“Ana Rau Kristo e Kamauna te Nano ni Kairiribai,” Ibukin Kakorakoraia Kairake, Nob. 2022.
Te Tetere ni Moaningabongin te Tabati
Ana Rau Kristo E Kamauna te Nano ni Kairiribai
Te Rongorongo ae Kaeweaki
Iesu Kristo e kabwarabwara bwa Ana reirei e aki “kakireweei nanoia aomata bwa a na un, i marenaia; ma [anne Ana] reirei [are] a na bon riai ni kaakeaki bwaai aikai.” [3 Nibwaai 11:28–30]. …
Imwiin mwanangan te Tia Kamaiu nako Amerika, a katiteuanaaki aomata. … Kakaokoroia e taraa n aki kakaawaki ngkana a kabotaua tibwaan aia tangira ibukin te Tia Kamaiu, ao a na katiteuanaaki ni “bwaibwai n abanuean te Atua.” [4 Nibwaai 1:17]. Mwiin anne bwa “bon akea riki te botanaomata n ai aroia ae a kukurei ibuakoia aomata … nako ake a karikaki ni bain te Atua.” [4 Nibwaai 1:16].
Te katiteuanaaki e kainnanoa karaoana. E rikirake ngkana ti ribanaia ma tangiran te Atua inanora ao ti katuruturua ara iango iaon tokin kawaira ae akea tokina. Ti bon katiteuanaaki man moan kinaakira ae kabuta riki ngkai ngaira natin te Atua ao ara motinnano nakon koauan te euangkerio ae kaokaki. Tangiran te Atua ao ara kakaonimaki iroun Iesu Kristo e kamwakura ara tabeaianga ae koaua ibukiia tabeman. …
Ngkana ana tangira Kristo e riki bwa te bwai ae moan te kakaawaki inanon maiura, ti na butimwaea te aki boraoi n nano ma te nimamannei, te taotaonaki n nano ao te akoi. E na karako raraomara iaon kakai rotakira ao e na raka riki iaon kakai rotakiia kaain rarikira. Ti na ukora te raunnano ao ni katiteuanaaki. Ti aki kabaeki n “baike a nanokokoraki,” ni motiki taekaia koraki ake ti aki boraoi ni iango ma ngaiia, ke ni kataia ni karikia bwa a na bwaka. N onea mwiina, ti ataia bwa koraki ake ti taku bwa aki boraoi a karaoi aia kabanea n tamaroa are a konaa ma te taneiai inanon maiuia. …
Au kakao bwa ti na riki n ninikoria n katuka ara tangira iroun te Atua ao n riki bwa ana reirei Iesu Kristo iaon bwaai ni kabane n ara iango. Ti a kamatoa te berita ake a bon riai n rikira bwa ana reirei—te berita ae te riki n ti teuana.