Upo’oti’a i ni’a i te ao nei ’e ’ia noa’a te ora
Fa’ahitira’a parau
He Leadeth Me [E arata’i ’oia iā’u], nā Yongsung Kim
E aha te auraʼa ’ia upo’oti’a i ni’a i te ao ? Te aura’a, ’oia ho’i, e upo’oti’a i ni’a i te fa’ahemara’a ’ia ha’apa’o i te mau mea o teie nei ao hau atu i te mau mea a te Atua. Te aura’a, ’oia ho’i, ti’aturi i te mau ha’api’ira’a tumu a te Mesia hau atu i te mau ha’api’ira’a a te ta’ata nei […] Te aura’a, ’oia ho’i, e mā’iti ’ia ha’apae i te mau mea ato’a e fa’aātea i te vārua […]
Nō reira, nāhea ïa tātou i te upo’oti’a i ni’a i te ao nei ? […] I te mau taime ato’a e ’imi ’outou ’ia pe’e i te mau fa’aurura’a a te Vārua, i te mau taime ato’a e rave ’outou i te hō’ē ’ohipa maita’i—te mau ’ohipa e’ita « te ta’ata tino » e rave, tē upo’oti’a ra ïa ’outou i ni’a i te ao nei […]
I teienei, nāhea te upo’oti’ara’a i ni’a i te ao nei i te ha’amaita’i i tō tātou orara’a ? E mea māramarama roa te pāhonora’a : Te tomora’a i roto i te hō’ē autā’atira’a nō te fafaura’a ’e te Atua, e tā’amu te reira ia tātou i ni’a iāna ’a fa’ariro ai i te mau mea ato’a nō ni’a i te orara’a ’ei mea ’ōhie a’e. ’Eiaha na e hape mai : ’Aita vau i parau ē, te ravera’a i te mau fafaura’a e fa’a’ōhie te reira i te orara’a. E tīa’i rā i te pāto’ira’a, nō te mea ’aita te ’enemi e hina’aro ’ia ’itehia ia ’outou te mana o Iesu Mesia. Terā rā, mai te mea e nati ’outou ia ’outou i ni’a i te Fa’aora, te aura’a ra, e roa’a ia ’outou tōna pūai ’e tōna mana tāra’ehara
[…] Tā’u tāparura’a ia ’outou—’ia ha’apa’o i tō ’outou iho ’itera’a pāpū nō Iesu Mesia ’e tāna ’evanelia. ’A ha’a nō te reira. ’A aupuru i te reira ’ia tupu i te rahi. ’A fa’a’amu i te reira i te parau mau
[…] Mai te mea e vaiiho ’outou i te Atua ’ia upo’oti’a i roto i tō ’outou orara’a, tē fafau atu nei au ia ’outou ē, e fāri’i ’outou i te hau rahi atu, te ti’aturi, te ’oa’oa, ’e, ’oia ïa, te fa’afa’aeara’a.