« ការជជែកជាមួយ ទីអានគុម អំពីព្រះគម្ពីរ »ទស្សនាវដ្តីប្រិយមិត្តខែ កញ្ញា ឆ្នាំ ២០២៤ ទំព័រ ៤០–៤១ ។
ការជជែកជាមួយ ទីអានគុម អំពីព្រះគម្ពីរ
ទីអានគុម មកពីប្រទេស ហ្វីជី ។ យើងបានសួរគាត់នូវសំណួរមួយចំនួនអំពីរបៀបដែលគាត់បានរៀនចេញពីព្រះគម្ពីរមរមន ។
សូមប្រាប់យើងអំពីខ្លួនរបស់ប្អូន ។
ខ្ញុំមានអាយុប្រាំបួនឆ្នាំ ហើយជាកូនពៅក្នុងចំណោមកូនប្រាំមួយនាក់ ។ ពណ៌ដែលខ្ញុំចូលចិត្តគឺពណ៌ក្រហម ហើយអាហារដែលខ្ញុំចូលចិត្តគឺការីសាច់មាន់ជាមួយបាយ ។ ខ្ញុំចូលចិត្តលេងបាល់ឱប ! អ្វីដែលពិសេសអំពីខ្ញុំគឺឈ្មោះរបស់ខ្ញុំ ។ គោត្តនាមរបស់ខ្ញុំគឺមកពីអ្នកចម្បាំងនៃព្រះគម្ពីរមរមន ឈ្មោះកណ្តាលរបស់ខ្ញុំគឺមកពីពូរបស់ខ្ញុំនៅប្រទេស នីហ្សេរីយ៉ា ហើយត្រកូលរបស់ខ្ញុំគឺហ្វីជី ។
តើអ្វីដែលបានជួយប្អូនរៀនចេញពីព្រះគម្ពីរ ?
ខ្ញុំចូលចិត្តអានព្រះគម្ពីរជាមួយគ្រួសារខ្ញុំ ។ យើងសិក្សាមេរៀនចេញមកពី ចូរមកតាមខ្ញុំ ជាមួយគ្នា ។ ខ្ញុំចូលចិត្តរៀនដំណើរថ្មីជារៀងរាល់សប្តាហ៍ ។ យើងនិយាយអំពីអ្វីដែលយើងរៀន ហើយចែកចាយទីបន្ទាល់របស់យើងជាមួយគ្នាទៅវិញទៅមក ។ ពេលខ្ញុំអានព្រះគម្ពីរ ខ្ញុំក៏ចូលចិត្តស្រមៃថាខ្លួនខ្ញុំនៅក្នុងដំណើររឿងនានាផងដែរ ។
តើព្រះគម្ពីរបានជួយប្អូនៗដោយរបៀបណា ?
ព្រះគម្ពីររំឭកខ្ញុំឲ្យមានភាពក្លាហាន និងហ៊ានអធិស្ឋានទូលសូមការលួងលោមចិត្ត ។ ពេលណាដែលខ្ញុំភ័យខ្លាច ឬឯកោ ខ្ញុំដឹងថាព្រះវិញ្ញាណបរិសុទ្ធនឹងលួងលោមខ្ញុំជានិច្ច ។
តើដំណើររឿងនៃព្រះគម្ពីរមរមនដែលអ្នកចូលចិត្តជាងគេនោះគឺជារឿងអ្វី ?
រឿងដែលខ្ញុំចូលចិត្តពីគម្ពីរមរមនគឺដំណើររឿងអំពី ទីអានគុម ពីព្រោះគាត់ជាអ្នកដឹកនាំ និងជាអ្នកចម្បាំងដ៏អស្ចារ្យ ។ គាត់បានប្រយុទ្ធដើម្បីគ្រួសារ មិត្តភក្តិ និងសាសនាចក្ររបស់គាត់ ។ ខ្ញុំដឹងថាខ្ញុំក៏អាចដូចគាត់ដែរ ហើយតែងតែការពារអ្វីដែលខ្ញុំស្រឡាញ់បំផុត ។
តើប្អូននឹងផ្ដល់ដំបូន្មានអ្វីខ្លះដល់នរណាម្នាក់ដែលមានការលំបាកក្នុងការយល់ដឹងពីព្រះគម្ពីរ ?
ប្រសិនបើនរណាម្នាក់កំពុងស្មុគ្រស្មាញក្នុងការរៀនពីព្រះគម្ពីរ នោះពួកគេអាចសុំម្តាយ ឬឪពុករបស់ពួកគេ ឬសូម្បីតែបងប្អូនបង្កើតរបស់ពួកគេឲ្យជួយពួកគេបាន ។ គ្រួសាររបស់ខ្ញុំពិតជាបានជួយខ្ញុំ ។ ប្អូនក៏អាចសួរគ្រូបង្រៀនអង្គការបឋមសិក្សា ឬអ្នកដឹកនាំនៅសាសនាចក្រផងដែរ !
រចនារូបភាពដោយ អាកូស្តូ ស្សាមបូណាតូ