« ការខូតខាតដោយសារព្រួញ »ប្រិយមិត្ត ខែ កញ្ញា ឆ្នាំ ២០២៤ ទំព័រ ៤-៥ ។
ការខូតខាត ដោយសារ ព្រួញ
តើដានីយ៉ែល ក្លាហានគ្រប់គ្រាន់ដើម្បីប្រាប់ការពិតឬទេ ?
ដំណើររឿងនេះបានកើតឡើងនៅក្នុង ស.រ.អា. ។
ដានីយ៉ែលបានបង្ហើបគម្របកេសរបស់លេងចាស់ៗរបស់លោកតា ហើយបានលួចមើលខាងក្នុងនោះ ។ បងប្អូនជីដូនមួយរបស់គាត់បាននាំគ្នាមើលទាំងអស់គ្នា ។ ពួកគេចូលចិត្តលេងជាមួយគ្នានៅផ្ទះលោកតាណាស់ !
នៅខាងក្នុងកេសនោះមានរបស់លេងចាស់ៗជាច្រើនដែលម្តាយ និងមីងរបស់ដានីយ៉ែលធ្លាប់បានលេង កាលពេលពួកគាត់នៅក្មេងៗ ។
« តើរបស់ទាំងនោះជាអ្វីទៅ ? » បងប្អូនជីដូនមួយរបស់ដានីយ៉ែល ឈ្មោះណូអេ បានចង្អុលទៅព្រួញហួសសម័យទាំងប្រាំមួយដែលមានពន្លឺចែងចាំង ។ វាមានចុងស្រួច ហើយមានរោមស្លាបដែលមានពណ៌—ខ្លះក្រហម និងខ្លះទៀតលឿង ។
ដានីយ៉ែលបានយកមួយឡើង ។ គាត់បាននិយាយថា « ម្តាយរបស់ខ្ញុំបានប្រាប់ខ្ញុំអំពីរបស់ទាំងនេះ » ។ « ឯងដាក់កន្ត្រកសំណាញ់នៅវាលស្មៅខាងក្រៅ ។ បន្ទាប់មក ឯងដាក់វេនគ្នាគប់វាទៅលើ ហើយព្យាយាមឲ្យវាធ្លាក់ចូលកន្ត្រកសំណាញ់នោះ » ។
ណូអេបាននិយាយថា « ឡូយណាស់ ! » ។ គាត់បានរត់ទៅកាន់ទីធ្លាបាត់ហើយ ដើម្បីរៀបចំហ្គេមនោះ ។
មិនយូរប៉ុន្មាន ដានីយ៉ែល និងបងប្អូនជីដូនមួយរបស់គាត់បានគប់ព្រួញលើវាលស្មៅ ទៅលើអាកាសជុំវិញទីធ្លាផ្ទះរបស់លោកតា ។ ដានីយ៉ែលសប្បាយពេលឃើញព្រួញធ្លាក់ចុះ ហើយដោតជាប់នៅក្នុងស្មៅយ៉ាងជ្រៅ ។
បងប្អូនជីដូនមួយរបស់ដានីយ៉ែល ឈ្មោះលីលី បាននិយាយថា « ខ្ញុំហ៊ានភ្នាល់ថា ខ្ញុំអាចគប់ព្រួញរបស់ខ្ញុំខ្ពស់ជាងរបស់ឯង » ។
ក្មេងៗបានសើច និងគប់ព្រួញឡើងខ្ពស់ទៅៗ ។
បន្ទាប់មក ដានីយ៉ែលមានគំនិតមួយ ។ គាត់បាននិយាយថា « ខ្ញុំហ៊ានភ្នាល់ថា ខ្ញុំអាចគប់ព្រួញរបស់ខ្ញុំផុតផ្លូវចំណតរថយន្ត ហើយចូលទៅក្នុងកន្ត្រកសំណាញ់នោះ ! » គាត់បានរត់ឆ្លងផ្លូវទៅម្ខាងទៀត ហើយគប់ព្រួញនោះមួយទំហឹង ។
ព្រួញហោះឡើងខ្ពស់ទៅលើអាកាស ប៉ុន្តែវាមិនបានធ្លាក់ចំលើស្មៅទេ ។ ផ្ទុយទៅវិញ វាបានធ្លាក់ចំឡានថ្មីរបស់អ្នកមីង រ៉ូប៊ីលីន ដោយមានសម្លេងសូរ ក្តុក យ៉ាងខ្លាំង ។
ណូអេស្រែកថា « អូ៎ អត់ទេ ! » ។
ដានីយ៉ែលបានរើសព្រួញនោះ ។ មានកន្លែងកំកំប៉ិតធំមួយជាកន្លែងដែលព្រួញនោះធ្លាក់ចំ ។
