Pumarito Ka, Sumunod Ka sa Akin

Ang Doktrina at mga Tipan: Isang Buod

Ni Annelise Gardiner

Mga Magasin ng Simbahan

Ang Doktrina at mga Tipan: Isang Buod

Joseph Smith at Sidney Rigdon

Joseph at Sidney ni Annie Henrie Nader

Maikling Impormasyon

• Pinakamahabang bahagi: bahagi 124 (145 talata)

• Pinakama(i)ikling bahagi: bahagi 13, 116, at 120 (1 talata bawat isa)

• 138 bahagi at 2 opisyal na pahayag.

• Ang pangunahing nagsasalita sa Doktrina at mga Tipan ay si Jesucristo.

• Hindi tulad ng ibang banal na kasulatan, hindi ito isinalin mula sa mga sinaunang dokumento.

• Ang karamihan sa mga paghahayag sa aklat ay natanggap ni Propetang Joseph Smith; ang iba ay natanggap nina Brigham Young (bahagi 136) at Joseph F. Smith (bahagi 138), pati na rin nina Wilford Woodruff (Opisyal na Pahayag 1) at Spencer W. Kimball (Opisyal na Pahayag 2).

Ano ito?

Ang Doktrina at mga Tipan ay tinipong mga makabagong paghahayag mula sa Diyos na karamihan ay natanggap sa pamamagitan ni Propetang Joseph Smith. Marami sa mga paghahayag na ito ang ibinigay bilang sagot sa mga tanong ni Joseph at ng iba pang naunang miyembro ng Simbahan sa Diyos.

Bakit ginawa ang Doktrina at mga Tipan?

Noong mga unang araw ng Simbahan, iilan lang ang sulat-kamay na kopya ng mga paghahayag na ito. Noong 1831, nagpasiya ang mga lider ng Simbahan na ilimbag at ilathala ang mga paghahayag sa Book of Commandments. Sa isang kumperensya noong Nobyembre 1831 kung saan tinalakay ang Book of Commandments, natanggap ni Joseph ang paghahayag na ngayon ay nasa bahagi 1, ang paunang salita sa Doktrina at mga Tipan.

Pagkakasunud-sunod ng Pangyayari:

• 1823 Itinala ang unang paghahayag: bahagi 2.

• 1833 Inilathala ang Book of Commandments. Iilang kopya lang ang nakaligtas sa pagsalakay ng mga mandurumog sa palimbagan. Iniligtas ng dalawang tinedyer, sina Mary Elizabeth at Caroline Amelia Rollins, ang mga pahina sa abot ng kanilang makakaya at nagtago sila mula sa mga mandurumog sa isang taniman ng mais.

• 1835 Ang unang edisyon na inilimbag nang maramihan. Ito ay naglalaman ng mga karagdagang paghahayag at ang pamagat nito ay binago at naging Doktrina at mga Tipan.

• 1844 Inilimbag di-naglaon matapos ang pagpaslang kay Joseph Smith, may nadagdag na mga paghahayag sa edisyong ito, bukod pa sa bahagi 135.

• 1847 Nakatanggap si Brigham Young ng mga tagubilin kung paano palilipatin ang mga Banal sa kanluran: bahagi 136.

• 1876 Ang edisyong ito ay naglalaman ng 26 na bagong bahagi at ito ang unang edisyon kung saan ang mga bahagi ay hinati sa mga talata.

• 1890 Inilabas ni Wilford Woodruff ang Pahayag, na humantong sa pagwawakas ng pag-aasawa ng higit sa isa sa Simbahan (tingnan sa Opisyal na Pahayag 1).

• 1918 Ibinahagi ni Joseph F. Smith ang kanyang pangitain tungkol sa daigdig ng mga espiritu: bahagi 138

• 1921 Mula sa edisyong ito, hindi na isinama ang Lectures on Faith.

• 1978 Natanggap ni Spencer W. Kimball ang paghahayag tungkol sa priesthood na naging Opisyal na Pahayag 2.

• 1981 Sa edisyong ito, ang mga heading ay isinunod sa pamantayan at nadagdag ang mga cross-reference, kasama ang ilan pang paghahayag.

• 2013 Sa edisyong ito, in-update ang mga impormasyon tungkol sa kasaysayan sa mga heading.

Ang ilan sa mga bahagi ay kilala sa mga espesyal na pamagat bago tinipon ang mga ito sa Doktrina at mga Tipan:

• Bahagi 1—ang Paunang Salita

• Bahagi 20—ang mga Saligan at Tipan

• Bahagi 88—ang Dahon ng Olibo

• Bahagi 133—ang Apendiks

• Bahagi 134—ang Pahayag tungkol sa mga Pamahalaan at Batas

Ang Doktrina

Ang unang tinipong mga paghahayag ay tinawag na Book of Commandments. Ang mga sumunod na koleksyon ay tinawag na Doktrina at mga Tipan dahil nadagdagan ang mga ito ng serye ng mga lektyur “tungkol sa doktrina ng simbahan,” na kilala bilang “doktrina” sa madaling-salita (tinatawag ngayon na Lectures on Faith). Simula noong 1921 edition, hindi na isinama ang Lectures on Faith, ngunit ang pamagat na Doktrina at mga Tipan ay hindi nagbago.¹

Ang mga Tipan

Ang nalalabing bahagi ng aklat ay naglalaman ng mga paghahayag na natanggap ni Joseph Smith. Ang bahaging ito ay kilala bilang “mga tipan at kautusan ng Panginoon” o “mga tipan” sa madaling-salita. Ginamit ng mga naunang Banal ang “mga tipan” o “mga kautusan” para tukuyin ang mga paghahayag na ito na natanggap ng Propeta para maibukod ang mga ito sa iba pang isinulat ni Joseph Smith, tulad ng mga inspiradong sermon at pagsasalin niya ng Biblia.²

Bakit mahalaga ang Doktrina at mga Tipan ngayon?

Ang Doktrina at mga Tipan ay naglalaman ng mga paghahayag mula kay Jesucristo sa Kanyang mga tao. Itinuturo nito sa atin na alam ng Diyos ang pangalan ng bawat isa sa atin, na dinirinig at sinasagot Niya ang ating mga panalangin, at na nangungusap pa rin ang Diyos hanggang ngayon. Ito ay nagtuturo rin ng mahalagang doktrina tungkol sa plano ng kaligtasan at nagbibigay sa atin ng karagdagang kabatiran tungkol sa Pagbabayad-sala ni Jesucristo. Nagbibigay ito ng kapanatagan sa pamamagitan ng paglalarawan kung paano tayo minamahal ng Diyos at kung paanong tinatawag pa rin Niya tayo na lumapit sa Kanya kahit nakagagawa tayo ng mga pagkakamali.

Mga Tala

1. Tingnan sa Mga Paksa sa Kasaysayan ng Simbahan, “Mga Lektyur sa Teolohiya (‘Lectures on Faith’),” ChurchofJesusChrist.org.

2. Tingnan sa Mga Paksa sa Kasaysayan ng Simbahan, “Doktrina at mga Tipan” at “Mga Paghahayag ni Joseph Smith,” ChurchofJesusChrist.org.