« E ha’apa’o mau i tā te Atua ’e tāna ’ohipa—Fa’ahitira’a parau », Nō te pūai o te feiā ’āpī, Novema 2022.
E ha’apa’o mau i tā te Atua ’e tāna ’ohipa
Urutue
Te hō’ē hi’ora’a pāpū i roto i te mau pāpa’ira’a mo’a nō te māna’ona’ora’a a Heber C. Kimball nō ni’a i te ’itera’a pāpū nō te ’ohipa a te Atua ’e nō Iesu Mesia, e ’itehia ïa i roto i te parau a’o a Alama i tāna e toru tamaiti—ia Helamana, Sibelona ’e Korianotona […]
Te māna’ona’ora’a mātāmua o Alama … ’ia roa’a ïa i te tama tāta’itahi te hō’ē ’itera’a pāpū nō Iesu Mesia ’e ’ia ha’apa’o mau i tā te Atua ’e tāna ’ohipa […]
E mea parauti’a ’o Sibelona, mai tōna taea’e Helamana. Te parau a’o tā’u e hina’aro e tūra’i ’o te Alama 38:12, ïa tē tai’o nei : « ’A hi’o māite ē ’ua tāvaha ’oe i tō ’oe mau hina’aro pae tino ato’a, ’ia fa’a’īhia ’oe i te aroha » […]
E ’ere te tino i te mea ’ino—e mea nehenehe ’e te faufa’a—e mau hina’aro pae tino rā tē nehenehe e fa’ata’a ’ē ia tātou i te Atua ’e tāna ’ohipa, mai te mea ’aita e tāvaha-tano-maita’i-hia, ma te ha’afifi ho’i i tō tātou ’itera’a pāpū.
Hau atu i te ha’avīra’a i te ’īria ’e te tāvahara’a i te tahi atu mau hina’aro pae tino, tītauhia ’ia ora i te orara’a mā i te pae mōrare, maoti te ha’avīra’a i tō tātou mau mana’o, te mau parau ’e te mau ’ohipa.
Nō te mea ’ua fa’aō Korianotona i roto i te vi’ivi’i, tītau-roa-hia ’ia ha’api’i Alama iāna nō ni’a i te tātarahapa.
Nō reira, te parau ārai a Alama, ’oia ho’i ïa e tāvaha i te mau hina’aro pae tino, tāna rā parau a’o i tei ’ōfati i te ture, e tātarahapa ïa.
’Aita e ta’ata e nehenehe e ho’i i te Atua ra nā roto i tāna iho mau ’ohipa maita’i ; tītauhia ia tātou pā’āto’a ’ia fāna’o i te tusia a te Fa’aora. ’Ua hara pā’āto’a, ’e e mea nā roto noa i te tāra’ehara a Iesu Mesia e noa’a ai te aroha ’e e ora ai i pīha’i iho i te Atua.