« ការអធិស្ឋានសម្រាប់អាឡិចហានដ្រូ » ទស្សនាវដ្តី ប្រិយមិត្ដ ខែ វិច្ឆិកា ឆ្នាំ ២០២៤ ទំព័រ ៣២-៣៣ ។
ការអធិស្ឋាន សម្រាប់ អាឡិចហានដ្រូ
« តើព្រះយេស៊ូវដឹងទេថា ការមានជំងឺមហារីកមានអារម្មណ៍យ៉ាងណានោះ ? » ហេរ៉ាដូបានសួរ ។
ដំណើររឿងនេះបានកើតឡើងនៅក្នុងប្រទេស អែល សាលវ៉ាឌ័រ ។
ហេរ៉ាដូបានជិះស្គីទៅកាន់ជណ្ដើរខាងមុខផ្ទះរបស់គាត់ ។ រថយន្តរបស់ម៉ាក់បានមកដល់ច្រកផ្លូវចូលផ្ទះ ។ នោះមានន័យថា ម៉ាក់គាត់ និងបងប្រុសគាត់ អាឡិចហានដ្រូបានត្រឡប់មកពីមន្ទីរពេទ្យវិញហើយ ។ ហេរ៉ាដូបានដោះស្បែកជើងស្គីរបស់គាត់ចេញ ហើយរត់យ៉ាងលឿនចូលទៅខាងក្នុង ។
« ហេរ៉ាដូ ? » ម៉ាក់បានហៅ ។ « ពួកយើងនៅទីនេះ ! »
ហេរ៉ាដូបានដើរចូលទៅក្នុងបន្ទប់ទទួលភ្ញៀវ ។ អាឡិចហានដ្រូបានដេកនៅលើសាឡុង ។ ម៉ាក់បានអង្គុយក្បែរគាត់ ។ ម៉ាក់មើលទៅមានទុក្ខព្រួយ ។
ហេរ៉ាដូក៏ព្រួយបារម្ភផងដែរ ។ កាលពីសប្តាហ៍មុន ពួកគេបានរកឃើញថា អាឡិចហានដ្រូមានជំងឺមហារីក ។ គាត់ធ្លាក់ខ្លួនឈឺជាខ្លាំង ។
ប៉ុន្តែអាឡិចហានដ្រូបានងើបអង្គុយ ហើយញញឹមពេលហេរ៉ាដូចូលមក ។ « សួស្តី ! តើឯងរីករាយទេថ្ងៃនេះ ? »
« បាទ តែការជួបជាមួយវេជ្ជបណ្ឌិតនោះយ៉ាងម៉េចហើយ ? » ហេរ៉ាដូបានសួរ ។
អាឡិចហានដ្រូបាននិយាយថា « វេជ្ជបណ្ឌិតនិយាយថា បងនឹងត្រូវទទួលការវះកាត់ » ។
ម៉ាក់បានងក់ក្បាល ។ « ប៉ុន្តែវេជ្ជបណ្ឌិតដែលល្អបំផុត ដែលអាចជួយគាត់បានគឺនៅមន្ទីរពេទ្យកុមារ ។ ដោយសារអាឡិចហានដ្រូមានអាយុ ១៤ ឆ្នាំ គាត់លើសអាយុមិនអាចទទួលការព្យាបាលនៅទីនោះទេ ។ យើងត្រូវស្វែងរកកន្លែងមួយផ្សេងទៀត » ។
ហេរ៉ាដូមានអារម្មណ៍ថា ថប់ណែនតឹងទ្រូងណាស់ ។ ប្រសិនបើពួកគេមិនអាចទទួលបានជំនួយសម្រាប់អាឡិចហានដ្រូ តើនឹងមានអ្វីកើតឡើងទៅ ? តើជំងឺមហារីករបស់អាឡិចហានដ្រូនឹងកាន់តែធ្ងន់ធ្ងរឬ ?
