“Te Koaua ae Itiaki, te Reirei ae Itiaki, ao te Kaotioti ae Koaua Ibukin Kakorakoraia Kairake, Nob. 2022.
Te Tetere ni Moaningabongin te Kaonobong
Te Koaua ae Itiaki, Te Reirei ae Itiaki, ao Te Kaotioti ae Itiaki
Te Rongorongo ae Kaeweaki
Tariu ao mwaneu aika kam tangiraki, ti butimwaai ngkami nakon te maungatabu ni kabuta! …
… I kaoko bwa ko na ongora nakon tenua bwaai n te maungatabu aei: te koaua ae itiaki, ana reirei ae itiaki Kristo, ao te kaotioti ae itiaki. Kaitarakin aia nano kokoraki tabeman, koauana bon iai te bwai ae eti ao ae bure. Bon iai te koaua ae kororaoi—te koaua ae akea tokina. Teuana te kangaanga n ara bong aikai bwa e karako mwaitiia aomata ae ataia bwa a na tan nakea ni karekea te koaua. I kona n taekinna raoi nakoimi bwa baike ko na ongo n te bong aei ao ningabong iai inanona koaua aika itiaki.
Ana reirei ae itiaki Kristo e mwaaka. E bitii maiuia naake a ataia ao n ukoria ni karaoia inanon maiuia. Ana reirei Kristo e buokiira ni kunea ao n tiku iaon kawain te berita. Te tiku iaon te kawai ae irariki man mataata e na anganiira te kona n tau ni karekei ana bwai ni kabane te Atua. Akea ae materaoi riki nakon ni kabane ake iroun te Tama!
Ni kabaneana, te kaotioti ae itiaki ibukin te titiraki are inanom e na karika te maungatabu bwa e na materaoi ao n aki mwanuokinaki. Ngkana ko tuai n ukoukora ana mwakuri te Tamnei ae Raoiroi bwa e na buokiko n ongo bwa tera ae tangiria te Uea bwa ko na ongo inanon boong aika uoua aikai, I kaoko bwa ko na karaoia ngkai. Taiaoka karika te maungatabu aei bwa te tai ni baka iaon rongorongo mai iroun te Uea rinanoia Ana toro. Reiakinna bwa ko na kanga ni karaoi inanon maium.