’ē ïa rāve’a e nehenehe ai ’outou e tauturu i te ’ohipa a te Metua i te ao ra. Te rāve’a maita’i a’e nō te tauturu ia vetahi ’ē ’o te hōro’ara’a ïa i te hi’ora’a maita’i !

Fa’ahōho’ara’a nā Vivian Mineker