« ’A ’ahu na i tō ’ahu ’una’una, e Ziona—Fa’ahitira’a parau », Nō te pūai o te feiā ’āpī, Novema 2022.
’A ’ahu na i tō ’ahu ’una’una, e Ziona
Fa’ahitira’a parau
Tē pure māite nei au i te Vārua Maita’i ’ia ha’amāramarama ia tātou tāta’itahi, ’a feruri ai i te faufa’a rahi o te parabole nō te ’ōro’a fa’aipoipora’a hui ari’i.
I te tomora’a te ari’i i roto i te piha fa’aipoipora’a, ’ua hi’o ’oia i te mau ta’ata ’e ’ua haru ’oi’oi tōna mata i ni’a i te hō’ē manihini tei ’itea-maita’i-hia ’aita i ’ō’omo i te ’ahu fa’aipoipora’a. ’Ua fa’ahaerehia mai terā ta’ata, ’e ui a’era te ari’i : « E hoa, e aha ’oe i tae mai ai i’ō nei ’aore e ’ahu fa’aipoipora’a ? ’Aita atu ra āna e parau» [Mataio 22:12] […]
Te pāto’ira’a o terā ta’ata ’ia ’ō’omo i te ahu fa’aipoipora’a, e hi’ora’a mau ïa nō tōna fa’atura ’ore i te ari’i ’e i tāna tamaiti. E ’ere ē, ’ua ’ere noa ’oia i te ’ahu fa’aipoipora’a ; ’aita, ’ua mā’iti rā ’oia ’eiaha e ’ō’omo mai. I reira ra te pāhonora’a pāpū a te ari’i : « ’A ru’uru’u iāna i te rima ’e te ’āvae, ’a hōpara atu i rāpae i roto i te pōuri ; tei reira te ’oto ’e te ’au’aura’a niho » [Mataio 22:13] […]
Te mea ē ’aita tōna ’ahu tano, e fa’a’itera’a ïa nō tōna ’ōrurehau ’o roto, i te ari’i ’e i tāna mau arata’ira’a ».
’Ei reira te parabole e fa’aoti ai i teie ’īrava hōhonu mau : « E rave rahi ho’i tei parauhia, e iti rā tei mā’itihia » [Mataio 22:14] […]
’Aita tā te Atua e tāpura feiā maimoa ’o tā tātou e feruri ē, maita’i ho’i e tu’uhia atu tō tātou i’oa ’ia tae i te hō’ē mahana. ’Aita ’oia e tā’ōti’a nei i te feiā « mā’itihia » i te tahi noa mau pu’era’a. ’Aita, nā tō tātou rā ’ā’au, tō tātou mau hia’ai, tā tātou fa’aturara’a i te mau fafaura’a ’e te mau ’ōro’a mo’a nō te ’evanelia, tā tātou ha’apa’ora’a i te mau fa’auera’a, ’e hau roa atu, te aroha ’e te tahiti’a tāra’ehara o te Fa’aora e fa’aoti ē, tei roto ānei tātou i te feiā mā’itihia e te Atua […]
’Ia tītau ti’a tātou i te hōro’a pae vārua nō te mata e hi’o ’e te tari’a e fa’aro’o, tē parau fafau atu nei au e ha’amaita’ihia tātou i te ’aravihi ’e te mana’o fa’aoti nō te ha’apūai i tō tātou tū’atira’a ’e te fafaura’a i te Fatu ora. E fāri’i ato’a tātou i te mana nō te huru Atua i roto i tō tātou nei orara’a—’e i te hope’a, e pi’ihia ai tātou ’e e mā’itihia ai nō te ’ōro’a a te Fatu.