« ’Ia hau a’e tō tātou hi’ora’a ia Iesu Mesia i roto i tō tātou oraraʼa––Fa’ahitira’a parau », Nō te pūai o te feiā ’āpī, Novema 2022.
’Ia hau a’e tō tātou hi’ora’a ia Iesu Mesia i roto i tō tātou oraraʼa
Fa’ahitira’a parau
Nō te tauturu ia tātou ’ia ha’amau tāmau noa ’e ’ia haere atu tātou nā te ’ē’a mau, tē ani manihini mai nei te Fa’aora ia tātou ’ia hi’o i tō tātou orara’a nā roto iāna ’ia hau atu ā tō tātou ’itera’a iāna i roto i tō tātou orara’a …
’Ei ta’ata pe’e i te ’evanelia i tō’u ’āpīra’a, ’ua fārerei au e rave rahi ta’ata tei hi’o ’e tei ’ite i te mau tauira’a i roto i tō’u huru, tā’u mau peu ’e tā’u mau mā’itira’a, i muri a’e i tō’u tomora’a mai i roto i te ’Ēkālēsia
[…] Nā roto i te tauto’ora’a tu’utu’u ’ore nō te hi’o i ni’a ia ’e nō Iesu Mesia i roto i tō’u mau mana’o ’e i tā’u mau ’ohipa ato’a, ’ua tūramahia tō’u nā mata ’e ’ua hitahita tō’u māramarama nō te ’ite ē, tē pi’i ra Iesu Mesia iā’u ’ia « haere iāna ra » […]
I reira tō’u itera’a, mai iā’u e ’ite i teienei ē, tē arata’i nei tō tātou Fa’aora ’o Iesu Mesia i tō tātou ’āvae i te mau fare purera’a i te mau hepetoma ato’a, nō te rave i tāna ’ōro’a mo’a i te fare o te Fatu, nō te rave i te mau fafaura’a ’e ’ōna, i te mau pāpa’ira’a mo’a ’e i te mau ha’api’ira’a a te mau peropheta nō te ha’api’i i tāna mau parau. Tē arata’i nei ’oia i tō tātou vaha nō te fa’a’ite pāpū nōna, tō tātou rima nō te ’āfa’i i ni’a ’e nō te tāvini, mai tāna e ’āfa’i i ni’a ’e e tāvini, i tō tātou mata nō te hi’o i te ao ’e ia vetahi ’ē mai iāna e nā reira nei—« te mau mea e vai nei, ’e… te mau mea e vai a muri a’e » [Iakoba 4:13]. ’E ’a vaiiho ai tātou iāna ’ia arata’i ia tātou i roto i te mau mea ato’a, e fāri’i tātou i te ’itera’a pāpū ē « tē fa’a’ite māite nei te mau mea ato’a ē, tē vai ra te Atua »,[Alama 30:44], nō te mea i te mau vāhi ato’a tātou e ’imi ai iāna, e ’ite mai tātou iāna.