ក្មេងៗបានមើលមុខគ្នាដោយភ័យខ្លាច ។ ក្រោយមក ពួកគេបានទុកព្រួញចោលនៅលើវាលស្មៅ ហើយរត់ចូលទៅក្នុងដោយមិនបាននិយាយអ្វីសោះ ។
លុះដល់ពេលរសៀល មនុស្សគ្រប់គ្នាបានចូលទៅក្នុងរថយន្តរបស់ពួកគេដើម្បីត្រឡប់ទៅផ្ទះវិញ ។ មីងរបស់ដានីយ៉ែលបានកត់សម្គាល់ឃើញស្នាមកំប៉ិតនៅលើរថយន្តរបស់គាត់ ។ គាត់បានសួរថា « តើមានអ្វីកើតឡើង ? » ។
ដានីយ៉ែលភ័យបុកពោះ ។ តែគាត់មិនបាននិយាយអ្វីទាំងអស់ ។ គាត់គ្រាន់តែឡើងឡាន ហើយបានលាបងប្អូនជីដូនមួយរបស់គាត់ ។
អំឡុងពេលបើកឡានត្រឡប់មកផ្ទះវិញ ដានីយ៉ែលបានអង្គុយយ៉ាងស្ងៀមស្ងាត់នៅកន្លែងអង្គុយខាងក្រោយ ។ គាត់បានព្យាយាមអានសៀវភៅរបស់គាត់ ។ ប៉ុន្តែគាត់មិនអាចផ្តោតអារម្មណ៍បានទេ ។ គាត់មានអារម្មណ៍រសាប់រសល់អំពីអ្វីដែលបានកើតឡើង ។ គាត់បានដឹងថា ភាពស្មោះត្រង់គឺជារឿងត្រឹមត្រូវដែលត្រូវធ្វើ ។ ប៉ុន្តែការប្រាប់ការពិតគឺជារឿងគួរឲ្យភ័យខ្លាច ! ឪពុកម្ដាយរបស់គាត់នឹងខឹងគាត់យ៉ាងខ្លាំង ។ ក៏ដូចជាមីងរបស់គាត់ដែរ ។
បន្ទាប់មក ដានីយ៉ែលបានគិតអំពីវីរបុរសក្នុងព្រះគម្ពីរដែលគាត់ចូលចិត្ត ។ ដានីយ៉ែលនៅក្នុងព្រះគម្ពីរសញ្ញាចាស់ត្រូវបានបោះទៅក្នុងរូងតោដោយសារការជ្រើសរើសត្រឹមត្រូវ ។ គាត់ក្លាហានណាស់ ។ ប្រហែលជាដានីយ៉ែលក៏អាចមានភាពក្លាហានផងដែរ ។
« អេ ម៉ាក់ ? » ដានីយ៉ែលបាននិយាយ ។ « កូនបានគប់ព្រួញនៅលើស្មៅ ហើយវាបានធ្លាក់ចំរថយន្តរបស់មីង រ៉ូប៊ីលីន ហើយធ្វើឲ្យវាកំប៉ិត ។ វាជាកំហុសរបស់កូន ។ »
ម្តាយសម្លឹងមើលគាត់តាមកញ្ចក់មើលក្រោយ ។ គាត់មិនខឹងសម្បាដូចដានីយ៉ែលបានគិតនោះទេ ។ គាត់បាននិយាយថា « អរគុណដែលបានប្រាប់ការពិតដល់ម៉ាក់ » ។
ដានីយ៉ែលបានដកដង្ហើមធំ ។ គាត់បានសួរថា « តើកូនអាចទូរសព្ទទៅអ្នកមីង រ៉ូប៊ីលីន នៅពេលយើងដល់ផ្ទះវិញបានទេ ? »។ « កូនចង់សុំទោសគាត់ ។ ហើយកូននឹងខិតខំរកប្រាក់ដើម្បីបង់ថ្លៃជួសជុលឡានរបស់គាត់វិញ » ។
ម៉ាក់បានញញឹម ។ « នោះជាគំនិតល្អណាស់ » ។
អារម្មណ៍ក្តុកក្តួលរបស់គាត់បានបាត់ទៅ ហើយដានីយ៉ែលមានអារម្មណ៍សុខសាន្ត ។ គាត់មានភាពក្លាហានគ្រប់គ្រាន់ដើម្បីប្រាប់ការពិត ។ ដោយសារព្រះយេស៊ូវគ្រីស្ទ គាត់អាចប្រែចិត្ត ហើយធ្វើឲ្យរឿងនានាបានត្រឹមត្រូវ ។
រចនារូបភាពដោយ ចស ថាលបិត