ហេរ៉ាដូបានទៅបន្ទប់របស់គាត់ ។ គាត់ត្រូវការគិត ។
នៅអង្គការបឋមសិក្សា ហេរ៉ាដូបានរៀនថា ព្រះវរបិតាសួគ៌នឹងតែងតែស្ដាប់ឮគាត់ជានិច្ច ។ ហេរ៉ាដូដឹងថា គាត់នៅតែអាចសុំជំនួយពីទ្រង់បានជានិច្ច ។
ដូច្នេះ គាត់បានលុតជង្គង់ក្បែរគ្រែរបស់គាត់ ហើយឱបដៃរបស់គាត់ ។ គាត់បានអធិស្ឋានថា « ឱ ព្រះវរបិតាសួគ៌អើយ សូមជួយអាឡិចហានដ្រូផង » ។ «សូមជួយយើងស្វែងរកវេជ្ជបណ្ឌិតដែលអាចធ្វើការវះកាត់បាន » ។
មិនយូរប៉ុន្មាន ម៉ាក់បានហៅគាត់ញុំាអាហារពេលល្ងាច ។ ម៉ាក់បានធ្វើ ពូពូសា ជាម្ហូបដែលហេរ៉ាដូចូលចិត្ត ។ គាត់បានខាំបន្ទះនំថតធីឡាអាំងដែលមានស្នូលឈីស និងសណ្ដែកមួយម៉ា់ត់ធំ ។ ប៉ុន្តែគាត់នៅតែមានអារម្មណ៍ព្រួយបារម្ភអំពីបងប្រុសរបស់គាត់ ។
អាឡិចហានដ្រូបានខាំ ពូពូសា តែពីរបីម៉ាត់ប៉ុណ្ណោះ ។ គាត់ជ្រួញចិញ្ចើម ហើយធ្វើចលនាយឺតៗ ។
ម៉ាក់ក៏បានកត់សម្គាល់ឃើញដែរ ។ ម៉ាក់បានសួរថា « ហេតុអ្វីយើងមិនមើលវីដេអូសាសនាចក្រជាមួយគ្នាទៅ ? » ពួកគេចូលចិត្តមើលវីដេអូអំពីព្រះយេស៊ូវគ្រីស្ទ ពេលពួកគេមានអារម្មណ៍សោកសៅ ។
« បាទ » ។ ហេរ៉ាដូបានសម្អាតចាន ខណៈដែលម៉ាក់ទៅរៀបចំចាក់វីដេអូ ។ បន្ទាប់មក ពួកគេទាំងអស់គ្នាអង្គុយមើល ។
នៅក្នុងវីដេអូនោះ ព្រះយេស៊ូវគ្រីស្ទបានអធិស្ឋាននៅក្នុងសួនច្បារក្បែរដើមឈើមួយ ។ ហេរ៉ាដូធ្លាប់បានមើលរឿងនេះ ។ នេះគឺនៅពេលដែលព្រះយេស៊ូវបានរងទុក្ខពីមុនពេលទ្រង់សុគតនៅលើឈើឆ្កាង ។
នៅពេលវីដេអូបានបញ្ចប់ ហេរ៉ាដូមានអារម្មណ៍ស្ងប់ស្ងាត់ និងសុខសាន្ដ ។ ប៉ុន្តែគាត់មានសំណួរមួយ ។ គាត់បានសួរថា « ហេតុអ្វីបានជាព្រះយេស៊ូវត្រូវឈឺចាប់ខ្លាំងបែបនេះ ? »
ម៉ាក់បានឱបគាត់ និងអាឡិចហានដ្រូយ៉ាងណែន ។ « ព្រះយេស៊ូវបានជ្រើសរើសអារម្មណ៍ឈឺចាប់ព្រោះទ្រង់ស្រឡាញ់យើង ។ ទ្រង់ទទួលអារម្មណ៏នៃការឈឺចាប់ទាំងអស់ដែលយើងឆ្លងកាត់ » ។
ហេរ៉ាដូបានមើលទៅអាឡិចហានដ្រូ ។ « តើព្រះយេស៊ូវដឹងទេថា ការមានជំងឺមហារីកមានអារម្មណ៍យ៉ាងណានោះ ? »
ម៉ាក់បាននិយាយថា « ចាស ទ្រង់ជ្រាបដឹង » ។ « ទ្រង់ជ្រាបដឹងថាវាពិបាកប៉ុនណា ។ ហើយដោយសារទ្រង់ដឹងថាវាមានអារម្មណ៍បែបណានោះ ទ្រង់ដឹងពីរបៀបជួយយើង » ។
ហេរ៉ាដូមានអារម្មណ៍កក់ក្តៅក្នុងចិត្ដ ដូចគាត់ត្រូវបានដណ្ដប់ដោយភួយមួយយ៉ាងធំដូច្នោះដែរ ។ ព្រះវរបិតាសួគ៌ និងព្រះយេស៊ូវគ្រីស្ទស្គាល់ ហើយស្រឡាញ់គ្រួសាររបស់គាត់ ។ ទ្រង់ទាំងទ្វេបានដឹងពីរបៀបដើម្បីជួយអាឡិចហានដ្រូ ។
នៅពេលដែលហេរ៉ាដូត្រឡប់មកពីសាលារៀនវិញនៅថ្ងៃបន្ទាប់ គាត់បានឃើញម៉ាក់កំពុងរៀបកាបូប ។
ម៉ាក់បាននិយាយថា « មានដំណឹងល្អ ! » ។ « ម៉ាក់បាននិយាយជាមួយវេជ្ជបណ្ឌិតនៅមន្ទីរពេទ្យកុមារ ។ ពួកគេនឹងជួយអាឡិចហានដ្រូ ។ គាត់នឹងវះកាត់នៅថ្ងៃស្អែក » ។
ហេរ៉ាដូបានឱបម៉ាក់យ៉ាងណែន ។ « ព្រះវរបិតាសួគ៌កំពុងជួយយើង ! តើយើងអាចអធិស្ឋាន ហើយថ្លែងអំណរគុណដល់ទ្រង់បានទេ ? »
ម៉ាក់បាននិយាយថា « នេះជាគំនិតដ៏អស្ចារ្យ » ។ « តោះ យើងហៅអាឡិចហានដ្រូ » ។
ពេលពួកគេកំពុងអធិស្ឋានជាមួយគ្នានោះ ហេរ៉ាដូដូមានអារម្មណ៍សុខសាន្ដ ។ ព្រះវរបិតាសួគ៌បានឮការអធិស្ឋានរបស់គាត់ ។ ឥឡូវនេះ អាឡិចហានដ្រូនឹងទទួលបានការវះកាត់ដែលគាត់ត្រូវការ ។ ហេរ៉ាដូបានដឹងថា ព្រះយេស៊ូវគ្រីស្ទបានយល់ពីអ្វីដែលពួកគេកំពុងឆ្លងកាត់ ។ ហើយទ្រង់តែងតែជួយពួកគេឆ្លងកាត់ឧបសគ្គរបស់ពួកគេ ។
រចនារូបភាពដោយ រីខាដូ ហ្គេរេរ៉ូ